Proverbios 26 - Bible in Tzeltal de Oxchuc y Tenejapa

¹ Ma snujp'in ay toib ta yorail verano, soc ma snujp'in ay ja'al ta yorail c'ajoj; ja' nix jich ma snujp'in te ay ta ich'el ta muc' te mach'a ma sna' q'uinale.

² Jich bit'il ja'mal mut te bayuc ya xbajt'e, soc jich bit'il ulich te ma'yuc spechech, ja' nix jich teme ma'yuc swentail te bolc'optayele, ma'yuc bila ya xc'ot ta pasel yu'un.

³ Ac'a yich' chicote te caballo, ac'a yich' freno te burro; te mach'a ma sna' q'uinale, ac'a yich' majel.

⁴ Ma xasujt'esbey sbol-c'op te mach'a ma sna' q'uinale, jich me ma pajaluc ya xc'oat soc.

⁵ Sujt'esbeya sbol-c'op te mach'a ma sna' q'uinale, jich me ma scuy sba ta p'ij stuquel.

⁶ Teme ya cac'beytic yich' bael c'op te mach'a ma sna' q'uinale, jich c'oem te la jbojtic loq'uel te cacantic, soc te ya jle jwocoltique.

⁷ Ma c'ubuluc ya xbeen te coxoe, scaj te ma lecuc te yacane; ja' nix jich te mach'a ma sna' q'uinale, ma sna' yalel p'ijil c'opetic.

⁸ Ma xtuun teme ya yich' chuquel ton ta jimoch'il; ja' nix jich te ya x'ich'ot ta muc' te mach'a ma sna' q'uinale.

⁹ Te mach'a yacuben ma xyaiybey xc'uxul te ch'ixe; jich c'oem te mach'a ma sna' q'uinale, ma xc'ot ta yo'tan te tsabil c'op ya x'albote.

¹⁰ Te mach'a tojol ya stojlin ta t'im spisil te bila ya xc'axe, jich c'oem te mach'a ya yic' ta at'el ta sna te mach'a ma sna' q'uinale.

¹¹ Te ts'i' ya xcha'lo' xan xe; ja' nix jich te mach'a ma sna' q'uinale, ya spas xan te sbolile.

¹² Ya xju' te ay bila lec ya xc'ot ta stojol te mach'a ma sna' q'uinale, pero jc'axel ma'yuc lec bi ya sta te mach'a ya scuy sba ta p'ije.

¹³ Te bit'il ma sc'an at'el te mach'a ch'aje, ya sle bi ya smac sba a: “Ay león-choj snac'oj sba ta be”, xi'.

¹⁴ Xbalalet sbisagrail te ti'naile; jich xbalawet ta swayib te mach'a ch'aje.

¹⁵ Te mach'a ch'aj, ya yac' ochel sc'ab ta plato; ja'uc me to, ma xju' yu'un ya yac' ochel ta ye.

¹⁶ Te mach'a ch'aj, ya scuy sba ta p'ij; c'ax jich c'oem ta sc'op a te juctulic te ya sna'ic sujt'esel ta lec te c'ope.

¹⁷ Te mach'a ya yac' sba ta c'op te ma swentauque, jich c'oem te bit'il ya yich' tsaquel ta xchebal xchiquin te ts'i'e.

¹⁸ Jich te bit'il mach'a jowil nax ya swiles bael yat'ejibal t'im te yich'oj c'ajq'ue,

¹⁹ jich c'oem te mach'a ya slo'lay te spat-xujc', soc te ya yalbey te tajimal nax aye.

²⁰ Teme ma'yuc si', ya xtup' te c'ajq'ue; soc teme ma'yuc te jowil c'ope, ya xch'ay ta jc'axel te jach-c'ope.

²¹ Teme ya ac'an te tsajuben te c'ajq'ue, ja' ya sc'an te ac'ale; teme ya ac'an ya yich' pasel te c'ajq'ue, ja' ya sc'an te si'e; teme ya ac'an ya xjajch' te c'ope, ja' ya sc'an te ay jle-c'ope.

²² Te le-c'ope bujts'an ya x'aiyot, jichuc lequil we'elil; ja'uc me to, ya yejch'entes co'tantic ta jyalel.

²³ Teme bonbil ta plata te pac'bil oxome, jich c'oem te t'ujbil c'opetic te ay amen-o'tanil yu'une.

²⁴ Te mach'a ay slab yo'tan ta atojol, ya smuc te c'alal ya sc'oponate, pero ay bila ay ta yo'tan te mero c'ax amene.

²⁵ Ma me xach'uun teme t'ujbil nax ya sc'oponat yilele, melel ay bila amen nojel ta yo'tan.

²⁶ Manchuc me yo'tan smuc te slab yo'tane, te bila amen ay ta yo'tan ya xchicnaj ta stojol spisilic.

²⁷ Te mach'a ya sjoc' muquenal, ja' ni me ya xch'ay coel a; te mach'a ya stij te ton, ja' ni me ya xnet'ot yu'un.

²⁸ Te mach'a ya spas lot ya yilay te bila melele; lamal nax te sc'ope, pero ya xjowej yu'un te lume.