Proverbios 25 - Bible in Tzeltal de Oxchuc y Tenejapa

Xcha'cumul p'ijil c'opetic yu'un Salomón

¹ Ja'ic nix te p'ijil c'opetic yu'un Salomón, te loc'taybil ta ts'ibuyel yu'un winiquetic te ayic ta abatinel yu'un te Ezequías, te muc' ajwalil yu'un Judá:

² Ja' yutsilal Dios te ay ta yo'tan te bitic muquen aye; soc ja' yutsilal te muc' ajwaliletic te ya sna'ic snopele.

³ Te stoylejal ch'ulchan, te sc'ubulil balumilal, soc te bitic ay ta yo'tan te muc' ajwaliletique, ja'ic te bitic ma xju' ya jtatic ta na'el te jo'otique.

⁴ Loq'uesbeya ta c'ajc' sbolil te plata, jich ya xju' ta pasel vaso yu'un a te jten-taq'uine;

⁵ ja' nix jich loq'uesbeya bael yabat te muc' ajwalil te amen yo'tane, jich yu'un te yat'el te muc' ajwalil ay me yip ya xc'ot ta swenta te toj chajbanele.

⁶ Ma me muc'uc ya awac' aba ta stojol te muc' ajwalile, ma me xamacbey snactijibic te winiquetic te cajal sc'oplalique;

⁷ ja' lec te ya amaliy awiq'uel moel, teme repente ya awich' q'uexlaltesel ta stojol te muc'ul mamaletique. Te bi ya awil soc te asite,

⁸ ma me xba awal ta ora ta stojol te mach'atic yich'oj yat'elique; repente ay yan testigo ya xju' ya stsalat ta c'op, jich ma x'ana' bi ya apas ta patil.

⁹ Coltaya me aba teme ay mach'a ya slebat amul, pero ma xachicnantes ta alel te bila muquen ya x'albotate;

¹⁰ repente ay mach'a ya yaiyat stojol, jich ya yac'at ta q'uexlal, soc jich me ya xbolob ac'oplal ta jc'axel, ma me ayuc poxil yu'un.

¹¹ Te jp'al c'op ya xloc' tel ta yorail te ya sc'an alel, jich c'oem te bit'il sloc'omba manzana pasbil ta oro te ch'albil ta plata.

¹² Jich bit'il ch'ocowil, o ualil, te pasbilic ta t'ujbil oro, jich c'oem te p'ijil comel ta stojol te mach'a ya sna' yich'ele.

¹³ Te lequil j'alwanej te ya yich' ticunele, jich c'oem te bit'il siquet nax q'uinal yu'un toib teme q'uixnaj te c'aale; ya yac'bey yip yo'tan yu'un te yajwale.

¹⁴ Te tocal soc ic' te ma'yuc ya'lele, jich c'oem te mach'a ya yac' majt'anil ta sc'ope, te mero ma xyaq'ue.

¹⁵ Teme cujch' yu'une, ya xlamaj te ilimbae; teme lamal te c'ope, ya slajinbey yip ta jc'axel.

¹⁶ Teme ay la ata chabe, ma me c'ax bayaluc ya alo', repente ya yac'bat xenel teme bayal ya alo'e.

¹⁷ Teme ya awula'tay te apat-axujq'ue ma me spisiluc ora ya xbaat; repente ya sp'ajat yu'un, jich me ya yilayat ta yo'tan.

¹⁸ Te mach'a ya sle ta c'op te spat-xujc', jich c'oem te bit'il martillo, o cuchillo, o t'im te jay sni'e.

¹⁹ Te c'alal ayotic ta woclajel a, teme ya smuc'ulin co'tantic te mach'a ya xlo'laywane, jich me ya xc'ot te bit'il c'asem cacantic, te jun xanix yacalotic ta beel soque, o jich bit'il jp'ij quetic te lajem ta chan te ayotic ta we'el soque.

²⁰ Te sc'ajintayel c'ayojetic ta stojol te mach'a ay ta wocole, jich ya xc'ot ta swenta te ya yich' malel vinagre ta yejch'ene, o jich te bit'il ya yich' loq'uesel sc'u' ta yorail sic.

²¹ Teme ay ta wi'nal te acontro, ac'beya swe'el; teme taquin yo'tan, ac'beya ja' yuch'.

²² Jich ya awac' tsajubuc yelaw yu'un te q'uexlale; soc ja' ya stojbat stuquel te Cajwaltique.

²³ Teme ya xtal ta norte te iq'ue, jich ya xtal te ja'ale; ja' nix jich te bol c'opetic ya xloc' ta quejtic, ya xchicnaj ta quelawtic.

²⁴ Ja' lec teme ch'in xejt' xanix na te banti ya xnainotique; ja' ma lecuc teme muc'ul na ay cu'untic teme ma xlaj yo'tan ta utaw te antse.

²⁵ Jich bit'il siquil ja' ya xco bael ta snuc' te mach'a ay ta taquinti'ile, jich c'oem te lequil aiyejetic te ya xtal ta c'ubul q'uinale.

²⁶ Pajal soc sloq'uibja' te tatubenix soc bolobenix, jich c'oem te mach'a ma'yuc smul te ya xnijc' yo'tan ta stojol te mach'a amen yo'tane.

²⁷ Ma lecuc te bayal ya yich' lo'el te chabe; pero ja' lec te ya yich' t'unel ta lec te bila chujc'ul ta na'ele.

²⁸ Jich bit'il te lum ma'yuc sts'ajc'ule, ma wocoluc ya x'och te scontroe, jich me c'oem te mach'a ma sna' scomel te bila ya sc'an te yo'tane.