Salmos 103 - Bible in Tzeltal de Oxchuc y Tenejapa

Ya calbey yutsil sc'oplal Cajwaltic

¹ Ya calbey yutsil sc'oplal Cajwaltic ta spisil co'tan; ta spisil jch'ulel ya calbey yutsil sc'oplal te xch'ul-biile.

² Ya calbey yutsil sc'oplal Cajwaltic ta spisil co'tan; ma ba ya jch'ay ta co'tan te jc'uxtayel yu'une.

³ Ja' te ya spasbon perdón yu'un spisil te bitic ma lecuc jpasoj; ja' te ya slamantesbon spisil te jchamel;

⁴ ja' te ya yac'bon ta libre jcuxlejal te ma xboon ta muquenal; ja' te mero c'ax nojel xc'uxul yo'tan ta jtojol soc te t'ujbil ya xc'uxtayone;

⁵ ja' te lec ya snojesbon jch'ujt'; soc ja' te ya x'ach'ubon yu'un jich bit'il águila.

⁶ Te Cajwaltic ya xchajban ta smelelil te mach'atic ya xwoclajic yu'un te uts'inele.

⁷ La yac'bey yil te sbe soc te yat'el ta stojol Moisés soc ta stojol lum Israel.

⁸ Te Cajwaltic t'ujbil yo'tan, soc ya sna' yo'bolil jbatic; sts'icojbotic jboliltic soc ay xc'uxul yo'tan ta jtojoltic spisil ora.

⁹ Ma'yuc bay tulan comel ya quich'tic yu'un spisil ora; ma sbajt'eluc q'uinal ilinem.

¹⁰ La yac'botic jtojtic te jmultic soc te bitic ma lecuc jpasojtic, pero ma ba staoj jich te bit'il ya sc'ane.

¹¹ Mero muc' xc'uxul yo'tan ta stojol te mach'atic ya yich'ic ta muc', jich bit'il muc' sjamalul ch'ulchan ta sba te balumilale.

¹² Te mulil cu'untic q'uejel la yac'botic bael ta jtojoltic, jich najt' yac'oj bael bit'il snajt'il yiloj sba soc sloq'uib c'aal te smalib c'aale.

¹³ Te Cajwaltic ay xc'uxul yo'tan ta stojol te mach'atic ya x'ich'ot ta muc' yu'unic, jich bit'il tatil te c'ux ya yaiy ta yo'tan te snich'nabe.

¹⁴ Ja' ya sna' stuquel te bila pastajemotic a; ya sna' ta lec te bit'il ts'ubil lumotique.

¹⁵ Te jcuxlejaltic jich c'oem bit'il ac, ya xnichin jich te bit'il ja'mal nichime;

¹⁶ pero ora nax ya xmajot ta ic', jich ya xch'ay ta jc'axel, soc ma'yuc mach'a ya sna' xan te nichime.

¹⁷ Yan te xc'uxul yo'tan Cajwaltic, sbajt'el q'uinal ay ta stojol te mach'atic ya yich'ic ta muq'ue; te stojil yo'tan ma'yuc slajibal ta stojol spisil ta cajalcaj te alnich'anetic,

¹⁸ ja' te mach'atic ya sna'ic spisil ora te trato yu'un, soc te ma xch'ay ta yo'tanic xch'uunel te smandale.

¹⁹ Te Cajwaltic yac'oj smuc'ul nactijib ta ch'ulchan; ja' muc' ajwalil yu'un smandaltesel ta spisil.

²⁰ Albeyaic yutsil sc'oplal Cajwaltic ja'ex ch'ul abatetic te tulan ay awat'elique. Ja'ex te ya ach'uunic spasel te bila ya yalbeyexe, melel awat'elinejic xch'uunel smandal.

²¹ Albeyaic yutsil sc'oplal Cajwaltic apisilic te abatexe, te ayex ta abatinel yu'un soc te ya apasbeyic te sc'anjel yo'tane.

²² Albeyaic yutsil sc'oplal Cajwaltic ta spisil te bitic chicnajem yu'un, soc spisil ta jchajp ta bay swentaineje. Ya calbey yutsil sc'oplal Cajwaltic ta spisil co'tan.