Salmos 10 - Bible in Tzeltal de Oxchuc y Tenejapa

Sc'anel coltayel ta stojol Dios

¹ Cajwal, ¿bi yu'un te q'uejel ya awac' abae? ¿Bi yu'un te ya anac' aba te c'alal yorail a te uts'inele?

² Ta scaj stoybail te mach'a amen yo'tane ya snuts soc sc'ajc'al yo'tan te mach'a peq'uele; ja'uc me to, ja' nix chucul ya xjil ta syac te spasoje.

³ Te mach'a amen yo'tan ya stoy sba yu'un te bila ya sc'an yo'tane; te mach'a jbic'tal-o'tan ya sbolc'optay soc ya yilay te Cajwaltique.

⁴ Ya nax yixlan sni' ta ixta c'op, soc jich ya yal: “Ma'yuc Dios; ma'yuc ich'el ta c'op”, xi'. Jich ya snop ta yo'tan.

⁵ Puersa ay bila ya xloc' yu'un a te bila ya spase. Yan te bitic tojtesel awu'une, c'ubul c'oem ya yaiy, c'ubul c'oem ta sit stuquel. Ya slaban te scontrotac,

⁶ soc ya yal ta yo'tan te ma'yuc mach'a ya xcomot yu'une, te ma'yuc bi ora ay swocol yu'un ta sc'ope.

⁷ Ja'uc me to, nojel ta ye bol c'opetic, lotetic soc lo'laywanej; muquen ay ta yo'tan te uts'inwanej soc te bitic amene.

⁸ Ya xmaliywanic ta ch'in lumetic, muquen ya smil te mach'a ma'yuc smule. Yac'oj sit ta stojol te mach'a ma sna' scoltaybel sbae.

⁹ Jich yilel te bit'il león-choj ta bay snailch'ene, snac'oj sba ta yilel a te me'bae, yac ta smaliyel, yu'un ya slumtay. Te c'alal ya xju' yu'un syaquele, ya stas bael.

¹⁰ Ya scojt'an sba ta sc'olel, jich me ya x'ipaj ta c'abal te mach'a ma sna' scoltaybel sbae.

¹¹ Te mach'a amen yo'tan ya scuy te ma xna'bot yu'un Dios te yat'ele, scuyoj te smucoj yelaw te Diose, te xujt' ma xyil ta sc'ope.

¹² Jajch'an, Cajwal, toya moel te ac'abe. Ma me xch'ay ta awo'tan te mach'atic ay swocolic.

¹³ Dios cu'un, bi yu'un ya yaiyic labanwanej te mach'atic amenique, yac ta yalel ta yo'tanic te ma'yuquic ta ich'el ta c'ope.

¹⁴ Ja'at awiloj atuquel te slab yo'tanic te bit'il amenique; ja'at awiloj soc ya awac'bey stoj. Ja'at ya awic' ta atojol te mach'atic ma sna' scoltaybel sbaique; ja'at jcoltaywanejat yu'un te me'ba alaletique.

¹⁵ C'asbeya sc'abic te mach'atic amenique. Ich'beya sc'opic yu'un te bila amen spasojique, ja' to c'alal ma'yuc bila quechel ya xjil ta swentaic.

¹⁶ Te Cajwaltique Muc' Ajwalil sbajt'el q'uinal; te mach'atic ma'yuc ta stojol Dios, ya xch'ayic bael ta stojol.

¹⁷ Cajwal, ya awaiybey stojol sc'op te ya sc'oponat te mach'atic peq'uelique, ja'at ya awac'bey yip yo'tan, soc ya awentain.

¹⁸ Chajbana te mach'a me'ba alaletic soc te mach'a uts'inbile; te ants-winiquetique te pasbilic ta ts'ubil lum, ma'yuc bi ora ya xcha'jajch'esic xan te xiwteswaneje.