Salmos 100 - Bible in Tzeltal de Oxchuc y Tenejapa

Cajwaltic la spasotic, yu'unotic

¹ C'ajintayaic soc yutsil awo'tanic te Cajwaltic, ja'ex te nainemex ta spamal te balumilale.

² Socuc me yutsil awo'tanic ya aquejan abaic ta stojol Cajwaltic; ¡awunanic, binuc nax me awo'tanic te ya xtalex ta stojole!

³ Na'beyaic sba te Cajwaltic te ja' Dios stuquele. Ja' la spasotic, ja' yu'unotic; lumotic yu'un, soc chijotic c'oem te yac'ojotic ta yax aquiltic yu'une.

⁴ La'ic ta bay te ti'nailetic yu'une, ochanic ta templo, ya jc'ajintaytic c'ayojetic ta yalel yutsil sc'oplal soc ta yalel wocol. Albeyaic wocol, albeyaic yutsil sc'oplal te yo'tane.

⁵ Melel te Cajwaltic mero lec yo'tan stuquel. Te xc'uxul yo'tane sbajt'el q'uinal ay; soc te bit'il jun yo'tan ta jtojoltic, ma'yuc slajibal yu'un.