Proverbios 30 - Bible in Tzeltal de Oxchuc y Tenejapa

P'ijil c'opetic yu'un Agur

¹ Te p'ijil c'opetic yu'un Agur, snich'an Jaqué te ay ta Masa. Te Agur la sc'opon Itiel soc Ucal, jich la yal:

² Jo'on te mero bolon yu'un spisil a te winiquetique; ma'yuc p'ijilil jtaoj ta q'uinal.

³ Ma'yuc quich'oj p'ijil-o'tanil; ma jna'bey sba te Ch'ul Diose.

⁴ ¿Mach'a moem soc coem tel ta ch'ulchan? ¿Mach'a ya xju' yu'un scomel te ic' ya stsac ta sc'abe? ¿Mach'a ya spots ta snajt'il c'u' te mare? ¿Mach'a la xchajban ta bay c'oem sti'il te balumilale? Ma me xawalbon te ya ana'bey sbiil soc sbiil te snich'ane.

⁵ Te Cajwaltic ya scanantay te mach'atic ja' smuc'ulinej yo'tan; spisil te bitic yalojbotic, ya sc'an ya smuc'ulin co'tantic.

⁶ Ma me xawac'bey xan sjoy te bila ya yal stuquel; teme jich ya apase, ya me xju' ya scomat, soc jich me ya xc'oat yu'un te bit'il jpas-lot.

⁷ Dios cu'un ja' nax cheb te bitic ya jc'anbate, ac'bon me te c'alal ma to xlajone:

⁸ Ma me xawac'on ta pas-lot soc ta yalel te bila ma meleluque, soc ma me xawac'on ta jc'ulej ni ta me'bail. Ja' nax me ya awac'bon te jich yipal we'elil te ya xtuun cu'une.

⁹ Melel teme ya spas sobrail, repente ya xch'ayat ta co'tan yu'un, ya niwan cal te ma jna'bat abae. Yan teme ayon ta wi'nal, ya niwan caiy elec' yu'un; soc jich ya jbolc'optaybat te ach'ul-biile.

¹⁰ Ma me xalebey smul ta stojol yajwal te abate; teme jich ya apase, ya me sboltesbat ac'oplal yu'un, jich me ya ata awocol.

¹¹ Ay mach'atic ya sbolc'optay static, soc ma xyalbeyic lec sc'oplal te sme'ique.

¹² Ay mach'atic ya scuy sbaic te mero ma'yuc smulic; ja'uc me to, ma ba yac'oj sbaic ta lecubtesel te bila bolobenic yu'une.

¹³ Ay mach'atic scuyoj sbaic ta muc' sc'oplalic; cajal yac'oj sbaic soc sitic, ta yilel te yantique.

¹⁴ Ay mach'atic te ja' puñal c'oem te yeic, soc machit c'oem te xcha'amic, swenta slajinel ta jc'axel te me'baetique.

¹⁵ Ay cheb yantsil-nich'an te nap'ac xchanul ajch'al, te ja' nax ya sna'ic sc'anele: “Ac'bon, ac'bon”, te xiique. Ay oxeb te bitic aye, asta ay chaneb, te xujt' ma tic'uc ya yaiy a:

¹⁶ Ja' te muquenale, ja' te ants te ma x'alaje, ja' te q'uinal te ma tic'uc ya yaiy a te ja'e, soc te c'ajc' te ma tic'uc ya yaiy a te si'e.

¹⁷ Te mach'a ya yilay stat soc te ya slaban sme' te me'elixe, ja' lec te yacuc xloq'uesbot sit yu'un joj, soc te ja'uc ya xti'bot sbaq'uetal yu'un te xuleme.

¹⁸ Ay oxeb te bitic aye, asta ay chaneb, te ma xju' cu'un sna'el swentaile:

¹⁹ Ja' te sbe xulem ta toyol, ja' te sbe chan ta tontiquil, ja' te sbe barco ta yolil mar, soc te bit'il ya yu'uninbey yo'tan ants te winique.

²⁰ Te ants te ma junuc yo'tan ta stojol smamlal, jich ya spas: Ya xwe' soc ya scus ye c'oem, soc ya yal te ma'yuc bila amen spasoje.

²¹ Ay oxchajp te ants-winiquetic, asta ay chaneb, te mero ma xcujch' te bila ya spasique, ya xnijc' yo'tanic yajwal lum yu'un:

²² Ja' te abat te ya x'och ta muc' ajwalil, ja' te mach'a ma sna' q'uinal te ay sobrail swe'el,

²³ ja' te ants ilaybil te ya sta smamlal, soc te criada te ay ya xjil ta yajwal nae.

²⁴ Ay chaneb ch'in chambalametic ta lumq'uinal te c'ax jich sp'ijilic a te mach'atic ay sp'ijilique:

²⁵ Ja' te ts'isimetic te bayalic ta jyalel te ma'yuc yipic, pero ya stsob swe'elic ta yorail verano;

²⁶ ja' te cojt'ometic te ma'yuc yipic, pero ayic ta nainel ta tontiquil;

²⁷ ja' te c'ulubetic te ma'yuc ajwalil ya x'ic'otic yu'un, pero toj nax ayic ta beel;

²⁸ ja' te ojc'ots te ya xju' ta loch'el ta jc'abtic, pero ya x'ochic ta spalacio te muc' ajwalile.

²⁹ Ay oxeb te mero tulanic, asta ay chaneb, te bayal sc'ajc'al yo'tan ya xbeenique:

³⁰ Ja' te león-choj te chambalam te xiweltic sbae, ma'yuc bi ya x'antesot bael yu'un, soc ni jtuluc mach'a ya xi';

³¹ ja' te stat tentsun, ja' te toyba tatmut, soc ja' te muc' ajwalil te ya yic' ta beel te soldadoetic yu'une.

³² Teme scaj nax abolil te muc' awac'oj abae, soc teme amen te bila chapal awu'une, nopa me awaiy ta lec:

³³ teme ya atij te leche, ya me ata mantequilla; teme tulan ya asimtay te ani'e, ya me xloc' tel ch'ich'; teme ya ajachbey yo'tan te yane, ya me ata c'op.