Proverbios 16 - Bible in Tzeltal de Oxchuc y Tenejapa

¹ Ay bila ay ta swentaic xchapel te ants-winiquetique; pero Cajwaltic, ay ta swenta yalel ta slajibal teme ya xc'ot ta pasele.

² Te ants-winiquetic lec c'oem ta yo'tanic spisil te bi ya spasique; ja'uc me to, te Cajwaltic ya sna'bey yo'tan stuquel.

³ Te awat'ele, ac'beya ta sc'ab Cajwaltic, jich me ya xc'ot ta pasel a te bila chapal awu'une.

⁴ Te Cajwaltic la xchicnantes spisil, yu'un ay swentail ta yo'tan; ja' nix jich la xchicnantes te mach'a amen yo'tane, swenta yu'un ya yich' castigo ta slajibal c'aal.

⁵ Te Cajwaltic ya yilay te jtoyba-o'tanetique, puersa me ya yich' castigo.

⁶ Ta swenta xc'uxul-o'tanil soc ta swenta smelelil te ay ta pasel perdón yu'un mulil; teme quich'ojtic ta muc' te Cajwaltique, ya jq'uej jbajtic loq'uel ta stojol te bila ma lecuque.

⁷ Te mach'a lec yat'el ya x'ilot yu'un Cajwaltic, ya xlamaj yo'tanic yu'un te scontrotaque.

⁸ Ja' lec jteb nax stojol jc'abtic, teme yich'oj swentaile; ja' wocol teme ma stojiluc te ay bayal jtaq'uintique.

⁹ Te ants-winiquetic ay ta swentaic te bila ya xchapique; ja'uc me to, ja' me ya xtojtesotic ta spasel yu'un te Cajwaltique.

¹⁰ Te muc' ajwalil ja' ya yal te bila ya x'albot yu'un Dios, ma jowiluc nax bi ya yal te ma stojiluque.

¹¹ Te bila ay ta liquel yalal soc te bi ay ta p'isele, ay me ta ich'el ta c'op yu'un te Cajwaltique; spisil te p'isjibaletic, ja' la xchicnantes stuquel.

¹² Te muc' ajwaliletic ma lecuc yat'el ya yilbey te mach'a amene; melel te yat'el te muc' ajwalile, ja' yich'oj yip a te stojil chajbanele.

¹³ Te muc' ajwaliletic c'ux ta yo'tan soc lec ya yil te mach'a toj yo'tan ya xc'opoj soc te jun yo'tane.

¹⁴ Te yilimba muc' ajwalil, ja' ya yalbey sc'oplal te lajele; pero te mach'a ay sp'ijile, ja' ya yac' puersa ta slamantesbeyel yo'tan.

¹⁵ Te yutsil yo'tan te muc' ajwalil, ay cuxlejal ta swenta; te slequilal yo'tan, jich c'oem te bit'il tocal te ay ya'lele.

¹⁶ Ja' lec ta leel te p'ijil-o'tanil, ma'yuc sc'oplal te oro; ja' lec ta leel te p'ijil-jolole, ma ja'uc ay sc'oplal te plata.

¹⁷ Te mandal yu'un te mach'atic toj yo'tanique, ja' te ya sq'uej sbaic loq'uel ta stojol te bila ma lecuque; te bit'il ya stsajtay te yo'tane, yac me ta scanantaybel sba a.

¹⁸ Te bila ya xtal ta spat te toyba-o'tanil, ja' te jinele; te bila ya xtal ta spat te toybail, ja' te pejc'anele.

¹⁹ Ja' lec pajal peq'uel ya cac' jbajtic soc te mach'atic me'baetique; ma lecuc teme ya jpucbey jbajtic spojbil c'ulejalil te mach'atic jtoybaetique.

²⁰ Te mach'a ya sna' swentainel sbiluc, lec ya xc'ot ta loq'uel yu'un; jamal nax q'uinal ya yaiy te mach'a ja' smuc'ulinej yo'tan te Cajwaltique.

²¹ Te mach'a ay sp'ijile, “p'ij yo'tan”, xi' sc'oplal; te lequil c'ope, ya xlecub o'tanil yu'un.

²² Te mach'a toj ya yac' sba soc te yo'tane, sloq'uibja' c'oem yu'un te xcuxlejale; teme ya jp'ijubtestic te mach'a ma sna' q'uinale, tojol ya xc'ot.

²³ Te mach'a ay sp'ijile, ya sna' ta lec bi ya yal; te t'ujbil c'opetic yu'une, ya xlamaj o'tanil yu'un.

²⁴ Te c'opetic te bujts'anic ta aiyele, jich c'oem te bit'il chab; ya yac' bujts'najuc co'tantic soc ya yac'botic yach'il quiptic.

²⁵ Ay beetic te toj ya yil te ants-winique; ja'uc me to, te slajibale ja' sbelal te lajele.

²⁶ Te bit'il ya sc'an swe'el te mach'a ya x'at'eje, ja' nix ya sle ta at'el; ja' ya xtenot ta at'el yu'un te wi'nale.

²⁷ Te mach'a amen yo'tan, ja' horno c'oem yu'un te bila amene; te c'opetic yu'une, jich c'oem te bit'il yac ta tilel c'ajc'.

²⁸ Te j'ixta-o'tane ya sjach c'op; te mach'a jle-c'ope ya sjajch'es controinel.

²⁹ Te mach'a ay lo'laywanej ta yo'tan, ya slo'lay a te spat-xujq'ue, soc ya yic' bael ta be te amene.

³⁰ Ya smuts'-sitaywan te mach'a ya snop spasel te bila ma lecuque; soc ya spasbey seña ta ye te mach'a c'otix ta pasel yu'une.

³¹ Teme saquix sjol, ja' slequil corona, te ac'botix yu'un te bit'il lec yo'tan soc lec yat'el.

³² Ja' lec te lamal co'tantic, ma ja'uc lec te tulan ya cac' jbajtique; ja' lec te jtuqueltic ya jpas jbajtic ta mandal, ma ja'uc lec te ya jtsaltic bayal lumetique.

³³ Ay mach'a ya spas número ta na'el; pero ja' ya yac' número te Cajwaltique.