Proverbios 27 - Bible in Tzeltal de Oxchuc y Tenejapa

¹ Ma me xatoy aba ta swenta pajel; melel ma x'ana' te bi ya xc'ot ta pasel te pajele.

² Ja' lec teme yantic ya yalbat lec ac'oplal; ma lecuc teme ja'at nix ya awal lec ac'oplale.

³ Te tonetic soc te ji' c'ax bayal yalalic; c'axem jich yalal yilimba a te mach'a ma sna' q'uinale.

⁴ Te ilimba ya yac' wocol, te sc'ajc'al-o'tanil ya xjinawan; pero ma xju' ta comel te paichale.

⁵ Ja' lec jamal ac'a yich' comel; ja' ma lecuc teme muquen c'uxtaybile.

⁶ Ya to xju' ya smuc'ulin co'tantic te jpat-jxujc'tic te ya yejch'entesotic te sc'opique; ja' ma xju' ya smuc'ulin co'tantic te jcontrotic te bin nax yo'tan ya spat co'tantic yilele.

⁷ Te mach'a nojel xch'ujt', ma'yuc bi ya sc'an, ni ja'uc te chabe; yan te mach'a ay ta wi'nale, bujts'an ya yaiy te bila ch'ae.

⁸ Jich bit'il ja'mal mut te q'uejel yijq'uitayej jilel te specheche, ja' nix jich te mach'a c'ubul ay ta beel te yijq'uitayej jilel te slumale.

⁹ Te bila ya xbujts'naj co'tantic jtebuc yu'un, ja' te t'ujbil perfume; te bila ya xbujts'naj co'tantic yu'un ta mero melel, ja' te tojtesel yu'un te jpat-jxujc'tique.

¹⁰ Ma me xapijt'es aba soc te mach'a jun awo'tan aba soque, ni ja'uc te mach'a jun yo'tan soc te atate. Ma me xba awal ta sna awermano te c'opetic awu'une. Ja' lec xan te mach'a nopol ayat soque; ma ja'uc te awermano te q'uejel ay stuquele.

¹¹ Jnich'an, ayuc me ap'ijil, jich me ya awac' bujts'najuc co'tan; jich me ya xju' jsujt'esbey sc'opic a te mach'atic ya sbolc'optayonique.

¹² Te mach'a ay sp'ijile ya yil te bila chujc'ule, jich ma xyac' sba a; yan te mach'a ma stsajtay sbae, ya xc'ax bael ta ora, jich ya xc'ax swocol yu'un te bila ma lecuc ya stae.

¹³ Te mach'a ya stejc'an sba yu'un sbet te mach'a jyanlume, pojbeya te sc'u'e, ich'a bael ta prendal.

¹⁴ Teme ya apatbey yo'tan ta aw te apat-axujc' te ijc' to a te q'uinale, jich ya xc'ot ta yo'tan te bit'il yacat ta yixtac'optayele.

¹⁵ Te jtul ants te ya x'utawan, pajal soc te t'ojob c'alal yorail te ja'ale;

¹⁶ teme ya jc'antic ya jcomtic, jich c'oem te ya jcomtic te iq'ue, o te ya stsac ta jc'abtic te aceite.

¹⁷ Te taq'uin ya yich' juxel ye ta yan taq'uin, ja' pajal soc te mach'a ya sta sba ta c'op soc yan.

¹⁸ Te mach'a ya scanantay te higuera, ya slo'bey sit; te mach'a ya scanantay yajwal, ya x'ac'ot ta ich'el ta muc' yu'un.

¹⁹ Jich bit'il ya xchicnaj quelawtic ta pamal ja', ja' nix jich te co'tantic ya xchicnaj ta jsitic.

²⁰ Te lajel, te muquenal, soc te sbic'tal co'tantic, mero ma'yuc bi ora te tic' ya yaiy a te bila ay ta swentae.

²¹ Te oro soc te plata ya yich'ic pasel prueba ta c'ajc'; ja' nix jich te ants-winiquetic ja' prueba ta stojolic teme lec sc'oplal yu'un te yantique.

²² Te mach'a ma sna' q'uinal ma xju' ta loq'uesel te sbolile, manchuc me ya xc'ax swocol ta utel.

²³ Canantaya ta lec te chijetic awu'un, ja' me xbajt' ta awo'tan te achambalame;

²⁴ melel te c'ulejalil soc te ich'el ta muc' ma xjalajic sbajt'el q'uinal.

²⁵ C'alal ya xchicnaj aquiltic, soc ya xyaxub, soc te ya yich' tsobel te aquiltic ta witstiquile,

²⁶ te chijetic awu'un, ay stsotsil ya ac'u'inbey, te tentsunetic, ay me ataq'uin yu'un smanel aq'uinal a,

²⁷ te sme' tentsunetic awu'un, ay me sleche te ya amac'lin aba soc a te mach'atic ay awu'une, soc nix spisil te mach'atic ayic ta abatinel awu'une.