Salmos 102 - Bible in Tzeltal de Oxchuc y Tenejapa

Ya sc'opon Dios mach'a ay swocol

¹ Cajwal, aiybon awaiy stojol te ya jc'oponate; ya me awac' te ya xc'ot ta atojol te cawe.

² Ma me xanac' asit-awelaw ta jtojol te c'alal ya ataon te ayon ta woclajele; c'uxtayawon, aiybon awaiy stojol te jc'ope; ya me ajac'bon jc'op ta ora te c'alal ya jc'oponate.

³ Te jcuxlejal jich ya xtub bael bit'il ch'ail; te jbaquel jich yacal ta tilel yaiyel te bit'il ac'ale;

⁴ te co'tan ma'yuquix yip ta jyalel, yac ta bacubel jichuc ac. Ma'yuquix bi ya sc'an co'tan; ma xmalix te jwe'ele.

⁵ Te jnujc'ulel la slap'ix sba soc jbaquel ta scaj te bayal te ya x'ajc'anajone.

⁶ Jich c'oemon te bit'il xcuj-mut ta jochol taquin q'uinal; jich c'oem bit'il xcuj-mut te ya xnain ta antiguo ts'ajq'uetique.

⁷ Ma xwayonix; jichon te bit'il mut ta jol na te stuquel aye.

⁸ Te jcontrotac ya yuts'inonic spisil ora; soc ja' ya stuuntesic ta bolc'optaywanej te jbiile.

⁹ Ja' we'elil c'oem cu'un te tan yacon ta slo'ele; te bila ya cuch'e capalix soc ya'lel jsit,

¹⁰ ta scaj awilimba soc sc'ajc'al awo'tan. La atoyesbon jc'oplal swenta yu'un ya ach'ojon coel ta patil.

¹¹ Te jcuxlejal jc'axel nax ay jichuc axinal; yacalon ta bacubel jichuc ac.

¹² Yan te ja'ate, Cajwal, muc' ajwalilat sbajt'el q'uinal; ma'yuc bi ora ya xlaj ac'oplal ta na'el atuquel.

¹³ Jajch'an tel, na'beya yo'bolil sba te lum Sión, melel c'ot meix sc'aalelal; yorailix te ya apasbey perdón.

¹⁴ Te abatetic awu'un c'ux ta yo'tanic te tonetic yu'un Sión; c'ux ya yaiyic ta jyalel te bit'il jinemixe.

¹⁵ Spisilic te muc' ajwaliletic yu'un nacionetic ta balumilal ya me yich'beyic ta muc' yutsilal te Cajwaltique.

¹⁶ C'alal ya yich' cha'pasel te lum Sión, ya me xchicnaj yutsilal.

¹⁷ Soc c'alal ya sc'opon Dios te mach'a pijt'eme, ya me x'aiybot stojol sc'op te ya yalbeyic wocole.

¹⁸ Ya me yich' ts'ibuyel jilel ta swenta cajalcaj bael te patil alnich'anetique; swenta yu'un jich me ya yalbeyic yutsil sc'oplal Cajwaltic te mach'atic ya x'ayinic baele.

¹⁹ Te Cajwaltic la yil tel c'alal to ta ch'ulchan te balumilale, c'alal ta toyol ta bay ch'ul awilal yu'un,

²⁰ swenta yu'un ya scoltay te mach'a ayic ta ajc'an ta chuquel, soc ya yac' ta libre te mach'atic quecheliquix ta lajele.

²¹ Jich yu'un ta Sión, ja' te lum Jerusalén, ya me yich' puquel yutsil sc'oplal Cajwaltic

²² te c'alal ya stsob sbaic tel spisil yajwal nacionetic te ya squejan sbaic ta stojole.

²³ Ja' la spojbon quip ta olil be; com la yac'bon te jcuxlejale.

²⁴ Jich yu'un la calbey: “Dios cu'un, ma me oliluc to nax ay jcuxlejal a te ya awic'on baele”, xoon ta stojol. Te ja'wiletic awu'un ma'yuc slajibal.

²⁵ Ja'at la awac'bey yiptajib te balumilal ta xjajch'ibal; ja'at nix atuquel la apas te ch'ulchane.

²⁶ Ta spisilic jc'axel ya xlajic stuquelic, yan te ja'at atalel cuxul ya xjilat atuquel. Spisilic c'unc'un ya xlajic ta jc'axel jichuc c'u'il; ja'at nix ya ajeltay, jich jeltaybil ya xjil awu'un, jich c'oem te bit'il mach'a ya sjeltay te sc'u'e.

²⁷ Ja'uc me to, atalel ayat atuquel; te ja'wiletic awu'un ma xlaj stuquel.

²⁸ Jich jun nax yo'tan ya x'ainic awu'un te sts'umbal te abatetic awu'une; ja'at atuquel ya anajc'an ta atojol.