Proverbios 19 - Bible in Tzeltal de Oxchuc y Tenejapa

¹ Manchuc me me'baotic, teme lec te co'tantique; ja' ma lecuc teme ma jna'tic q'uinal, soc teme jle-c'opotique.

² Te mach'a toyol yo'tane, ma lecuc teme ma ba ya snop neeluc te bila ya spase; te mach'a bayal ya x'animaj yo'tane, ya sta falta yu'un.

³ Te mach'a ma sna' q'uinal, ya xjowej ta be yu'un; pero ja' ya xba yac'bey smulin te Cajwaltique.

⁴ Teme ay jc'ulejaltique, bayal mach'a ya st'unotic yu'un; yan teme me'ba ayotique, ma'yuc mach'a ya st'unotic yu'un.

⁵ Te mach'a lotil testigo, ya me yich' castigo yu'un; te mach'a ya spas lot, ma ba libre ya xc'ot yu'un.

⁶ Te mach'a ya xmajt'anteswan soc te ma'yuc st'ut'ile; bayal mach'atic ya xtalic ta leel yu'un, soc ya xjunaj yo'tan soc.

⁷ Te mach'a me'ba, ya x'ilayot yu'un te yermanotac; ¿ja'uc to balix a te spat-xujc'? Jc'axel ya x'ijq'uitayot yu'un.

⁸ Te mach'a ya sle te p'ijil-o'tanile, ja' ya xc'uxtay a te xcuxlejale; soc te mach'a ya sq'uej te sp'ijil sjole, lec ya xc'ot ta loq'uel.

⁹ Te mach'a lotil testigo, ya me yich' castigo yu'un; te mach'a ya spas lot, ja' ya xmaliyot yu'un te lajele.

¹⁰ Ma snujp'in te bila t'ujbil ay yu'un te mach'a ma sna' q'uinale; soc c'axem to xan ma snujp'in teme ja' ya spas mandal ta stojol mach'atic muq'uic te mach'a ay ta mosoile.

¹¹ Te mach'a ay sp'ijile, ya scom sba ta ilimba; soc ya x'ich'ot ta muc' teme ma'yuc sc'oplal ta yo'tan te ixtac'optayele.

¹² Te yilimba te muc' ajwalil, jich bit'il yaw león-choj te ya xiwotic yu'une; yan te yutsil yo'tane, jich te bit'il ts'ujul ta aquiltique.

¹³ Te nich'anil ma sna' q'uinal, ya yac'bey swocol te state; te yutaw te antse, jich c'oem te bit'il spisil ora xt'ult'on te t'ojobe.

¹⁴ Ta swenta sme'-stat ya yich' sna soc sc'ulejal te quereme; soc ta swenta Cajwaltic te ya x'ac'bot yinamin te ants te ay sp'ijile.

¹⁵ Te ch'ajilal ya yac' wayel, ya xch'ay ta q'uinal ta jyalel; soc te mach'a ch'aj ay swocol ta wi'nal yu'un.

¹⁶ Te mach'a ya xch'uun te mandalil, ja' me ya scanantay te xcuxlejale; te mach'a ya yilay te p'ijubtesel yu'un Cajwaltic, ya me xlaj stuquel.

¹⁷ Te bila ya cac'beytic smajan te me'ba, ja' ya cac'beytic smajan te Cajwaltique; soc ja' nix ya stojbotic te Cajwaltic te betile.

¹⁸ Ac'beya castigo te anich'an te c'alal ya to xju' ta tojtesele; ja'uc me to, ma me xamil ta jyalel yu'un.

¹⁹ Te mach'a bayal ya x'ilin, ya me xc'ot ta swenta stojel; teme ma xyich' castigo, ya me xtoy xan ta sleel smul.

²⁰ At'elina yaiyel stojol te p'ijubtesel soc ch'uuna te tojtesele; jich me p'ij ya xc'oat.

²¹ Juju-jtul bayal bitic ya snop ta yo'tanic te ants-winiquetic; ja'uc me to, te bila ya yal stuquel te Diose sbajt'el q'uinal ay.

²² Te bila ya sc'an co'tantique, ja' te c'ux ya quich'tic aiyel spisil ora; ja' lec stuquel te me'baile, ja' ma lecuc te lote.

²³ Te mach'a ya yich' ta muc' te Cajwaltique, ja' me xcuxlejal; bin nax me yo'tan soc ma'yuc bi ya xc'ax swocol yu'un.

²⁴ Te mach'a ch'aj, ya yac' ochel sc'ab ta plato; ja'uc me to, ma xju' yu'un ya yac' ochel ta ye.

²⁵ Te c'alal ya yich' castigo te j'ixta-o'tan, jich ya snop a te mach'a ma sna' q'uinale; yan te mach'a ay sp'ijilile, tic' ya snop a ta swenta te tojtesele.

²⁶ Te mach'a ya yelc'anbey sbiluc stat, soc teme ya snuts loq'uel ta sna te sme'e, ja' me te bol at'elil te q'uexlaltic sbae, jich ya xchicnaj a te ma lecuc yat'el te nich'anile.

²⁷ Jnich'an, teme la ach'ay ta awo'tan te comele, la me ach'ay jilel a te lequil tojtesele.

²⁸ Te lotil testigo ya slaban te lequil chajbanele; te mach'a amen yo'tane, ja' ya yal ta jamal te bila ma lecuque.

²⁹ Chapalix te' yu'un ya yich' majel a te mach'atic j'ixta-o'tanetique; buen majel me ya xc'ot ta spatic te mach'atic ma sna'ic q'uinale.