Proverbios 20 - Bible in Tzeltal de Oxchuc y Tenejapa

¹ Te vino yu'un yac'ubel, ya yac' jajch'uc c'op, te tulan uch'balil, ya yac' jajch'uc majtomba; te mach'a ya xbolob yu'une, ma'yuc sp'ijil yu'un te bila ya spase.

² Te sc'ajc'al yo'tan te muc' ajwalil, jich c'oem te bit'il león-choj te yac ta aw; te mach'a ya yac' ilinuc, yu'un nix ya xlaj a.

³ “Lec yo'tan”, xi' sc'oplal te mach'a ma sc'an te c'opetique; mach'auc a te ma sna' q'uinal, ya sjach te c'ope.

⁴ Te mach'a ch'aj ma x'at'ej ta yorail at'el; jich yu'un te c'alal ya sta yorail c'ajoj, ya sle, pero ma sta ta leel.

⁵ Te mach'a ay bila snopoj ta yo'tan, jich c'oem te bit'il snabilal te ja'e; yan te mach'a ay sp'ijile, ya me sta te bila nopbil yu'une.

⁶ Ay tsobolic ya yal sbaic te lec yo'tanic; ja'uc me to, wocol ta tael te mach'a ay smuc'ul co'tantic yu'une.

⁷ Bin nax yutsilic te mach'atic jilemic ta q'uinal yu'un sme'-static te toj yo'tanic soc lec yo'tanic c'axic ta q'uinale.

⁸ C'alal ya xnajc'aj ta chajbajibal te muc' ajwalile, tic' a te ya yil junuc buelta te ants-winiquetique, jich ya xchicnaj ta sit te bila amen spasojique.

⁹ Ma'yuc mach'a ya xju' ya yal te sacuben yo'tan, te ma'yuc mulil snopoje.

¹⁰ Te bila ma ts'acaluc ta liquel yalal soc te bila ma ts'acaluc ta p'isele, ja'ic ta xcha'chajbal te ya yilay te Cajwaltique.

¹¹ Ta swenta yat'el ya xna'bot sba teme toj yo'tan te quereme.

¹² Te chiquinil, yu'un yaiyel c'op; te sitil, yu'un yilel q'uinal; ja' swentail te pasbilic yu'un te Cajwaltique.

¹³ Ma me xawac' stsalat te wayele. ¿Ja' bal ya ac'an te me'ba ya xjilat ta jyalele? At'elina swiq'uel asit, jich me ya spas sobrail te awe'ele.

¹⁴ “Ma lecuc in to”, xi' te mach'a ya xmanbaje; pero te c'alal la smanix a, bayal yutsil ya yalbey sc'oplal.

¹⁵ Ja' lec xan te mach'a ya xc'opoj ta swenta te sp'ijile, c'ax jich yutsil te bit'il oro soc yantic te bitic t'ujbil yutsilic ta spamal te balumilale.

¹⁶ Te mach'a ya stejc'an sba yu'un sbet te jyanlume, pojbeya te sc'u'e, soc ich'a bael ta prendal.

¹⁷ Ay mach'a ya smulan stael swe'el ta lo'laywanej; ja'uc me to, ta patil jich ya xc'ot ta ye te bit'il ts'ubil lum.

¹⁸ Teme ay bi ya achape, ay me yip ya xc'ot ta swenta te lequil consejo; teme ay ya apas guerra, c'ana neeluc te lequil consejoe.

¹⁹ Te mach'a chican nax te bila ya yale, ma sna' scanantayel ta yo'tan te bila muquen aye; jich yu'un ma me xajoin te mach'a chican nax te bila ya yale.

²⁰ Te mach'a ya sbolc'optay te state, o ja' te sme'e, xiweltic me sba ya xbajt' ta lajel ta ijc' q'uinal.

²¹ Te bila ma wocoluc ya jtatic ta leele, ta slajibal ma'yuquix sbujts' co'tantic yu'un.

²² Ma me xawal te ya awac'bey spacole; ja' ac'a smuc'ulin awo'tan te Cajwaltique, ja' me ya yac'bat awaiy tsalaw stuquel.

²³ Te Cajwaltic ya yilay te bila ma ts'acaluc licbile; soc te lotil kilo te ma lecuc.

²⁴ Te Cajwaltic ja' ya stojtes ta beel te ants-winiquetic; ma'yuc mach'a ya sna' stojol te bi yilel ya xc'ote.

²⁵ Ja' me syacjibal ya xc'ot te mach'a ya spas trato ta stojol te Diose, teme patil ya snop te ya sujt'es te sc'ope.

²⁶ Te muc' ajwalil te ay sp'ijile, ya sten loq'uel ta stojol te mach'a amen yo'tane, ya snet' c'axel ta yacan carreta c'oem.

²⁷ Te xch'ulel te ants-winiquetic ac'bil yu'un te Diose, ja' luz c'oem yu'un te ya x'ac'bot snaulay ta sc'ubulil yo'tan.

²⁸ Te muc' ajwalile jun nax yo'tan ay ta smuc'ul nactijib, teme yac ta stuuntesel te xc'uxul-o'tanil soc te bila smelelile.

²⁹ Te bila toyol nax q'uinal ya yaiyic yu'un te jch'ieletique, ja' te yipique; te yutsilalic te mamaletic, ja' te saquix sjolique.

³⁰ Te majel soc te ejch'entesel, ja' xpoxil te bila ma lecuc ta pasele; melel te castigo, ja' ya yutstes te o'tanile.