Proverbios 7 - Bible in Tzeltal de Oxchuc y Tenejapa

Sp'ijil smaña ants ya sle yajmul

¹ Jnich'an, ch'uunbon me te jc'ope; q'ueja me ta ajol, q'ueja me ta awo'tan te mandaliletic cu'une.

² Ch'uunbon me te mandaliletic cu'un soc te p'ijubtesel cu'une; canantaya me, jichuc me ta awo'tan te bit'il xch'ulel asite, jich me ya xju' ya xcuxinat.

³ Chuca me ta ac'ab c'oem, ts'una me ta ajol, ts'una me ta awo'tan.

⁴ Jichuc me ta awo'tan te bit'il awix te p'ijil-o'tanile; ja'uc me jun awo'tan aba soc te p'ijubtesele.

⁵ Ja'ic me te ya scoltayat ta sc'ab te ants te ya spas mulweje, te jchajp sc'op ya xlo'laywan soc te ay smaña ta lo'laywaneje.

⁶ Ay jun c'aal yacon ta yilel ta sventanaul jna,

⁷ ay queremetic te ma'yuc bila sna'ojique, la quil te jtul sjoyic, ja' te mach'a ma sna' stsajtaybel sbae.

⁸ C'alal c'ot ta xujc' calle, la xch'uy c'axel, bajt' ta stojol te banti ay sna te antse.

⁹ Yaquix ta malel bael c'aal a, yaquix ta ijc'ubel bael q'uinal a.

¹⁰ Ora nax loc' tel ta tael yu'un te antse, buen xch'aloj sba jich te bit'il jmulawil ants.

¹¹ Te antse biluc nax ya sjajch'es yaiyej a, soc chican nax yo'tan bi ya smulan yalel. Ma sc'an ya x'ain ta sna;

¹² ya xbeen ta calleetic, ta banti bayal ya stsob sbaic soc ta jujun xujc' calle, ya smaliy ya slo'laybey yo'tan te mach'a sbabial ya xtal ya yile.

¹³ Te antse la smey soc la sbujts'iy te quereme, soc ma'yuc xq'uexlal c'opoj, jich la yalbey:

¹⁴ “Te jo'one wojey cha'jey la jchap te ya cac' milbil majt'anil swenta lamal-o'tanil, nax to nax c'ot ta pasel cu'un te bila jchapoje.

¹⁵ Ja' yu'un loc'on tel jtabelat; co'tanuc xquilat, pero la jtaatix.

¹⁶ Ta jwayib la jlimix jilel buen t'ujbil tsots pasbil ta lino talem ta Egipto.

¹⁷ La cac'beyix perfume, ja' te buen smeset yiq'ue: mirra, áloe soc canela.

¹⁸ La', jlajintic c'alal ta sc'ubulil te mulanele; la', jmulan jbajtic, ya me jpastic yutsil co'tantic c'alal ta sacubel q'uinal.

¹⁹ Melel te jmamlale ma ba ay ta jna, loq'uem bael, c'ubul baem.

²⁰ La yich' bael jun bolsa staq'uin, jich ma ba ya sujt' tel ta ora, ja' to ya sujt' tel a teme la yich' syijil te ue”, xi' te antse.

²¹ Ta scaj te buen t'ujbil ta aiyel te sc'ope, ju' yu'un la yu'uninbey yo'tan te quereme.

²² Jich ma'yuquix bi yan la yal, la sts'aclin bael te antse. Ja' pajal soc te wacax ya xbajt' ta banti ya yich' milele, soc jich te bit'il chij te ma ba sna'oj te chapal te syaquile,

²³ te ora nax ya xjatbot yo'tan yu'un yat'ejibal t'imalte', soc jich te bit'il ja'mal mut ya xwil ochel ta yutil te yaquile, ma ba ya sna' teme ja' slajib ya xc'ote.

²⁴ Ja' yu'un jiche, jnich'an, aiybon awaiy te jc'ope, ac'a me achiquin a.

²⁵ Ma me xawac' xjowej awo'tan te antse; ma me xawac' aba ta ch'ayel ta scaj st'unel bael.

²⁶ Melel bayal me mach'atic yejch'entesejix swenta lajel; ma ajtaybajix te mach'atic yac'oj ta lajele.

²⁷ Teme la at'unbey te sbelal sna, ja' me at'unojbey sbelal a te lajele.