Proverbios 4 - Bible in Tzeltal de Oxchuc y Tenejapa

Tac'uyel swenta st'unel lequil be

¹ Ja'ex te jnich'anexe, ich'aic me ta muc' te tac'uyel cu'un te atatonique. Aiya me awaiyic ta lec, jich me ya ana'ic spasel a te bila toj ta pasele.

² Jo'on me la cac'beyexix buen lec p'ijubtesel, ja' yu'un ma me xach'aybon ta awo'tanic te ap'ijubteselic cu'une.

³ Melel ja' nix jichon te c'alal alnich'anon to a, te jme'e ay xc'uxul yo'tan soc yutsil yo'tan ta jtojol,

⁴ soc te jtate la sp'ijubteson, jich la yalbon: “Ac'a me ta ajol, ac'a me ta awo'tan te c'opetic cu'une; pasa te bila ya cac'bat apase, jich me ya xcuxinat.

⁵ Ich'a me te sp'ijil awo'tan soc sp'ijil ajol, jich me ya ana' a te bila toj ta pasele; ma me xach'aybon ta awo'tan te jc'ope.

⁶ C'uxuc me ta awo'tan te p'ijil-o'tanile, ma me xach'ay jilel, melel ja' me ya scanantayat stuquel.

⁷ Ja'uc me tulan sc'oplal awu'un te ya awich' sp'ijil awo'tane; ich'a me te sp'ijil ajole, jich me ya ana' te bila toj ta pasele.

⁸ C'uxuc me ta awo'tan, jich me ya stoytesat a; loch'a me ta awo'tan, jich me ya yac'at ta ich'el ta muc'.

⁹ Ya me yac'bat amajt'an xotbil nichim te bayal yutsile; ja' me ya yac'bat acoronain”, xi' te jtate.

¹⁰ Ich'bon ta muc' te jc'ope, jnich'an; u'unina, jich me ya xnajt'aj xan a te jayeb ja'wil ya xcuxinate.

¹¹ Jo'on me ya quic'at bael ta sbelal te p'ijil-o'tanile; ya me cac'at ta beel ta buen lequil be

¹² te banti ma'yuc bila ya smacat ta beele, te banti ma ba ya ac'ojch'in awacan ta animal teme animajate.

¹³ Tsaca me ta spisil awip te ap'ijubtesele, ma me ayuc bi ora ya xch'ay awu'un; at'elina me spasel, melel ja' me acuxlejal stuquel.

¹⁴ Ma me xat'un bael te mach'atic amen yo'tanique, ma me xat'unbey te bila amen ya spasique.

¹⁵ Ja' me lec te ma ba ya xc'axat ta sbeique, parte me xawac' aba, ma me xat'un; jich me xapas spisil ora.

¹⁶ Melel ma sc'an slaman sbaic ja' to teme la spasic te bila amen ta pasele; asta ma ba ya xtal swayelic, teme ma'yuc mach'a ya yaq'uic yaluque.

¹⁷ Te bila swe'el yuch'el ya yaiye ja' te bila amen ta pasel soc te uts'inwaneje.

¹⁸ Te be yu'unic te mach'atic toj yo'tanique, jich c'oem te bit'il saquil q'uinal te c'alal ya sacub tel q'uinal ta jujun sabe, yac ta sacubel tel te q'uinale, asta ya sacub ta lec.

¹⁹ Pero te be yu'unic te mach'atic amen yo'tanique, mero ijc' stuquel; ni yacuc xju' ya yilic bila ya sc'ojch'in yacanic a.

²⁰ Jnich'an, ich'bon me ta muc' te jc'ope; ac'a me ta awo'tan.

²¹ Ma me ayuc bi ora ya ach'ay asit a, q'ueja me ta ajol soc ta awo'tan.

²² Ja' me ya yac' cuxlejal, soc sbujts' q'uinal yu'un spisil te mach'a ya stae.

²³ Ja'uc me tulan sc'oplal ta awo'tan te ya acanantay ta balumilal te ajol soc te awo'tane, melel tey me ya xtal a te acuxlejale.

²⁴ Ma me xawal te bila ma meleluque; jc'axel ilaya me te lote.

²⁵ Ja' me xawac' asit a te bila ay ta atojole; soc ja' me x'awil bael te bila neel aye.

²⁶ Ila me awil ta lec te banti ya awac' te awacane; spisil me ora ja' x'atec' te tulan lume.

²⁷ Ma me xjowejat ta beel; ch'aya me ta jc'axel te amen beele.