Proverbios 2 - Bible in Tzeltal de Oxchuc y Tenejapa

Bila c'ax lec ya jtatic ta p'ijil c'ope

¹ Jnich'an, u'uninbon me te c'opetic cu'une; q'ueja me ta ajol, q'ueja me ta awo'tan te mandaliletic cu'une.

² Ac'a me achiquin a te p'ijil c'ope; ac'a me ta ajol soc awo'tan sna'el stuuntesel.

³ C'ana me ta spisil awip te sp'ijil ajole, soc te toj-o'tanile;

⁴ jc'axel xawac' aba ta sleel, jichuc me ta awo'tan te bit'il yacat ta sleel plata soc te yacat ta sleel nac'bil c'ulejalil.

⁵ Jich me ya ana' a te bit'il ay ta ich'el ta muc' te Cajwaltique; jich me ya ata te bit'il ya ana'bey sba te Diose.

⁶ Melel ja' Cajwaltic te ya yac' te p'ijil-o'tanil, p'ijil c'op soc te p'ijil jolole, ja' ya xloc' tel ta ye stuquel.

⁷ Te Cajwaltic ya scoltay soc ya scanantay te mach'atic toj ya yac' sbaic soc te ma'yuc bila amen ya spasique;

⁸ ya scanantay te mach'atic ja' ya spasic spisil ora te bila stojil ta pasele, soc ya scanantay te mach'atic jun yo'tanic ta stojole.

⁹ Jich me ya ana' te bila toj soc ya me ana' te bila yich'oj swentaile, soc ja'uc me ay ta awo'tan spasel te bila leque;

¹⁰ melel ta ajol ya me awich' te ap'ijile, ya me awaiybey xchi'il ta awo'tan c'oem.

¹¹ Te nacal-o'tanil soc te p'ijil-jolole, ja' me ya scanantayat spisil ora;

¹² ja'ic me te ya yac'at ta libre te ma stsalat te be te amene, soc ja'ic me ya yac'at ta libre ta sc'abic te mach'atic j'ixta-o'tanetique,

¹³ ja' te mach'atic ya yijq'uitayic te lequil be, te ya st'unbeyic sbelal yijc'al q'uinale,

¹⁴ te bin nax yo'tanic yu'un te ya xju' yu'unic uts'inwaneje, te q'uin c'oem yu'unic te bila amen ya spasique,

¹⁵ te ja' st'unojic te ma stojil beuque, te jowejemic ta toj be.

¹⁶ Ya me scoltayat ta sc'ab te yan antse, te jchajp sc'op ya xlo'laywane,

¹⁷ te ya xch'ay jilel te mach'a sjoy ta ch'iele te jich ya xch'ay ta yo'tan te bila chapal yu'un soc te Diose.

¹⁸ Teme ya at'un bael te be ya xbajt' ta sna te antse, ja' me yacat ta st'unel c'oem a te sbelal lajele;

¹⁹ te mach'atic ya x'ochic bael ta sna, ma ba ya sujt'iquix tel, jc'axel ma'yuquix bi ora ya yantayic te sbelal cuxlejale.

²⁰ Beenan me ta lequil be jiche, ja' me xanopbey stalel te mach'atic toj yo'tanique.

²¹ Melel te mach'atic toj ya yac' sbaic soc te lec yat'elique, ya me xjalajic ta q'uinal stuquelic;

²² yan te mach'atic amen yo'tanic soc te jchebal-o'tanetic, ya me yich'ic bulel loq'uel ta q'uinal, soc ya me yich'ic ch'ojel loq'uel ta q'uinal stuquelic.