Salmos 104 - Bible in Tzeltal de Oxchuc y Tenejapa

Yalel yutsil sc'oplal Jpaswanej

¹ Ya calbey yutsil sc'oplal Cajwaltic ta spisil co'tan. Cajwal, Dios cu'un, mero c'ax muc'at atuquel; ja' ac'u'inej te yutsil axojobil te ya xtil ta jyalele;

² potsolat ta axojobil, jich c'oem te bit'il ac'u'e. Ja'at la alich' bael jichuc pac' te ch'ulchane;

³ ja'at la awac'bey yiptajib ta sba ja' te oyetic yu'un te ana ta toyole. Ja' c'atp'ujem ta carreta awu'un te tocale; ya xbeenat ta xic' te iq'ue.

⁴ Te iq'uetic ja' jbeentesej-c'opetic awu'un; te c'ajq'uetic ya xtilic, ja' abatetic awu'un.

⁵ Ja'at la awac'bey yiptajib te balumilal, swenta yu'un mero ma stij sba ta yawil.

⁶ Te mar te najt' coel te sna'bilale, la smuc te balumilale, jich c'oem te bit'il sc'u'e; la smuc te witstiquil te ja'e.

⁷ Pero la apas ta mandal atuquel, jich bajt'; animal bajt' ta anel c'alal la yaiybat stojol ac'op, te jich c'oem te bit'il chawuc.

⁸ Mo bael ta witstiquil soc co bael ta xatlejal, tey bajt' ta yawil te la awac'bey yile.

⁹ Ta bay la awal mandal te ya xquejch'aje, ma xjelawix a, swenta yu'un ma xcha'muc xan te balumilale.

¹⁰ Ja'at ya aticunbey tel ya'lel te sloq'uibja'etic; ja' ya x'oquin bael ta muc'ja'etic ta yolil te witstiquile.

¹¹ Ja' ya yuch'ic te ja'mal chambalametic; jich ya xch'ay taquinti'il ya yaiyic te ja'mal burroetique.

¹² Ta sti'il ja'etic ya spas spechechic te mutetic ya xwilic ta toyole; ya xc'ajinic ta yolil sc'ab te te'etique.

¹³ Ja'at nix ya awac'bey tel ya'lel te witstiquile, c'alal to ta ana, ta toyol ya xtal awu'un; te tulan ya xtal ta ch'ulchan te ja'ale, jich ya sbujts'antesbey yo'tan te lumq'uinale.

¹⁴ Ja'at ya awac' ch'iuc te aquiltic ya swe'ic te chambalametic; soc ya awac' ch'iuc te awalts'unubil te ya xtuun yu'un te ants-winiquetic te ya sloq'ues a te swe'ele,

¹⁵ ja' te waj te ya x'ac'bot yip yu'un, soc te vino te ya xbujts'naj yo'tan yu'un, soc te aceite te ya x'ach'ub yelaw yu'un.

¹⁶ Ya xch'ab taquinti'il ya yaiyic te te'etic, ja' te cedroetic ta Líbano te la sts'un te Cajwaltique.

¹⁷ Tey ya yac' spechechic a te ch'in ja'mal mutetic; soc ta tajaltic nainemic te muc'ul chex'acan smutil ja'etique.

¹⁸ Ta toyol witstiquil ya xnainic te ja'mal tentsunetic; ta muc'ul tontiquil ya snac' sbaic te cojt'ome.

¹⁹ La apas te u ta swenta sp'isjibal tiempo; te c'aal ya sna' te bi ora ya sc'an xch'ay baele.

²⁰ Ya alich' tel jichuc ijc'al pac' te ajc'ubale, jich ya xloc' tel te ja'mal chambalametic.

²¹ Te león-chojetic ya x'awunic yu'un te yacuc staic ti'bal sti'ic; ya sc'anbeyic Dios te yacuc x'ac'bot swe'elic yu'une.

²² Yan te c'alal ya xloc' tel te c'aale, ya xbajt'ic, ya xba smejts'an sbaic ta bay nailch'entiquil.

²³ Jich ya xloc' tel te ants-winiquetic, ya x'ochic ta at'el, ya x'at'ejic ja' to c'alal smalel c'aal.

²⁴ Cajwal, ma p'isbiluc nax te bitic apasoje. Ta spisilic la apas soc sp'ijil awo'tan; nojelic ta balumilal spisil te bitic la achicnantese.

²⁵ Tey ay te mar te muc' sjamalul soc snajt'il, ta bay ya x'esmajic muc'ul chambalametic soc ch'in chambalametic te ma xju'ix ta ajtayele.

²⁶ Tey ya xbeenic a te barcoetic, soc tey ay a te Leviatán, ja' te chambalam te c'ax muc' ta jyalel te la apas, yu'un ya xtajinat soque.

²⁷ Ta spisilic ya smaliyat yu'un ya awac'bey swe'elic ta mero yorail.

²⁸ Ja'at ya awac'bey, jich ya stamic; ya awac'bey ta ac'ab, jich ya xnoj xch'ujt'ic ta lec.

²⁹ Teme ya anac' asit-awelaw ta stojolic, ya xiwic; teme ya apojbey te ic' yu'unic, ya xlajic, jich ya xcha'sujt'ic ta ts'ubil lum ta yan buelta.

³⁰ Yan teme ya awac'bey te ic' yu'un te xcuxlejale, jich cuxul ya xjil; soc jich ya x'ach'ub yutsilal awu'un te balumilale.

³¹ Te yutsil xojobil Cajwaltic sbajt'el q'uinal ay; bin nax yo'tan yu'un te bitic la xchicnantese.

³² Te balumilal ya xnijc' te c'alal ya yil stuquele; ya yac' loc'uc ch'ail ta witstiquil te c'alal ya stij stuquele.

³³ Te jayeb c'aal cuxulon bael ta q'uinal soc jcuxlejal, ya jc'ajintay Cajwal, te Dios cu'une.

³⁴ Te ayuc bit'il lec yo'tan Cajwal yu'un te bila ya jnop ta co'tan, melel ja' nax stuquel te tey ya jta sbujts' co'tan ae.

³⁵ Ac'a tup'uc ta jc'axel ta balumilal te jmulawiletique; ac'a ch'ayuc ta jc'axel te mach'a amenique. Ya calbey yutsil sc'oplal Cajwaltic ta spisil co'tan. Bin nax yutsil te Cajwaltique.