Proverbios 6 - Bible in Tzeltal de Oxchuc y Tenejapa

Teme ay mach'a ya atejc'an aba ta stojel sbet

¹ Jnich'an, teme ay ya atejc'an aba ta stojel sbet te mach'a c'ux ta awo'tane, o teme ya awentainbey sbet te mach'a ma x'ana'bey sbae,

² ja'at ni me la achajban apejts'ul abi, soc ja' ni me ya stsacat jilel te ac'ope.

³ Jnich'an, te bi ya awut ya acoltay aba te bit'il ayat ta c'abal yu'un te yane, jich me xapas: Cujch'uc me awu'un te q'uexlale, baan, ila awil te mach'a c'ux ta awo'tane.

⁴ Ma me xway awo'tan, ma me xacux awo'tan ni jtebuc;

⁵ coltaya me aba, jich te bit'il ya x'an chij ta stojol jnutsojele; anan me, jich bit'il ya x'an ta xi'el pejts' te ja'mal mute.

Tac'uyel ta stojol jch'ajetic

⁶ Jch'ajetic, baan, ila awil te ts'isimetique, ila awil bila yacalic ta spasel, nopa te p'ijubtesel yu'unique:

⁷ manchuc me ma'yuc mach'a ya xpasotic ta mandal yu'un, soc ni ayuc mach'a ya x'albotic yu'un te bila ya spasique,

⁸ pero ta yorail verano ya spas sc'alic c'oem, c'alal ta yorail c'ajoj, ya stsob swe'elic.

⁹ Jch'ajetic, tic'anix a te wayele. Tic'anix a te metsleje.

¹⁰ Te c'alal yacat ta waichejel a, te c'alal yacat ta nicbajel a, soc te apetoj ac'ab yu'un yutsil te awayele,

¹¹ te me'bail ya me xjul ta atojol ya me slajinat jichuc j'elec' te chapal soc yat'ejib yu'un milaw.

Bi yilel amen-o'tan

¹² Te mach'a amen yo'tan te j'ixta-o'tane, yat'elinej yalel puro lot.

¹³ Ya xmuts'-sitaywan, ya spasbey seña ta yacan, soc ya spas seña ta ilel ta yal sc'ab.

¹⁴ Puro ixta-o'tanil snopoj te yo'tane, ja' mero snopoj ta yo'tan te ya spas te bila amene, soc ja' baem ta yo'tan sleel bi ya yut ya sjach c'op.

¹⁵ Ja' yu'un, ajc' nax me ya xtal te wocol ta stojole; jich nax te bit'il ya smuts' sba te jsitique, jc'axel me jinem ya xjil, jc'axel ma xju' ta comel.

Te bila yilayej Cajwaltic

¹⁶ Ay waqueb ta jchajp, asta juqueb, te bila jc'axel yilayej te Cajwaltique:

¹⁷ Ja' te mach'a chican ta sit-yelaw te stoyoj sbae, ja' te mach'a ya spas lot, ja' te mach'a ya smil mach'atic ma'yuc smulic,

¹⁸ ja' te mach'a te ya xchajban bitic swenta ixta-o'tanil, ja' te mach'a te bin nax yo'tan ya x'animaj ta spasel te bila amene,

¹⁹ ja' te lotil testigo te ma meleluc te bi ya yale, soc te mach'a ya sjach majtomba ta stojol yermanotac.

Te mulwej ya yac' wocol

²⁰ Jnich'an, spisil me ora xaq'uej ta ajol te mandaliletic soc te p'ijubtesel yu'un te ame'-atate.

²¹ Ich'a me ta awo'tan spisil ora, chuca me ta sjoyobal anuc' c'oem;

²² ya me stojtesat te c'alal yacat ta beele, ya me scanantayat te c'alal wayalate, ya me xc'opojat soc te c'alal ya xjajch'at ta wayele.

²³ Ta mero melel, te mandaliletic soc te jp'ijubteseltic ja'ic tsumbil lámpara c'oemic; te tojtesel soc te tac'uyel ja'ic te be yu'un te cuxlejale.

²⁴ Ya me scoltayat ta sc'ab te jbol-o'tan antse; ma me xyac'at ta tsalel yu'un te st'ujbil c'op te yan antse.

²⁵ Ma me xawac' slo'laybat awo'tan te st'ujbilale; ma me xawac' stsalat te sit-yelawe.

²⁶ Te jmulawil ants, ta scaj swe'el te jich ya spase; pero te ants nujbinem te jich ya spase, scaj xanix ya smulan te lequil winique.

²⁷ Te mach'a ya yac' c'ajc' ta stan, puersa me ya xc'ajc' sc'u' yu'un.

²⁸ Te mach'a ya xbeen ta ba ac'ale, ya me xchic'bot yacan yu'un.

²⁹ Te mach'a ya slo'lay sba soc yan ants, ma xju' te libre ya xloq'ue.

³⁰ Ma'yuc mach'a ya yilay te j'elec' te ya x'elc'aj ta scaj swi'nale.

³¹ Pero teme yac ta elec' a te ya xtaote, ya me sujt'es juqueb buelta te bila la yelc'ane, asta spisil ya yac' te bitic jayeb ay yu'une.

³² Mero ma'yuc sp'ijil te mach'a ya spas mulwej soc yan ants; te mach'a jich ya spase ja' nix ya yac' sba ta lajel a.

³³ Ejch'en soc q'uexlal ya sta, soc jc'axel ya xbolob sc'oplal; ma'yuc bila ya xju'ix ya xlecubtesbot sc'oplal yu'un.

³⁴ Melel te paichal ja' sjajch'ib yilimba te winique, jich ya xc'ot te bit'il c'ajc'; ma'yuc perdón ta yo'tan te c'alal bi ora ya yac'bey spacole.

³⁵ Ma'yuc bi ya xju' ya xlecubtesbot yo'tan yu'un stuquel; soc ma'yuc majt'aniletic te ya xju' ya xpejc'aj slab yo'tan yu'une.