Proverbios 8 - Bible in Tzeltal de Oxchuc y Tenejapa

Ya xc'opoj te p'ijil-o'tanile

¹ Te p'ijil-o'tanil yac ta c'op; te p'ijil jolol ya yac' ta aiyel te sc'ope.

² Ya stejc'an sba ta mero sba tseletic, ya xjalaj ta c'op ta banti ay jujun jetbeetic,

³ ya yac' sba ta aiyel ta xujc' ti'nailetic, ja' te ayic ta yochibal lum, jich ya yal:

⁴ “Winiquetic, ja'ex awu'unic te jc'op ya cal ta ora in to.

⁵ Queremetic, te ma'yuc bila ana'ojic, nopaic stsajtayel abaic; te ja'ex te ma x'ana'ic q'uinale, na'beyaic swentail ta lec te bit'il ya x'ainexe.

⁶ Aiybon awaiyic jc'op, yu'un mero toyol yutsil te bila ya calbeyexe, soc ja' ya xloc' ta que te bila mero stojil soc yich'oj swentail ta alele.

⁷ Te bila ya calbeyexe, mero smelelil; jo'on ma jmulan yalel lot.

⁸ Spisil te jc'ope, mero stojil ay; ma'yuc jxujt' lot tey a.

⁹ Te mach'a ay sp'ijil sjol soc te ay sp'ijil yo'tane, jamal chican ta aiyel ya yaiy stuquel te jc'ope.

¹⁰ Ma me ja'uc x'ac'anic te t'ujbil plata, soc ma me ja'uc x'ac'anic te t'ujbil oro; ja' me x'ac'anic te tojtesel soc te p'ijubtesele”, xi' te p'ijil-o'tanile.

¹¹ Ja' mero toyol sc'oplal te p'ijil-o'tanile, ja' peq'uel sc'oplal te t'ujbil tonetique; ni ja'uc pajal soc te bila mero t'ujbilic te awo'tanuc ay awu'une.

¹² Soc jich la yal xan: “Jo'on te jp'ijil-o'tanile, joy jba soc te p'ijil-jolole, ya xju' cu'un ya cac' ta na'el te mero lequil consejo.

¹³ Te yich'el ta muc' te Cajwaltique, ja' te scontroinel te bila amene. Jo'on ya quilay te toyba-o'tanil soc te toybaile, soc te be te amene soc te pas-lote.

¹⁴ Jo'on ay ta jwenta te bila lec ya yich' chapele, jo'on ya cac' c'otuc ta pasel, jo'on te chajbajibalon soc te ay quipe.

¹⁵ Jo'on ta jwenta te ya xju' yu'unic mandalteswanej a te muc' ajwaliletique, soc te ya xchajbanic te leyetic yu'unic te jmandalteswanejetique.

¹⁶ Jo'on ta jwenta te ch'uunbil smandalic te jwentainwanejetic yu'un te lume, jo'on ta jwenta te ya xchucawanic soc te ma xchucawanic te mach'atic yich'oj yat'elique.

¹⁷ Jo'on c'ux ta co'tan te mach'a c'uxon ta yo'tane, te mach'atic ya sleonic ya me staonic.

¹⁸ Jo'on ya cac'bey sc'ulejal soc ya cac' lecubuc sc'oplal; ya cac' te muc' sc'oplal ya xc'ot soc ya cac' esmajuc xan sbiluc.

¹⁹ Te bila ya cac' jo'on, c'ax jich yutsil a te bit'il yutsil te oro yich'oj pasele; te bila ya cac' jo'on, c'ax jich yutsil a te bit'il plata te mero t'ujbile.

²⁰ Te jo'on ya xboon ta toj be, ja' te sbelal te toj-o'tanile.

²¹ Te mach'atic c'uxon ta yo'tanique, ya me cac'bey te bitic ya xc'ot ta swentaique; ya me jnojesbey snaic ta c'ulejaliletic.

²² “Jo'on la spason ta xjajch'ibal yat'el te Cajwaltique, ja' te c'alal ma to ba sjachoj spasel spisil a te bitic aye.

²³ La spason ta xjajch'ibal, te c'alal ma to ba spasoj a te balumilale.

²⁴ La snich'nantayon te c'alal ma to ayuc a te muc'ul maretic, te c'alal ma to ayuc ya xt'om loq'uel a te niwac ja'etic soc te sloq'uibja'etique.

²⁵ Te c'alal ma to ayuc a te ch'in witsetic soc c'alal ma to ayuc a te niwac witsetique, te Cajwaltic la snich'nantayonix a te jo'one;

²⁶ ma to ba spasoj a te balumilal soc spamlejetic te la snich'nantayone, soc ni ja'uc ay te ts'ubil lum yich'oj pasel a te balumilale.

²⁷ Te c'alal la xchajbanbey sjamalul ch'ulchan ta sba te ja'etic yu'un te mero muc'ul mar, tey ayonix a te jo'one.

²⁸ Te c'alal la xchajban tocaletic ta ch'ulchan, soc te c'alal la yac'bey yip te ja'etic yu'un te mero c'ubul mar,

²⁹ te c'alal la yalbey mandal te ja'etic yu'un mar te ma xju' ya xmal loq'uel ta sti'ile, soc te c'alal la yac'bey yiptajib te balumilale,

³⁰ tey mero jun co'tan ayonix ta xujc' a. Jo'on spisil ora mero yutsilon yo'tan, spisil ora tajinon ta stojol;

³¹ la jmulan tajimal ta balumilal te pasbil yu'une, bin nax co'tan yu'un te ants-winiquetique.

³² “Yo'tic, cal-jnich'an, aiybon awaiyic jc'op; nopbonic co'tan, jich me bayal awutsil ya xc'oex a.

³³ Ac'a achiquinic a te p'ijubtesele; ma me xach'ayic te p'ijil c'ope.

³⁴ Bin nax me yutsil te ants-winic te ya yaiybon te jc'ope, soc te spisil ora jujun c'aal ya yilon ta sti' te jnae.

³⁵ Melel te mach'a ya staone, la me sta xcuxlejal stuquel; soc ya yac' lecubuc yo'tan ta stojol te Cajwaltique.

³⁶ Pero te mach'a ya sloq'ues sba ta jtojole, ya me x'och ta swenta lajel stuquel; te mach'a ya yilayon, ja' me c'ux ta yo'tan a te lajele”, xi' te p'ijil-o'tanile.