Proverbios 9 - Bible in Tzeltal de Oxchuc y Tenejapa

Te p'ijil-o'tanil ma pajaluc soc bol-o'tanil

¹ Te p'ijil-o'tanil la spas sna; la yac'bey juqueb oyetic.

² La smil chambalametic yu'un ya spas q'uin, la xchajban buen lequil vino, soc la xchajban smesa.

³ La sticun criadaetic yu'un ta aw c'alal ta stoyolil te lume:

⁴ “La'ic me, queremetic te ma'yuc bi x'ana'ique”, la yut. Jich la sticunbey ta alel xan te mach'atic ma sna' stsajtayel sbaique:

⁵ “La', we'bonic te we'elil cu'un, soc la', uch'anic te vino chapal cu'une.

⁶ Ijq'uitayaic te ma x'ana'ic stsajtayel abaique, jich me ya xcuxinex; jich me xbeenex te bit'il mach'atic ay sp'ijil sjole”, la yut.

⁷ Teme ya ac'an ya atojtes te mach'a ma stsajtay sba, soc te mach'a amen yo'tane, ja' nax ya ata bolc'optayel soc labanel yu'un.

⁸ Tac'uya te mach'a ma stsajtay sbae, ja' me atojol ya xc'ot yu'un te ya yilintayate; tojtesa te mach'a ay sp'ijile, ja' me atojol ya xc'ot yu'un stuquel te c'uxat ta yo'tane.

⁹ Albeya te mach'a p'ije, ya me xp'ijub xan yu'un; p'ijubtesa te lequil winique, ya me x'esmaj xan sp'ijil yu'un.

¹⁰ Te xjajch'ibal te p'ijil-o'tanile ja' te yich'el ta muc' te Cajwaltique; teme ya ana'bey sba te Ch'ul Diose, yu'un me ay sp'ijil ajol abi.

¹¹ Ja' nix ta swenta te p'ijil-o'tanil te bayal ja'wil ya xcuxinat yu'une, jich me ya xnajt'aj xan bael aworail yu'un.

¹² Teme ay ap'ijile, ya me awaiybey yutsilal; yan teme ma ba ya atsajtay abae, ya me awil awocol yu'un stuquel.

¹³ Te mach'a ma sna' q'uinal, pajal soc ants te chican nax bila ya yale, mero bol soc te ma'yuc bila ya sna'e.

¹⁴ Ya snajc'an sba ta silla ta sti' sna, ta banti stoyolil te slumale,

¹⁵ ya yic' te mach'atic yacalic ta beel ta lequil be:

¹⁶ “La'ic me, queremetic, te ma'yuc bi x'ana'ique”, ya yut. Ya sticun ta alel te mach'atic ma sna' stsajtayel sbaique:

¹⁷ “Te elc'anbil ja'e, ja' mero bujts'an; te bila muquen we'bile, ja' mero chi'”, xi'.

¹⁸ Pero ma ba ya sna'ic bit'il c'oemic te mach'atic ic'otiquix bael yu'une, melel yo'tic ayiquix ta sc'ubulil yawil te lajele.