Proverbios 15 - Bible in Tzeltal de Oxchuc y Tenejapa

¹ Te t'ujbil sujt'ib c'op, ya xlamaj yu'un te ilimbae; yan teme tulan te sujt'ibe, ya xtoy xan yu'un.

² Te mach'atic ay sp'ijil yo'tanic, ya xloc' tel p'ijil c'op ta yeic; yan te mach'atic ma sna'ic q'uinale, ja' ya yal stuquelic te bol c'ope.

³ Te Cajwaltic sitinej spamal balumilal, yac ta yilel mach'atic lec yo'tanic soc mach'atic amen yo'tanic.

⁴ Te buen lamal c'op, te' swenta cuxinel c'oem; yan te bol c'ope, ya sboltes o'tanil stuquel.

⁵ Te mach'a ma sna' q'uinal, ya yilay te tojtesel yu'un te state; yan te mach'a ya xch'uune, ja' ya yac' ta ilel a te sp'ijil yo'tane.

⁶ Mero c'ax bayal bi ay ta sna te mach'a lec yo'tane; yan te mach'a amen yo'tane, ma xyaiybey yutsilal stuquel te bila ya stae.

⁷ Te mach'atic ay sp'ijil yo'tanic ya spuquic ta alel p'ijil c'op; yan te mach'atic ma sna'ic q'uinale, ma lecuc spisil te bila ya spasique.

⁸ Te majt'aniletic ya yaq'uic te mach'atic amen yo'tanic, ya yilay te Cajwaltique; yan te mach'atic toj yo'tanique, bin nax yo'tan ya stsacbey sc'op stuquelic.

⁹ Te Cajwaltic ya yilaybey yat'elic te mach'atic amen yo'tanique; yan te mach'a toj ay soc te xcuxlejale, c'ux ya yaiy ta yo'tan stuquel.

¹⁰ Te mach'a ya yijq'uitay te lequil be, tulan me tojtesel ya yich'; te mach'a ya xjajch' slab yo'tan yu'un te comele, ya me xlaj bael yu'un.

¹¹ Teme ay ta sit Cajwaltic te lajel soc te muquenale, ¿ja'uc to balix a te bitic ay ta yo'tanic te ants-winiquetique?

¹² Te mach'a toyba nax aye, ma lecuc yo'tan yu'un te comele; ma sc'an sjoin te mach'atic ay sp'ijilique.

¹³ Teme bin nax yo'tane, ya xchicnaj ta yelaw; teme ay ta mel-o'tane, ja' nix jich ya xchicnaj ta sit-yelaw.

¹⁴ Te mach'a ay sp'ijil sjole, ya sle xan te p'ijilile; yan te mach'a ma sna' q'uinale, ja' swe'el c'oem te sbolile.

¹⁵ Te mach'a ma tic'uc ya yaiy a te bila ay yu'une, spisil c'aal ay ta mel-o'tan; yan te mach'atic tic' ya yaiy a te bila ay yu'une, q'uin c'oem ta yo'tan spisil ora stuquel.

¹⁶ Ja' lec xan te me'ba ayotique, teme quich'ojtic ta muc' te Cajwaltique; manchuc me jc'ulejotic, teme ay jwocoltic ta q'uinal yu'une.

¹⁷ Manchuc teme boc-itaj nax ya jlo'tic, teme c'ux ya caiy jbajtique; manchuc me sbaq'uetal wacax ya jti'tic, teme quilintayej jbajtique.

¹⁸ Te mach'a ora nax ya xjelaw ta spasel te bila ya sc'an yo'tane, jajch'esej-c'op ay; yan te mach'a ya xcujch' yu'une, ya slamantes c'op stuquel.

¹⁹ Te mach'a ch'aj, nojel ch'ix ta sbe ya yaiy; yan te mach'a toj aye, jamal ta lec sbe ya yaiy stuquel.

²⁰ Te nich'anil te ay sp'ijile, ya yac'bey yutsil yo'tan te sme'-state; yan te nich'anil ma sna' q'uinale, ya yilay te sme'-state.

²¹ Te mach'a ma'yuc sp'ijile, bujts'an q'uinal ya yaiy yu'un te sbolile, yan te mach'a ay sp'ijile, ya stsajtay sba ta beel stuquel.

²² Teme ma ba ya jc'antic consejo neeluc, ya xch'ay te bila ya jchaptique; yan teme lec ya xc'ot ta loq'uele, ja' yu'un te tsobol jtojteswanejetic cu'untique.

²³ Bin nax co'tantic yu'un teme ya jtabeytic sujt'ib te c'op te mero snujp'e, soc c'axem to xan bin nax co'tantic yu'un teme ta yorail ya jtatique.

²⁴ Te sbelal cuxlejal, toj baem ta toyol; libre ya xc'ot te mach'a ay sp'ijile, jich ma xco bael ta muquenal.

²⁵ Te Cajwaltic ya sjinbey sna te toybae, yan te me'ba antse, ma xyac'bey ta jinel sq'uinal stuquel.

²⁶ Te Cajwaltic ma smulan bitic chapal yu'un te mach'atic amen yo'tanique; ja' bin nax yo'tan yu'un te c'opetic te ma amenuque.

²⁷ Te mach'a ya yac' sba ta bic'tal-o'tanil, ja' ya sjin a te snae; yan te mach'a ma stsac te majt'anil taq'uin yu'un mulile, ja' ya xcuxin stuquel.

²⁸ Te mach'a toj yo'tan ya snop neeluc te bit'il ya yac'bey sujt'ib te c'ope; yan te mach'a amen yo'tane, ora ya sloq'ues ta ye te bila ma lecuque.

²⁹ Te Cajwaltic ya spijt'es te mach'atic amen yo'tanique; yan te mach'atic toj yo'tanique, ja' ya yat'elinbey yaiyel stojol sc'opic.

³⁰ Te mach'a ya xchicnaj ta sit-yelaw te bin nax yo'tane, ya xbujts'naj co'tantic yu'un; ja' nix jich te bila t'ujbil ta aiyel stojole, ya yac'botic yach'il yip co'tantic.

³¹ Te mach'a ya xch'uun te lequil comel te ay cuxinel ta swenta, ay me yawil ta yolil te mach'atic ay sp'ijilique.

³² Te mach'a ya yilay te tojtesele, ma c'uxuc ya yaiy sba; yan te mach'a ya xch'uun comele, ya sta sp'ijil stuquel.

³³ Te mach'a yich'oj ta muc' te Cajwaltique, yac ta p'ijubtesel ta swenta te p'ijil-o'tanil; teme ya x'och ta ich'el ta muq'ue, neel ya sc'an ya spejc'an sba.