Proverbios 28 - Bible in Tzeltal de Oxchuc y Tenejapa

¹ Te mach'a amen yo'tan ya x'an bael, manchuc me ma'yuc mach'a ya xnutsot yu'un; yan te mach'a toj yo'tane, jun yo'tan ay jichuc león-choj.

² C'alal yac ta bolobel te lume, ya x'esmajic tsobol te ajwaliletic yu'un; yan te lequil ajwalile, ya yac' lamal q'uinal ta stojol slumal.

³ Te ajwalil amen yo'tan, teme ya xjajch' yuts'in te mach'atic ma'yuc bila ay yu'unique, jich c'oem te bit'il tulan ja'al, te ma'yuc bi ya yac' jc'ajtic loq'uele.

⁴ Te mach'atic ma xch'uunic te mandalile, lec sc'oplal yu'unic te mach'a amen yo'tane; yan te mach'atic xch'uunejique, ya xcontroinot yu'un te mach'a amene.

⁵ Te mach'atic amen yo'tanic, ma xc'ot ta yo'tanic xujt'uc te bila toj ta pasele; yan te mach'atic ya sleic te Cajwaltique, ya xc'ot ta yo'tanic spisil.

⁶ Manchuc me me'baotic teme lec co'tantic; tojol jc'ulejotic, teme ma lecuc bila ay ta co'tantique.

⁷ Te mach'a xch'uunej te mandalil yu'un Dios, ja' te nich'anil ya stsajtay sba; yan te mach'a ja' nax baem ta yo'tan sjoinel te mach'atic ma'yuc bi lec ya spas ta q'uinal, ya yac' ta q'uexlal te state.

⁸ Te mach'a ya stsob sc'ulejal ta sc'anel sjol te staq'uine, ja' ya stsob yu'un te mach'a ya sna'bey yo'bolil sba te me'baetique.

⁹ Te mach'a ma sc'an xch'uunbey smandal te Diose, ma stsacbot sc'op te c'alal ya sc'opone.

¹⁰ Te mach'a ya yic' bael ta banti be te amene te mach'atic lec yo'tanique, ya me xyal a ta bay spejts' spasoje; yan te mach'atic lec yat'elique, ja' ya yich'ic te bitic mero leque.

¹¹ Te mach'a jc'ulej ya scuy sba ta mero p'ij; yan te me'ba te ay sp'ijil sjole, ya xju' ya spas ta prueba yil.

¹² C'alal ya yaiyic tsalaw te mach'atic toj yo'tanic, ya spasic muc'ul q'uin yu'un te ants-winiquetique; yan te c'alal ya yaiyic tsalaw te mach'atic amen yo'tanique, ya snac' sbaic yu'un.

¹³ Te mach'a ya smuc smul, ma lecuc ya xc'ot yu'un; yan te mach'a ya yal ta jamal soc te ya yijq'uitay spasele, ya me sta perdón.

¹⁴ Bin nax me yutsil te ants-winic te spisil ora ya yich' ta muc' te Cajwaltique; yan te mach'a tulan yo'tane, ya sta falta stuquel.

¹⁵ Pajal soc león-choj te ya x'awun, o jich bit'il oso te ay ta wi'nale, jich c'oem te mach'a amen yo'tan te ochem ta ajwalil yu'un te me'baetique.

¹⁶ Te ajwalil te ma p'ijuc yo'tan, ya xtoy uts'inwanej yu'un; yan te ajwalil te ma jbic'tal-o'tanuque, najt' me xcuxlejal stuquel.

¹⁷ Te mach'a la yaiyix milaw, puersa ya xyal bael ta muquenal; ma me ayuc mach'a ya xcoltayot yu'un.

¹⁸ Te mach'a lec yo'tan ay me ta coltayel stuquel; yan te mach'a ay mulil ta yo'tane, ya me sta falta yu'un.

¹⁹ Te mach'a ya x'at'ej ta sq'uinale, ya spas sobrail te swe'ele; yan te mach'a mero ma x'at'eje, te bila ya spas sobrail yu'une, ja' te me'baile.

²⁰ Te mach'a jun yo'tan yac'oj sba, ay ta alel yutsil sc'oplal; yan te mach'a ja' nax baem ta yo'tan sleel sc'ulejale, ya me yich' castigo yu'un.

²¹ Ma me tsabiluc nax mach'a c'ux ta co'tantic; melel scaj nax me jteb we'elil te ya xju' ya sta smul yu'une.

²² Te mach'a jbic'tal-o'tan, ma xway yo'tan yu'un sleel sc'ulejal, soc ma sna' te ya xtal ta stojol te me'baile.

²³ Te mach'a ya scom te ants-winique, ya me sta alel wocol yu'un; ma jichuc stuquel te mach'a ya yalbotic te lec te bila ya jpastique.

²⁴ Ja' sjoy sba soc jmilawal te mach'a ya yelc'anbey sbiluc sme'-stat, soc te ya yal te ma muliluc ta sc'ope.

²⁵ Te mach'a bayal ya xbic'taj yo'tan, ya sjajch'es c'op; yan te mach'a ja' smuc'ulinej yo'tan te Cajwaltique, ya x'esmaj bitic ay yu'un.

²⁶ Te mach'a ma sna' q'uinal, yich'oj sba ta muc' yu'un te bila snopoj ta yo'tane; yan te mach'a ya x'at'ej soc sp'ijil yo'tan, libre ya xc'ot yu'un stuquel.

²⁷ Te mach'a ya scoltay te me'ba, ma'yuc bila ya spasot falta yu'un; yan te mach'a ma xyac'bey scoltayele, bayal me ya xbolob sc'oplal stuquel.

²⁸ C'alal ya yaiyic tsalaw te mach'atic amen yo'tanic, te ants-winiquetic ya snac' sbaic yu'un; te c'alal ya xch'ayic ta jc'axel, ja' ya xju' yu'unic te mach'atic toj yo'tanique.