Proverbios 14 - Bible in Tzeltal de Oxchuc y Tenejapa

¹ Te ants te ay sp'ijile, t'ujbil ya xchajban sna; yan te ants ma sna' q'uinale, ya sjin sna stuquel.

² Te mach'a toj ay ta q'uinal, yich'oj ta muc' te Cajwaltique; yan te mach'a ma xtojob te yo'tane, yilayej stuquel.

³ Ya xloc' tel toyba c'op ta ye te mach'a ma sna' q'uinal; yan te mach'a ay sp'ijile, ya xcoltayot yu'un te slequil c'ope.

⁴ Ma'yuc trigo teme ma'yuc wacax te ya swuy ta teq'uele; ta swenta yip te wacaxe, ya x'esmaj te we'elile.

⁵ Te mach'a testigo ta melel, ma spas lot stuquel; yan te lotil testigoe, jpas-lot stuquel.

⁶ Te mach'a ya yal ixta c'op, ma sta te p'ijil c'ope; yan te mach'a ay sp'ijil sjole, ma ba wocol ya sta te p'ijil c'op stuquel.

⁷ Ma x'alac' te mach'a ma sna' q'uinal, melel ma'yuc bila ya yac'bat ana' te sc'ope.

⁸ Te mach'a ay sp'ijile, ya stsajtay te bila ya spase; yan te mach'a ma sna' q'uinale, ya xlo'layot yu'un te sbolile.

⁹ Te mach'atic ma sna'ic q'uinal, ya slaban sbaic yu'un te smulique; yan te mach'atic toj ayique, ay yutsil yo'tan stuquelic.

¹⁰ Te o'tanil ya sna' te swocole, soc teme ay yutsil q'uinal ya yaiy, ma ba ya yalbey yantic te ma sna'bey sbae.

¹¹ Ya xjinbot snaic te mach'atic amen yo'tanique; yan te mach'atic toj ayique, ya x'esmaj stuquelic.

¹² Ay beetic te toj ya yil te ants-winique; ja'uc me to, te slajibale ja' sbelal te lajele.

¹³ Ay mach'a spasoj nax tulan ta tse'ej, ja'uc me to ay ta mel-o'tan; teme c'ax te yutsil yo'tane, ya xtal xan mel-o'tan ta stojol.

¹⁴ Te mach'a ma sna' q'uinal, ya scuy ta lec te bila ya spase; yan te mach'a lec yo'tane, lec yat'el stuquel.

¹⁵ Te mach'a ma stsajtay sbae, spisil ya xch'uun te bila ya x'albote; yan te mach'a ay sp'ijile, ya stsajtay sba te bay ya xbeene.

¹⁶ Te mach'a ay sp'ijile, ya xi' te bila ma lecuque, ya sq'uej sba loq'uel ta stojol; yan te mach'a ma sna' q'uinale, ma'yuc bila ay sc'oplal ta yo'tan.

¹⁷ Te mach'a ora nax ya x'ilin, ma sna' snopel bi ya spas; yan te mach'a ya sna' snopele, ja' ya sc'an te lamal nax te q'uinale.

¹⁸ Te mach'atic ma tsajtay sbae, ja' ya yich'ic jilel te bol-o'tanile; yan te mach'atic ay sp'ijilique, nojel ta yo'tanic te bitic ya sna'ique.

¹⁹ Te mach'atic amen yo'tanic, ya me stinan sbaic ta stojol te mach'atic lec yo'tanique; te mach'atic ma lecuc yo'tanique, ya xba yalbeyic wocol ta sna te mach'atic toj yo'tanique.

²⁰ Te me'ba, ya x'ilayot yu'un spat-xujc'; yan te mach'a jc'uleje, ma ba wocol ya xt'unot stuquel.

²¹ Te mach'a ya yilay spat-xujc', ya sta smul ta stojol; ja'uc me to, bin nax yutsil te mach'a ya sna'bey yo'bolil sba te me'bae.

²² Te mach'atic ya sleic te bila ma lecuc ta pasel, ya me xjowejic ta be yu'un; yan te mach'atic ja' ya sleic te bila leque, ja' me ya yich'ic c'uxtayel, soc lec-o'tanil ta stojolic.

²³ Ta spisil te bila ya xc'ax swocol ta spasel, ay me bila lec ya xloc' yu'un a; yan te puro c'ope, ya yac' me'balil yu'un stuquel.

²⁴ Te mach'a ay sp'ijile, ja' scorona te ay sp'ijil sjole; yan te mach'a ma sna' q'uinale, ja' scorona te sbolile.

²⁵ Te mach'a testigo ta melel, ya scoltaybey xcuxlejal yantic a; yan te lotil testigoe, ya yac' lajel stuquel.

²⁶ Teme ya quich'tic ta muc' te Cajwaltique, ja' ya sta yip co'tantic yu'un, soc jich ya x'ac'bot lec canantayel bael te jnich'antique.

²⁷ Teme ya quich'tic ta muc' te Cajwaltique, ja' sloq'uibja' c'oem yu'un jcuxlejaltic; ya yac'otic ta libre ta slazoil te lajele.

²⁸ Teme bayal ants-winiquetic ya smandaltes te ajwalile, ay yutsil sc'oplal yu'un; teme jteb naxe, ya me xjin yu'un.

²⁹ Teme ya xcujch' cu'untic te wocole, ya me cac'tic ta ilel a te bayal sp'ijil co'tantic; yan teme ma xcujch' cu'untique, ja' ya cac'tic ta ilel a te smuc'ul sbolil co'tantique.

³⁰ Teme lamal co'tantic ya caiytic, ja' me xcuxlejal te jbaq'uetaltique; yan te bic'tal-o'tanile, ja' ya yac' c'a'el c'alal ta jbaqueltic stuquel.

³¹ Teme ya jtentic ta uts'inel te me'bae, ja' me ya cuts'intic a te Jpaswanej cu'untique; yan teme ya jna'beytic yo'bolil sba te me'bae, ja' me ya quich'tic ta muc' a te Jpaswaneje.

³² Te mach'a amen yo'tan, ya me xjinot yu'un te bila ma lecuc ya spase; yan te mach'a lec yo'tane, ja' ya xcanantayot yu'un te slequil yo'tane.

³³ Te p'ijilil ya x'ain ta yo'tanic te mach'atic ya sna'ic q'uinale; yan te mach'atic ma sna'ic q'uinale, ma sna'beyic sba stuquelic.

³⁴ Te stojil chajbanele, ya xtoy yutsil sc'oplal yu'un te nacione; yan te mulile, ya x'ac'ot ta q'uexlal yu'un stuquel.

³⁵ Te abat ya sna' at'el, ya xc'uxtayot yu'un te muc' ajwalile; yan te mach'a ma sna' at'ele, ja' nax stojol ya xc'ot te ilintayel yu'une.