Salmos 101 - Bible in Tzeltal de Oxchuc y Tenejapa

Te muc' ajwalil la yal ta jamal sc'op ta stojol Dios

¹ Ya jc'an ya calbey yutsil sc'oplal te xc'uxul awo'tan soc te toj awo'tan atuquele; Cajwal, ya jc'an jc'ajintayat.

² Ya jc'an toj ya x'ainon ta q'uinal. ¿Bi ora ya xtalat ta jtojol? Ma'yuc bila amen jpasoj, ni ta jna;

³ ma me xju' ya cac' jsit ta stojol te bila amene. Ya quilaybey yat'el te mach'atic ma junuc yo'tan ta stojol Dios; ma me xcac' xtal ta jtojol.

⁴ Ma me sc'an co'tan ta jyalel te bila ma lecuc ta pasel; ma jc'an jpas ni jtebuc te bila amene.

⁵ Ya me jcom te mach'atic muquen ya slebeyic smul te spat-xujq'ue; ma jc'an te mach'a toyba, soc te muc' ya yac' sbae.

⁶ Ja' ya cac' bael jsit ta stojol te mach'atic jun yo'tanic, swenta yu'un joy me jba soc; ja' nax me ya yac' sba ta abatinel cu'un te mach'a toj ay ta q'uinal soc te xcuxlejale.

⁷ Yan te mach'a ay lo'laywanej ta yo'tan, ma'yuc yawil ta jna te ajwalilone; ma'yuc ni jtuluc te mach'a ya spas lot te ya xju' x'ain ta jtojole.

⁸ Jujun c'aal yac ta ch'ayel bael cu'un ta spisilic te mach'atic amenic ta jlumale; ya me jch'oj loq'uel ta bay muc'ul lum yu'un Cajwaltic ta spisilic te mach'atic amen yat'elique.