Proverbios 24 - Bible in Tzeltal de Oxchuc y Tenejapa

- 19 -

¹ Ma me xbic'taj awo'tan yu'un te bi yilel stalelic te mach'atic amen yo'tanic; soc ma me xamulan te ya ajoine.

² Melel ja' nax ay ta yo'tanic te c'ajc'ubele; ma'yuc bi yan ya yalic, ja' nax baem ta yo'tanic yalel te ya spasic te bitic amene.

- 20 -

³ Ta p'ijilil ya yich' pasel te nae; soc ta sp'ijil joltic ya yich' aq'uel jajch'el te yiptajibe.

⁴ Buen nopbil te bit'il ya yich' nojesel ta bitic bayalic stojol soc te bitic buen t'ujbilic sba te ayic ta cuartoetic yu'une.

- 21 -

⁵ Ja' bayal sc'oplal te ants-winic te ay sp'ijile; ma ja'uc bayal sc'oplal te mach'a ay yipe. Ja' cajal sc'oplal te sp'ijil sjole; ma ja'uc bayal sc'oplal te ipe.

⁶ Melel te c'alal ya yich' pasel te guerra, ya sc'an buen lec ya yich' chapel bael; teme tsobol mach'atic ya xchapique, jich ya xju' te tsalawe.

- 22 -

⁷ Te mach'a ma sna' q'uinal, ma sna' bila ya yal ta stojol juecetic, ta scaj te ma ba c'oem ta yo'tan te p'ijil c'ope.

- 23 -

⁸ Te mach'a ja' nax snopoj ta yo'tan spasel te bila amene, “jbol-o'tan”, xi' me sc'oplal ta bayuc.

⁹ Te bila chapal ta yo'tan te mach'a ma sna' q'uinal, ja' te mulile; ma'yuc mach'a ya xcujch' yu'un te sbolil te mach'a ma xq'uexawe.

- 24 -

¹⁰ Teme ya xpejc'aj awo'tan te c'alal ay awocol a, yu'un ma'yuc bayal te yip awo'tan awich'oje.

- 25 -

¹¹ Coltaya te mach'atic ic'biliquix bael ta lajele; coltaya me ta lajel te mach'atic ayiquix ta castigo.

¹² Manchuc me ya awal te ma la awaiy stojole, pero te mach'a ya sna' bi ay ta co'tantic, ya sna' stuquel. Melel ya me sna' stuquel te mach'a ya yilate, ja' te mach'a ya yac'bey stojol sc'ab ta juju-jtul chican bi yilel te yat'ele, ja' me ya yilat stuquel.

- 26 -

¹³ Jnich'an, lo'a me te chabe; lo'a, ya me awaiy te mero bujts'an stuquele.

¹⁴ Ja' me jich sbujts' xchi'il ya awaiy te p'ijil-o'tanile; teme la atae, buen lec me ya xc'oat yu'un, ma me ayuc bi ora ya xlaj sc'oplal te bila ya amaliye.

- 27 -

¹⁵ Ma me xachajbanbey sc'oplal bila amen ta stojol te mach'a lec sc'oplale; ma me xajinbey sbiluc ta sna te banti naineme.

¹⁶ Manchuc me ya xyal juqueb buelta, pero ya me xjajch' xan juqueb buelta. Yan stuquel te mach'atic amen yo'tanique, ya me xc'oic bael ta lajel stuquelic.

- 28 -

¹⁷ Ma me binuc nax awo'tan yu'un, soc ma me xapas q'uin yu'un, teme pejc'ajix soc teme jajch' ta wocol te acontro.

¹⁸ Melel te Cajwaltic ma smulan te jich ya apase; ja' me ya xlecub yo'tan ta stojol te acontro teme jich ya apase.

- 29 -

¹⁹ Ma me x'ilinat ta swenta te mach'atic amen yo'tanic; soc ma me xabic'tal-o'tantay te j'ixta-o'tanetique.

²⁰ Melel te mach'atic amen yo'tanique, ma ba lec ya xc'otic ta slajibal; te j'ixta-o'tan jich ya xtup' bael te bit'il te c'ajq'ue.

- 30 -

²¹ Jnich'an, ich'a ta muc' te Diose, soc ich'a ta muc' te muc' ajwalile; ma me xat'un te scontrotaque.

²² Melel ma me wocoluc ya xtal te slajibique, soc ma'yuc mach'a sna'oj te bila castigoil ya x'ac'botic yu'un te Diose, soc te castigo ya x'ac'botic yu'un te muc' ajwalile.

P'ijil c'opetic yu'un te mach'atic ay sp'ijile

²³ Ja' p'ijil c'opetic yu'un te mach'atic ay sp'ijile: Ma ba lec teme ay mach'a ya yich' tenel ta c'op ta stojol juecetic.

²⁴ Te mach'a ya yalic ta jamal te ma'yuc smul te mach'a ay smule, ya me xbolob sc'oplal yu'un te lumetic, soc ya me x'ilayot yu'un te nacionetique.

²⁵ Pero te mach'atic ya yac'bey castigo te mach'a ay smule, lec me ya xc'otic yu'un, soc buen lec me sc'oplalic yu'un te lume.

²⁶ Te mach'a buen lec ya sna' yaq'uel sujt'ib te jc'optique, jich c'oem te bit'il bujts'iyel.

²⁷ Ac'a ap'olmal ta calle, pasa awat'el ta aq'uinal; patil ya me xju' awu'un spasel ana.

²⁸ Ma me xatojol-lebey smul apat-axujc', soc ma me x'ochat ta lotil testigoil.

²⁹ Ma me ayuc bi ora ya anop te ya asujt'esbey spacol te mach'a ay bila amen ya spasbate; ma me jichuc nix xapasbey te bit'il la spasbate.

³⁰ C'axon ta banti sq'uinal te mach'a ch'aje, soc ta sts'usubil te mach'a ma'yuc snopjibal yu'une;

³¹ te bi la quile, jsejp q'uinal nojel ta ch'ixetic soc jemts'ujem te corral-tone.

³² C'alal la quil, la cac' ta co'tan; la quil soc ay bila la jnop tey a:

³³ Ja' te bi ora yacat ta waichejel, soc te c'alal yacat ta nicubajel, soc te apetoj ac'ab yu'un sbujts' awayele,

³⁴ ya me xtal te me'baile, ya me xjul yac'bat guerra jichuc jbeomal te chapal soc yat'ijib yu'un guerra.