Proverbios 18 - Bible in Tzeltal de Oxchuc y Tenejapa

¹ Te mach'a t'ut'e, stuquel ya sle te bila ya sc'an yo'tane, ma xyich' ta muc' spisil te lequil tojtesele.

² Te mach'a ma sna' q'uinal, ma'yuc bila ya sc'an yo'tan ya snop; ja' nax toyol yo'tan yu'un te ya yac' ta ilel sp'ijil ta sc'op.

³ Te bila ma lecuc, ya yac' q'uexlal; te toybaile, ya xch'ay ich'el ta muc' yu'un.

⁴ Te sc'op te mach'a ya xc'opoje jich c'oem te bit'il snabilal ja', jich te bit'il muc'ja' ya x'oquine, soc jich te bit'il pozo yu'un te sp'ijile.

⁵ Te juecetic ma lecuc teme ja' ya xc'uxtayic te mach'a ay smule, soc teme ja' ya xch'aybeyic sderecho te mach'a ma'yuc smule.

⁶ Te mach'a ma sna' q'uinal, ya yac' sba ta c'op; ta swenta sc'op ya sle yaiy buen majel.

⁷ Te sc'op ya yal te mach'a ma sna' q'uinal, ja' nix ya xjinot yu'un; ta scaj sc'op ya xoj lazo ta snuc'.

⁸ Te le-c'op bujts'an ta aiyel, jichuc c'unil we'elil; ja'uc me to, ya xc'ub swocolil c'alal ta yutil o'tanil.

⁹ Te mach'a ch'aj, ja' nix yermano sba soc te mach'a ya xjinawane.

¹⁰ Muc' sc'oplal te Cajwaltic, jich te bit'il toyol ts'ajc'; te mach'atic toj yo'tanic ya me xbajt'ic ta stojol ta sleel canantayel.

¹¹ Te jc'ulej scuyoj te ja' ya xcanantayot yu'un te sc'ulejale, jich te bit'il jpam lum te ay toyol sts'ajc'ul ta sjoyobale.

¹² Te bila ya xtal ta spat te toybaile, ja' te jinele; te bila ya xtal ta spat te mach'a peq'uele, ja' te ya x'esmaj yutsilal.

¹³ Ja' bol-o'tanil soc ja' q'uexlaltic sba te mach'a ora ya sjac', c'alal ma to xyaiy stojol spisil te c'ope.

¹⁴ Te mach'a ay ta chamel, ya to xjajch'esot yu'un te yip yo'tane; yan te mach'a ch'ayemix yip yo'tane, ma'yuc mach'a ya xju'ix yu'un sjajch'esel.

¹⁵ Te mach'atic ay sp'ijil yo'tanic soc te mach'atic ay sp'ijil sjolique, ya staic te p'ijil c'op ya sleique.

¹⁶ Teme ay majt'anil ta ac'ab, jich ya xjambotat spisil te ti'nailetic, asta ya xju' ya xc'oat ta stojol te mach'atic muc' sc'oplalique.

¹⁷ Te mach'a sbabial ya scoltay sba ta c'op, smelelil yaiyel te bila ya yale; ja' to c'alal ya xc'ot te scontroe, jich ya xchicnantesot yu'un.

¹⁸ Te spasel snumeroil ta na'el ya yac' quejch'ajuc te c'opetique; ya yac'bey sq'uej sbaic te mach'atic scontroinej sbaique.

¹⁹ Teme bolc'optaybil te quermanotique, ya smac sba jich bit'il jpam lum te macal ta ts'ajq'ue. Te c'opetic ya yac' ta cha'chajp, jich bit'il srejail te muc'ul nae.

²⁰ Juju-jtul ya me swe'elin c'oem te bi ya xtal ta stojol ta swenta sc'op, ja' to c'alal ya xlub yu'un.

²¹ Teme ayotic ta swenta cuxlejal, o teme ayotic ta swenta lajel, ja' me chican te bila ya yal te quetique; te mach'atic ya xc'opojic bayal, ya me xc'ax swocolic yu'un.

²² Teme la sta yinam te winique, ja' me la staix te bila leque; ja' me la yich'ix a te c'uxtayel yu'un te Diose.

²³ Te me'ba ya xc'opoj ta yalel wocol; te jc'ulej, tulan nax ya sujt'es te c'ope.

²⁴ Ay nix jpat-jxujc'tic te ya xch'ay yutsil yo'tanic ta jtojoltique; ja'uc me to, ay jpat-jxujc'tic te bayal yutsil yo'tanic ta jtojoltic, c'ax jich a te bit'il mach'a jun jme'-jtatic soque.