Proverbios 17 - Bible in Tzeltal de Oxchuc y Tenejapa

¹ Manchuc me tulanil waj ay ta we'el, teme lamal nax te q'uinale; ma lecuc teme bayal q'uinetic, teme ja' nax cuxulotic ta puro c'op.

² Te abat te ay sp'ijile, ya xc'ot ta swenta mandalteswanej ta stojol te nich'anil te q'uexlaltic sbae; soc ya xc'ot ta swenta sbiluc te tatile, jich nix bit'il te yantic snich'nabe.

³ Oro soc plata ya yich'ic tsajel ta c'ajc'; ja' nix jich te bila ya snop te co'tantique, ya me yich' tsajel yu'un te Cajwaltique.

⁴ Te mach'a amen soc te mach'a ya spas lote, muc' sc'oplal ya xbajt' yu'unic te bol c'opetique.

⁵ Te mach'a ya slaban te me'ba, ja' me yac ta slabanel a te Jpaswanej yu'une; te mach'a bin nax yo'tan ta slabanel te mach'a ay swocole, ya me yich' castigo yu'un.

⁶ Te mamaletic, ja' me scoronaic c'oem te smamataque; te alnich'anetic toyol q'uinal ya yaiyic yu'un te sme'-statique.

⁷ Te mach'a ma sna' q'uinal, ma'yuc swentail te bi ya yale; yan te mach'a lec yo'tane, ma xlo'laywan ta c'op.

⁸ Te mach'a spisil ora ya yac' majt'anil taq'uin, jich ya scuy sba te ay bi ya xju' yu'un ta sc'ope; melel ay bi ya xloc' yu'un a te bayuc ya xbajt'e.

⁹ Te mach'a ya xc'ax yu'un te bolc'optayele, yac ta sleel bit'il ya xc'uxtay sba soc te scontroe; yan te mach'a ma xcujch' yu'une, ja' ya snuts bael te mach'a jun yo'tan sba soque.

¹⁰ Jteb nax utel ta swenta comel, tic' ya stuuntes a te mach'a ay sp'ijile; yan te mach'a ma sna' q'uinale, ma scom sba, manchuc me ay jo'winic ta jyalel majel ya yich'.

¹¹ Te mach'a jtoyba-o'tane ja' nax ya sjajch'es c'op; ja'uc me to, ay mach'a buen c'ajc' ya xticunbot bael ta stojol.

¹² Ja' lec ja'uc ya jta jbajtic soc me' oso te jajch'em sc'ajc'al yo'tan yu'un te elc'anbot te yale; te manchuc ja'uc ya jta jbajtic soc te mach'a ma sna' q'uinal te ay bila ya sc'an ya spase.

¹³ Mero ma x'ijq'uitaybot sna yu'un te bila amen te mach'a ma lecuc ya sujt'es te bila lec ya xpasbote.

¹⁴ Te c'op ya xjajch'e, jich c'oem te bit'il snojel ja'; ja' lec ya jq'uej jbajtic bael, swenta yu'un ma me xmuc'ub a.

¹⁵ Teme ya yich' aq'uel ta libre te mach'a ay smul, soc teme ya x'ac'ot ta lajel te mach'a ma'yuc smule, ta xchebal yilayej te Cajwaltique.

¹⁶ ¿Bi yu'un ya yich' tel taq'uin ta sc'ab te mach'a ma sna' q'uinal te ya sman p'ijilil ta sc'op a, te bit'il ma xju' yu'un snopele?

¹⁷ Te mach'a jun co'tantic soc, spisil ora ay xc'uxul yo'tan ta jtojoltic; soc te c'alal yorail woclajel a, jich me c'oem te bit'il mero quermanotique.

¹⁸ Te mach'a ma'yuc sp'ijile, ya stejc'an sba yu'un te spat-xujq'ue, jun yo'tan ya swentainbey te sbete.

¹⁹ Te mach'a ya smulan sbolc'optayel te yantique, ya smulan sjachel c'op; teme toyol yac'oj sbae,stuquel ya sjin sba.

²⁰ Te mach'a j'ixta-o'tan, xujt' ma'yuc bila lec ya sta; te mach'a ya sna' lot, ya me sta falta.

²¹ Te mach'a ma sna' q'uinal te snich'ane, ya x'ac'bot swocol yu'un; teme ma sna' bila ya spas te nich'anile, xujt' ma xbujts'naj yo'tan yu'un te tatile.

²² Te lequil poxil, ja' te bin nax co'tantic spisil ora; yan te mel-o'tane, ya spejc'an yip co'tantic stuquel.

²³ Te mach'a amen yo'tan ya xch'uun yich'el smajt'an taq'uin ta muquen yu'un sboltesel te tojil chajbanele.

²⁴ Te p'ijil c'ope, ja' me ya stojlin te mach'a ay sp'ijile, yan te mach'a ma sna' q'uinale, ma junuc nax bila baem ta yo'tan stuquel.

²⁵ Te nich'anil ma sna' q'uinale, j'ac'-ilimba ta stojol sme'-stat, soc ma'yuc sbujts' q'uinal ya yaiyic yu'un.

²⁶ Ma lecuc ya yich' c'anel smulta te mach'a ma'yuc smule; ma lecuc ya yich' majel swenta castigo te mach'a leque.

²⁷ Ja' ay sp'ijilic te mach'atic jteb nax ya xc'opojique; soc te mach'atic ya sna'ic q'uinal, ya yac' lamajuc q'uinal.

²⁸ Te mach'a ay sp'ijile, ya scom ye; melel te mach'a bol yo'tan, ya xcuyot ta p'ij teme ma xc'opoje.