Salmos 1 - Bible in Tzeltal de Oxchuc y Tenejapa

LIBRO 1 Ay yutsil ta melel

¹ Bin nax me yutsil te ants-winic te ma st'unbey sbe te mach'atic amen yo'tanique, te ma sc'ainbey yat'elic te mach'atic yat'elinejic sleel smulique, soc te ma junuc yo'tan sba soc te mach'atic ya slabanic te Diose,

² te ja' bin nax yo'tan yu'un smandal te Cajwaltique, te ja' nax baem ta yo'tan snopilayel ta c'aal ajc'ubal.

³ Jich c'oem te bit'il te' te ts'unbil ta ti'muc'ja', te ya yac' sit ta yoraile soc te ma xlubaj te yabenale. Spisil te bila ya spase lec ya xc'ot ta loq'uel.

⁴ Ma jichuc stuquelic te mach'atic amen yo'tanique, jichic me te bit'il sulil trigo te ya xlicotic bael yu'un ic'.

⁵ Jich yu'un te mach'atic amen yo'tanique ya x'ac'bot stojic te c'alal ya sta yorail te ya x'albot te smulique; te mach'atic ay smulic ma x'ac'otic ochel ta bay te mach'atic lec yo'tanique.

⁶ Te Cajwaltique ya scanantay ta beel te mach'atic lec yo'tanique, yan te mach'atic amen yo'tanique sbelal ch'ayel ya xbajt' stuquelic.