Proverbios 23 - Bible in Tzeltal de Oxchuc y Tenejapa

- 6 -

¹ Teme ya yic'at ta we'el te mach'a muc' sc'oplale, tsajtaya me ta lec mach'a ayat ta stojol.

² Manchuc me ay bayal awi'nal, pero coma me aba;

³ ma me xbiq'uetuc ya awaiybey te sbujts' we'elil yu'une, teme repente ayat nax ta lo'layel yu'un.

- 7 -

⁴ Ma me xawac' puersa ya x'ochat ta jc'ulej; ma me xawac' yu'uninbat awo'tan.

⁵ Yacuc atsajtay awil ta lec, ya me awil te ya xch'ay bael te c'ulejalile; jich c'oem te bit'il ya xloc' xic', melel ora nax ya xbajt' ta wilel jichuc águila.

- 8 -

⁶ Ma me xnajc'ajat ta smesa te t'ut'il jc'uleje; ma me xbiq'uetuc ya awaiybey te sbujts' we'elil yu'une.

⁷ Melel pajal me soc jlijc' stsotsil jolol te xmac'aq'uet ta anuc'. Manchuc me ya yic'at ta we'el-uch'el, ma spisiluc yo'tan te ya yic'ate.

⁸ Patil ya me axejtay te bila la awe'e; jich ma'yuc bila tuun awu'un a te jun awo'tan c'opojat soque.

- 9 -

⁹ Ma me xc'opojat ta stojol te mach'a ma sna' q'uinal, melel ya me slaban te p'ijil c'opetic awu'une.

- 10 -

¹⁰ Ma me xajeltaybey yawil te antiguo ts'acane; soc ma me x'aten loq'uel ta sq'uinalic te me'ba alaletique.

¹¹ Melel ay me Coltaywanej yu'unic te bayal yu'el stuquel te ya xchicnaj ta atojole.

- 11 -

¹² Ac'a ta awo'tan te p'ijubtesel; ac'a ochuc ta achiquin te p'ijubtesele.

- 12 -

¹³ Tojtesa me te anich'ane, ta cha'oxyalel majel ma ba ya xlaj yu'un;

¹⁴ melel teme ya atojtes, jich me ya acoltay ta lajel.

- 13 -

¹⁵ Jnich'an, te c'alal ya awich' sp'ijil awo'tan, bayal me ya xbujts'naj co'tan yu'un;

¹⁶ ya me xtal xan bayal yutsil q'uinal ya caiy yu'un teme mero swentailix yacat ta c'op ya caiye.

- 14 -

¹⁷ Ma me xbic'taj awo'tan yu'un te bi yilel stalel te jmulawiletic; ja' me lec te ja' ya awich' ta muc' spisil ora te Cajwaltique.

¹⁸ Jich me buen lec ya xc'oat yu'un; ma me ayuc bi ora ya xlaj sc'oplal te bila ya amaliye.

- 15 -

¹⁹ Jnich'an, ich'a ta wenta te bila ya cale, nopa ta mero lec; ja' me xawac' puersa ta st'unel te lequil be.

²⁰ Ma me xat'un te jyacubeletique; soc ma me xajoin te mach'atic lom bayal ya xwe'ique.

²¹ Melel te jyacubeletic soc te mach'atic bayal ya xwe'ic ya me x'ochic ta me'bal yu'un; soc te ch'ajetic ya me slapic lomen pac' stuquelic.

- 16 -

²² Aiybeya awaiy sc'op te atat te la snich'antayate; ma me x'awilay te ame' te c'alal me'elix a.

²³ Mana me soc ma me xachon te bila smelelile soc te p'ijil c'ope, te p'ijubtesel soc te sp'ijil ajole.

²⁴ Bin nax me yo'tan awu'un te atate, soc buen lec me q'uinal ya yaiy awu'un teme ay ap'ijile, ja'at te lequil alnich'anate.

²⁵ Ac'a me puersa te binuc nax yo'tanic soc buen lec q'uinal ya yaiyic awu'un te ame'-atate.

- 17 -

²⁶ Jnich'an, ac'a asit ta jtojol, ja' me xanopbon te bila ya jpas ya awile.

²⁷ Melel te yan ants soc te jmulawil ants, pajal soc pozo te mero c'ubule soc te tsail nax jutbile;

²⁸ ya xmujc'taywan jichuc j'elec', jich ya yac' ta ch'ayel bayal winiquetic.

- 18 -

²⁹ ¿Mach'a ay ta wocol? ¿Mach'a ya yaiybey xc'uxul? ¿Mach'a ya stsac sbaic ta c'op? ¿Mach'a yac ta ajc'an yu'un wocol? ¿Mach'a yich'oj tojol ejch'entesel? ¿Mach'a tsajuben q'uinal ya yil?

³⁰ Ja' te mach'a ma'yuc bi ora ya yijq'uitay te yacubele; ja' te mach'a yac'oj puersa ta xchajbanel xan yach'il bitic ay ta uch'el.

³¹ Ja' yu'un te ja'ate, ma me x'awil bael te vino yu'un yacubele. Buen c'an xojan soc buen xlemet ta svasoil. Buen bujts'an ta uch'el yilel.

³² Pero ta patil jich ya xc'ot te bit'il jti'awal chan, te buen c'ux ya xti'awane.

³³ Ay bitic jchajpic ta ilel ya awil yu'un, soc ay ya xtal ta awo'tan yalel amen c'opetic.

³⁴ Ya yac'bat awaiy te ayatix ta barco ta muc'ul mar yaiyel, metselatix ta sni'il ya awaiy te smuc'ul-te'el spac'al te barco.

³⁵ Jich me ya awal: “La smajonic, pero ma ba la caiy; la smajonic ta nujc'ul, pero ma la jna'. Pero te c'alal ya jna' q'uinal, ya xba jcha'le xan cuch'”, xaat.