Proverbios 29 - Bible in Tzeltal de Oxchuc y Tenejapa

¹ Te mach'a tulan ya yac' sba te c'alal ya yich' comel, ora nax me ya yich' jinel, soc ma me ayuc xpoxil yu'un.

² Te c'alal ya yich' yat'el te mach'atic toj yo'tanic, bin nax yo'tanic te lum yu'une; yan te c'alal ya spas mandal te mach'atic amen yo'tanic, ya xwoclaj te lume.

³ Te nich'anil te ay sp'ijile, ya yac'bey yutsil yo'tan te state; yan teme ya xbajt' ta yo'tan te jmulawil antsetique, ya xch'ay staq'uin yu'un.

⁴ Te muc' ajwalil te toj ya xmandalaj, ya yich' yip te slumale; yan teme ja' nax ya xbajt' ta yo'tan sujel ta yaq'uel spatane, ya me sjin te slumale.

⁵ Te mach'a spisil ora ya yalbey lec sc'oplal te spat-xujq'ue, ta mero melel yac ta spasel spejts'ul c'oem.

⁶ Te pejts' ta bay ya xyal te mach'a amen yo'tan, ja' te smule; yan te mach'a lec yo'tane, jujun c'aal bujts'an q'uinal ya yaiy soc bin nax yo'tan stuquel.

⁷ Te mach'a toj yo'tan, ya yich' ta muc' te me'bae; yan te mach'a amen yo'tane, ma'yuc sc'oplal ta yo'tan stuquel.

⁸ Te mach'atic ya xlabanwanic, ya syuq'uic c'oem te jpam lume; te mach'atic ay sp'ijilique, ya sna'ic slamantesel-o'tanil.

⁹ Teme ya yut sba soc te mach'a ma sna' q'uinal te mach'a ay sp'ijile, te mach'a ma sna' q'uinal, ya x'ilin soc ya xlabanwan. Jich ma'yuc bila ya xchajbaj jtebuc.

¹⁰ Te jmilawaletic te ma'yuc razón ta yo'tanique, ya x'ilin ta stojol te mach'a lec yo'tane; toyol yo'tanic ta smilel.

¹¹ Te mach'a ma sna' q'uinal, libre ay ya yaiy ta spasel te bitic ya sc'an yo'tane; yan te mach'a ay sp'ijile, ya scom sba stuquel.

¹² Te ajwalil te ya xch'uunbey sc'op te jpas-lote, amen ya xc'ot spisil te abatetic yu'une.

¹³ Te mach'a ya x'uts'inot soc te j'uts'inwaneje, ay bi pajal ay yu'unic: te Cajwaltic pajal yac'ojbey sitic ta yilel q'uinal.

¹⁴ Te muc' ajwalil te toj ya xmandalaj ta stojol te me'baetique, ja' ya yac'bey yiptajib sbajt'el q'uinal te yat'ele.

¹⁵ Ta swenta majel soc ta swenta comel, ay bila ya yich' nopel; yan te nich'anil te ma'yuc comel ta stojole, ya yac' ta q'uexlal te sme'e.

¹⁶ Teme ya x'esmaj te mach'atic amen yo'tanic, jich ya x'esmaj xan te mulile; yan te mach'atic lec yo'tanique, ya me yilic bael te ya staic falta te mach'atic amen yo'tanique.

¹⁷ Tojtesa te anich'an, jich me lamal q'uinal ya awaiy yu'un, soc jich me ya yac'bat bayal yutsil awo'tan.

¹⁸ Ta bay ma'yuc ta tojtesel yu'un Dios te lum, ma'yuc lamal q'uinal yu'un; bin nax me yutsil te lum te ya xch'uunbey smandal te Diose.

¹⁹ Ta puro c'opetic ma xtojob te abate; melel ya yaiy stojol, pero ma xyich' ta muc'.

²⁰ Ya xju' te ay bila lec ya yal jtebuc te mach'a ma sna' q'uinal; ja' ma lecuc te mach'a ma snop neeluc te bila ya yale.

²¹ Te mach'a ma scom yabat te c'alal alal to, ta slajibal ya me smel yo'tan yu'un.

²² Te mach'a jteb stael, ora nax ya sjajch'es c'op; te mach'a ora nax ya xc'ajc'ub, ya me sta bayal falta yu'un.

²³ Te mach'a toyol ya yac' sba, ya me xpejc'anot; yan te mach'a peq'uel yac'oj sbae, ya me x'ich'ot ta muc'.

²⁴ Te mach'a la sjoin sba soc yantic te la xchapic elec', ja' ya scontroin te xcuxlejale; manchuc me yac ta yaiyel te ya x'ic'ot ta testigo, ma xyal stuquel.

²⁵ Te xiwel ta stojol ants-winiquetic, spejts'ul c'oem; yan te mach'a ja' smuc'ulinej yo'tan te Cajwaltique, canantaybil stuquel.

²⁶ Bayal ya sleic coltayel yu'un ajwalil; pero ja' nax stuquel te Cajwaltic te ya spas lequil chajbanwaneje.

²⁷ Te mach'atic lec yo'tanic, ma smulanic te mach'atic amen yo'tanique; ja' nix jich te mach'atic amen yo'tanique, ma smulanic te mach'atic lec yo'tanique.