Salmos 105 - Bible in Tzeltal de Oxchuc y Tenejapa

Yat'el Dios ta scaj Israel

¹ Albeyaic me yutsilal te Cajwaltique, albeyaic sc'oplal ta bayuc te sbiile; ac'beyaic me sna' yantic lumetic te yat'ele.

² C'ajintayaic me c'ayojetic swenta yich'el ta muc' awu'unicte Cajwaltique; albeyaic me te bila muq'uic spasoje.

³ Ja'uc me toyol awo'tanic yu'un te xch'ul-biile. Binuc nax me yo'tanic te mach'atic yac sleelic te Cajwaltique.

⁴ Leaic te Cajwaltic soc te yu'ele; leaic ta spisil ora te Cajwaltique.

⁵ Ma me xach'aybey ta awo'tanic te jchajp at'eliletic muq'uic spasoje, soc te bila chapal yalojbey sc'oplale,

⁶ ja'ex te sts'umbalex Abraham te abat yu'un Cajwaltic, te sts'umbalex Jacob te tsabilexe.

⁷ Ja' Cajwaltic stuquel, ja' Dios cu'untic; ja' ya smandaltes stuquel spisil te q'uinale.

⁸ Manchuc me ya xc'ax jmil ta caj ants-winiquetic, pero ma'yuc bi ora ya xch'ay stuquel te bila yaloj ta trato yu'une,

⁹ ja' te c'op xchapoj soc Abraham, te bila jc'axel yaloj ta stojol Isaac,

¹⁰ soc te ja' nix jc'axel yaloj ta stojol Jacob, ja' trato c'ot sbajt'el q'uinal ta stojol te lum Israel,

¹¹ te jich la yale: “Ya cac'bat te sq'uinal Canaán te ja' awu'un ya xc'ot”, te xie.

¹² Manchuc teme ma'yuc tsobolic a, ch'in jchajp jyanlumetic c'otic ta lumq'uinal,

¹³ te c'axic tel ta jujun nación, soc ta stojol juju-jtul muc' ajwalil.

¹⁴ Pero Dios ma ba ac'otic ta uts'inel yu'un, la scom te muc' ajwaliletique:

¹⁵ “Ma me xacontroinic te mach'atic tsabil cu'une, ma me x'awuts'inbonic te j'alwanejetic cu'une”, xi'.

¹⁶ Tey ta q'uinal la yac' taluc wi'nal, la spojbey spisil swe'elic.

¹⁷ Pero la sneeltesbey bael ta stojolic te José, ja' te la yich' chonel bael ta mosoile.

¹⁸ Ejch'enaj yacan ta chuquel ta cadena; la xojbeyic taq'uin ta snuc'.

¹⁹ Pasot ta prueba yu'un te bila albot yu'un Cajwaltic te José.

²⁰ Te muc' ajwalil te bayal mach'a swentainej, la yal mandal te ya yich' coltayel loq'uel,

²¹ la yac'bey yat'el ta ajwalil ta sna, yu'un ya swentainbey spisil sbiluc,

²² swenta yu'un ya sp'ijubtes te jwentainwanejetic soc te mamaletic yu'un te lume.

²³ Patil tal Israel ja' nix te Jacob sbiile; nain ta Egipto te ma slumaluc, nain ta sq'uinal Cam.

²⁴ Dios la yac' esmajuc te lum yu'un, c'ax jich yip c'ot yu'un a te bit'il egipcioetique.

²⁵ Pero la yac' ta controinel yu'un egipcioetic te lum yu'un; la yac' ta lo'layel te abatetic yu'une.

²⁶ Ja' yu'un te Dios la sticun te yabat Moisés, soc Aarón te tsabil yu'une,

²⁷ la yac'bey ta swentaic spasel seña yu'el, muc' soc jelawen yutsil sc'oplal bila la spasic ta sq'uinal Cam.

²⁸ Dios la sticun bael yijc'al q'uinal, ijc'ub q'uinal yu'un ta bayuc, pero te egipcioetic ma ba la yich'beyic ta muc' te sc'ope.

²⁹ La sc'atp'unbey ta ch'ich' te ja'etic yu'unic, soc la slajinbey xchayul te ja'etique.

³⁰ La yac' esmajuc xch'uch'etic ta spamal sq'uinal Egipto, asta och xch'uch'etic ta swayib te muc' ajwalile.

³¹ C'opoj te Diose, la yac' ochuc bayal jaetic soc us, pujq'uic ta spamal sq'uinal Egipto.

³² Ma la sticun ja'al, ja' la sticun bat, soc tsantsewal te ya xlem ta banti sq'uinalic;

³³ la slajinbey sts'usubil soc higueraetic; la slajinbey spisil te te'etic ta Egipto.

³⁴ C'opoj te Diose, tal bayal c'ulubetic, ma xju' ta ajtayel yu'unic.

³⁵ La slo'ic spisil wamaletic ta q'uinal, soc spisil jayeb bitic colemic.

³⁶ Soc tey ta Egipto la yac' lajuc spisil te ba alaletic yu'un te egipcioetique.

³⁷ Te Diose patil la yic' loq'uel te lum yu'un, yich'oj loq'uel oro soc plata; ta spisil ta jchajp sts'umbal Israel, ma'yuc la sta falta.

³⁸ Bin nax yo'tanic yu'un te egipcioetic te loq'uic bael te israeletique, melel bayal yacalic ta xi'el.

³⁹ Dios la slim bael tocal ta sbaic, swenta smajq'uilic yu'un; ta ajc'ubal la yac' bael c'ajc' ta stojolic yu'un la yac' sacubuc q'uinal.

⁴⁰ La sc'an swe'elic, jich ticunbotic x'ubetic; soc la snojesbey xch'ujt'ic ta waj yu'un te ch'ulchane.

⁴¹ La stop' te muc'ul tone, tey loc' tel ja' a; oquin bael ta jochol taquin q'uinal jichuc muc'ja'.

⁴² Melel tal ta yo'tan te xch'ul-c'op jc'axel yaloj soc te yabate, ja' te Abraham.

⁴³ Te Dios jich la sloq'ues te lum tsabil yu'un, yacalic ta aw loq'uel swenta yutsil q'uinal la yaiyic.

⁴⁴ Soc la yac'bey sq'uinalinic sq'uinal yantic nacionetic; la yac'bey yu'uninbey sit yawal-sts'unub jyanlumetic,

⁴⁵ teme ya yich'beyic ta muc' smandal soc teme ya xch'uunic spasel te bila ya yac' ta nopele. ¡Bin nax me yutsil te Cajwaltique!