Proverbios 21 - Bible in Tzeltal de Oxchuc y Tenejapa

¹ Ay ta sc'ab Cajwaltic te yo'tan te muc' ajwalile, jich me toj ya xbeen te bit'il muc'ja', jich te bit'il ya sc'an yo'tan te Cajwaltique.

² Te ants-winiquetic lequil be c'oem ta yo'tan spisil te bitic ya spase; ja'uc me to, te Cajwaltic ya sna'bey yo'tan stuquel.

³ At'elina spasel te bitic toj ta pasel soc te bitic swenta toj-o'tanile, melel te Diose ja' ya smulan, c'axem jich sc'oplal yu'un a te milbil smajt'ane.

⁴ Te mach'a stoyoj sba ta sit-yelaw soc te toyba-o'tan aye, ja' mulil ta spisil te bitic ya yaq'uic ta ilele.

⁵ Te bitic chajbanbil te mero nopbile, lec ya xc'ot ta pasel; yan teme animal chajbanbile, ma lecuc ya xc'ot.

⁶ Te c'ulejalil te ya yich' tael ta swenta lo'laywanej ajc' nax ay ta q'uinal, soc ya x'ac'ot ta lajel yu'un.

⁷ Te mach'atic amen yo'tanic, ya xlajic yu'un te sc'ajc'al yo'tanic, ta scaj te ma sc'an spasic te bitic swenta toj-o'tanile.

⁸ Ma me bay tojoben yat'el te mach'a amene; yan te yat'el te mach'a lec yo'tane, toj ay stuquel.

⁹ Ja' lec teme ch'in xejt' xanix na te banti ya xnainotique; ja' ma lecuc teme muc'ul na ay cu'untic, teme mero ma xlamaj yo'tan ta utaw te antse.

¹⁰ Te mach'a amen yo'tan, ja' nax ay ta yo'tan spasel te bitic ma lecuque; mero ma xtal ta yo'tan te ya xc'uxtay te mach'atic pajal cuxul ta q'uinal soque.

¹¹ Te c'alal ya yich' castigo te j'ixta-o'tane, jich ya snop a te mach'a ma sna' q'uinale; yan te mach'a ay sp'ijile, tic' ya snop a te ya xcholbot sc'oplale.

¹² Te Dios te stalel toj yo'tan, ya stsajtaybey yil sna te mach'a amen yo'tane, soc ya yac'bey ta jinel sna te mach'atic amen yo'tanique.

¹³ Te mach'a ma xyich'bey ta wenta te bi ya yal wocol yu'un te me'ba, ja' nix me jich ma x'ac'bot sujt'ib te c'alal ya sc'an coltayele.

¹⁴ Te mach'a muquen ya yac' te majt'anile, jich ya xlamaj te tulan ilimbae.

¹⁵ Teme toj ay te chajbanele, bin nax yo'tan yu'un te mach'a toj yo'tane; yan te mach'atic amen yat'elique, ya me xc'ot jinel ta stojolic.

¹⁶ Te ants-winic te ma st'un te sbelal te p'ijil c'ope, ya me xc'o stejc'an sba ta yolilic te mach'atic lajemique.

¹⁷ Te mach'a ya yac' sba a te bitic bujts'an ta pasele, te ya smulan te yac'ubel soc te ya yac'bey sba perfume, me'ba me ya xc'ot ta loq'uel yu'un.

¹⁸ Te mach'a amen yo'tan soc te ya spas lot, ya xc'ax swocol stuquel; ja' me ya xjil ta libre te mach'a toj soc te lec yo'tane.

¹⁹ Ja' lec nainel ta jochol taquin q'uinal; ja' ma lecuc ta joinel ta na te jtul ants te ma xlaj yo'tan ta ilimba soc utaw.

²⁰ Ta sna te mach'a ay sp'ijile ay sc'ulejal soc perfumeetic yu'un; yan te mach'a ma sna' q'uinale, spisil ya slajin te bitic ay yu'une.

²¹ Te mach'a ya sle te toj-o'tanil, soc te jun yo'tan sba soc yantic, ya me sta cuxinel, soc ya me sta ich'el ta muc' yu'un.

²² Te mach'a ay sp'ijile ya xju' ya yac'bey guerra te jpam lum te buen scanantayej sbae, ya me slajinbey te yip te yich'oj sba ta muc' soque.

²³ Te mach'a ya stsajtay te bila ya yale, ma xyac' sba a te chujc'ul c'opetique.

²⁴ Muc' scuyoj sba te jlabanwanej; soc te mach'a stoyoj sba ta jyalele ma x'ich'awan ta wenta.

²⁵ C'ax bayal sbic'tal yo'tan te mach'a ch'aje, ya xlaj ya yaiy yu'un, melel ma sc'an at'el soc te sc'abe;

²⁶ sjunal c'aal xbiq'uet nax yo'tan yu'un te bila ay yu'un te yane. Yan te mach'a toj yo'tane, ja' ya yac' stuquel, asta ma p'isbiluc ya yac'.

²⁷ Te Cajwaltic ya yilay te smajt'an ya x'ac'bot yu'un te mach'atic amen yo'tanique, melel ma lecuc te yo'tanique.

²⁸ Te mach'a lotil testigo ya me yich' lajinel; yan te mach'a ya yac' xchiquin ta yaiyel stojole, puersa ya xju' yu'un sjaq'uel.

²⁹ Te mach'a amen yo'tan, ya scuy sba te lec aye; yan te mach'a toj yo'tane, jun yo'tan ay stuquel.

³⁰ Ma'yuc p'ijil c'op ni tac'uyel ni sp'ijil sjol te ants-winiquetic te ya yaiy tsalaw ta stojol te Cajwaltique.

³¹ Te winic ya xchajban scaballo yu'un ya x'och ta guerra; pero ja' te Cajwaltic te ya yac' ta tsalaw.