Proverbios 22 - Bible in Tzeltal de Oxchuc y Tenejapa

¹ Ja' bayal sc'oplal te t'ujbiluc jc'oplaltic yu'un yantic; ja' ma'yuc sc'oplal teme ay bayal oro soc plata cu'untic.

² Ay mach'atic jc'ulej soc ay mach'atic me'ba ta q'uinal; ta xcha'chajbal ja' la spas te Cajwaltique.

³ Te mach'a p'ij yo'tan ya yil te bila chujc'ule, jich ma xyac' sba a; yan te mach'a ma p'ijuc yo'tane, ya xc'ax bael ta ora, jich ya xc'ax swocol yu'un te bila ma lecuc ya stae.

⁴ Teme ya jpejc'an jbajtic ta stojol te Cajwaltique, soc teme ya quich'tic ta muq'ue, ya xtal jmajt'antic yu'un: ja' te c'ulejalil, te ich'el ta muc', soc te cuxlejale.

⁵ Te sbe te mach'a amen yo'tan, nojel ta ch'ix soc ta pejts'; yan te mach'a ya scanantay sba soc xcuxlejale, ya me sq'uej sba yu'un te bila amene.

⁶ Ac'beya lequil p'ijubtesel te alal te c'alal ch'in to ae, te c'alal ya xmamalub, ma'yuc bi ora ya xch'ay ta yo'tan.

⁷ Te me'baetic ja' yajwalinejic te jc'uleje; te mach'atic ay sbetique, ja' mosoinbilic yu'un te mach'a ay bila ya yac' ta majanele.

⁸ Te mach'a ya sts'un te bitic ma lecuc ta pasele, ja' nix ya sc'ajbey swocolil; te Cajwaltic ya me slajin ta sbastón ta sc'ajc'al yo'tan.

⁹ Te mach'a soc yutsil yo'tan ya yil yan, ya me x'ac'bot bendición ta swenta bit'il ya yac'bey swe'el te me'baetique.

¹⁰ Teme ya yich' loq'uesel te jach-c'ope, ya xch'ay bael te c'opetique, soc ya xlaj bael te toybaile.

¹¹ Te muc' ajwalil, bin nax yo'tan yu'un te mach'a jun yo'tane; soc ya yac'bey yil yutsil yo'tan te mach'a ay sbujts' ya xc'opoje.

¹² Te Cajwaltic ya scanantay te mach'a ay sp'ijile; yan te mach'a ya spas lote, ya me sjinbey sc'op stuquel.

¹³ Te bit'il ma sc'an at'el te mach'a ch'aje, ya sle bila ya smac sba a: “Ay león-choj ta be, ya sc'an ya smilon”, xi'.

¹⁴ Te ants te ya spas mulwej jich c'oem sc'op te bit'il sc'ubulil pozo te banti ya xch'ay coel te mach'a ma lecuc sc'oplal yu'un te Cajwaltique.

¹⁵ Te bol-o'tanil, ja' ay to ta yo'tanic te alaletique; pero ya xjil yu'un te c'alal ya yich' tulan tojtesel ta majel.

¹⁶ Te mach'a ya sle sc'ulejal, teme ja' ya yuts'in te me'ba, o teme ja' ya yac'bey smajt'an te jc'uleje, jich me ya xc'atp'uj ta me'ba yu'un.

Lajuneb xcha'winic (30) tsabil c'opetic yaloj mach'atic ay sp'ijilic

¹⁷ Ac'a achiquin, aiybeya awaiy sc'opic te mach'atic ay sp'ijilique; ts'una me ta awo'tan te bila ya cac'bat anope.

¹⁸ Melel buen lec me ya awaiy teme ya aq'uej ta awo'tan, soc bin nax me awo'tan ya awalulay ta pajal ta apisilic.

¹⁹ Yo'tic ya cac'bat ana' ta spisil, swenta yu'un ya me awac' smuc'ul awo'tan ta stojol te Cajwaltique.

²⁰ Jo'on la jts'ibubat lajuneb xcha'winic (30) ta jchajp tsabil c'opetic te ya xtac'uywan soc te ya xp'ijubteswane,

²¹ swenta yu'un jich ya awich' aq'uel anop a te bila smelelile, soc swenta yu'un jich mero toj ya acholbey yaiy a te mach'a ya sjojc'obate.

- 1 -

²² Ma me x'awuts'in te me'baetic ta scaj nax te ma'yuc bila ay yu'un ya awile; ma me x'aten ta c'op ta stojol juez te mach'a ma'yuc bila ya scoltay sba a.

²³ Melel ja' me ya x'och ta coltayel yu'un te Cajwaltique; ya me xtenot ta c'op yu'un te Cajwaltic te mach'a ya sten ta c'op te me'baetique.

- 2 -

²⁴ Ma me junuc awo'tan soc te mach'a ora ya x'iline, soc ma me xajoin te mach'a spisil ora scupoj slab yo'tane,

²⁵ teme repente ya anopbey te stalele. Jich me ja'at nix ya awac' aba ta ch'ayel.

- 3 -

²⁶ Ma me ayuc bi ora ya atejc'an aba ta testigo swenta yu'un ya sbetan taq'uin te yane;

²⁷ teme ma'yuc bi ay awu'un ya atojbey a, asta te awayib ya xbajt' ta pojel yu'un.

- 4 -

²⁸ Ma me xajeltaybey yawil te ts'acan te la xchajban jilel te antiguo ame'-atate.

- 5 -

²⁹ Te mach'a ya spas ta lec te yat'ele, ya me x'ic'ot ta at'el ta stojol muc' ajwaliletic; ma ja'uc ya x'at'ej ta stojol te mach'atic peq'uelique.