Proverbios 13 - Bible in Tzeltal de Oxchuc y Tenejapa

¹ Te nich'anil te ay sp'ijile ya xch'uun tojtesel yu'un stat; yan te mach'a jlabanwaneje, ma xyich' ta muc' te scomele.

² Juju-jtul ya xnoj xch'ujt' yu'un te bila lec ya yale, yan te mach'a c'ax ma lecuc yo'tane, ja' swe'el c'oem te c'ajc'ubele.

³ Te mach'a ya stsajtay te sc'ope, stuquel nix ya scanantay sba a; yan te mach'a bayal ya xc'opoje, stuquel nix ya sjin sba.

⁴ Te mach'a ch'aj, ma sta te bila ya sc'an yo'tane; yan te mach'a ya x'at'eje, ya x'esmaj sbiluc stuquel.

⁵ Te mach'a toj yo'tan, ya yilay te lote; yan te mach'a amen yo'tane, q'uexlaltic sba yat'el soc ya xbolob sc'oplal.

⁶ Te mach'a lec sc'oplal, ja' ya xcanantayot yu'un te stojil yo'tane; yan te mach'a ay mulil ta yo'tane, ja' ya xjinot yu'un te sbolile.

⁷ Ay mach'atic ma'yuc bila ay yu'un, pero jc'ulejetic yilel; ay yantic ay yu'un ta spisil, pero me'baetic yilel.

⁸ Te jc'ulej winic ja' xcuxlejal te sc'ulejale; yan te mach'a me'bae, xujt' ma'yuc sc'oplal ta yo'tan teme ya x'albot smilele.

⁹ Te mach'a toj yo'tan, ya sacub q'uinal ta lec yu'un; yan te mach'a amen yo'tane, ya xtup' sc'ajc' stuquel.

¹⁰ Te toybaile ja' ya sjajch'es c'op stuquel; te p'ijilil ja' ay ta stojol te mach'atic peq'uel yac'oj sbaique.

¹¹ Te c'ulejalil te ora nax ya xtoye, ya xpejc'aj bael; yan te mach'a c'unc'un ya stsobe, ya xmuc'ub bael yu'un stuquel.

¹² Teme ma xtal te bila ay ta maliyele, ya xwoclaj o'tanil yu'un; yan teme ya xc'ot ta pasel te bila sc'anoje, jich c'oem te bit'il te' yu'un cuxinel.

¹³ Te mach'a ma sc'an xch'uun mandal, ya me xwoclaj yu'un; yan te mach'a ya yich' ta muc' te mandale, ya me x'ac'bot stojol yu'un stuquel.

¹⁴ Te bitic ya yac' ta nopel te mach'a ay sp'ijile, sloq'uibja' c'oem yu'un te cuxlejale, soc ya scoltayotic ta slazoil te lajele.

¹⁵ Te mach'a ya sna' stsael te bila leque, ja' ya x'ac'ot ta ich'el ta muc' yu'un; yan te mach'atic c'ax amen yo'tanique, ja' st'unojic bael te sjinelique.

¹⁶ Te mach'a ya sna' q'uinal, ya x'at'ej soc sp'ijil yo'tan; yan te mach'a ma sna' q'uinale, bin nax yo'tan yu'un te sbolile.

¹⁷ Te mach'a amen yo'tan te ya xba yal jilel bol c'op, ya sjajch'es woclajel; yan te mach'a jun yo'tan ya xba yal jilel lequil c'ope, ya sjambey q'uinal yaiy yantic.

¹⁸ Te mach'a ya yilay te tojtesel, me'ba me ya xc'ot soc q'uexlaltic me sba; yan te mach'a ya xch'uun te tojtesele, muc' yutsil ya xc'ot stuquel.

¹⁹ Teme ya xc'ot ta pasel te bila sc'anoj co'tane, bin nax co'tan yu'un. Te mach'a ma sna' q'uinale, ma xju' yu'un ya yijq'uitay te bila ma lecuque.

²⁰ Joina aba soc te mach'atic ay sp'ijilique, jich me ya ata ap'ijil; joina aba soc te mach'atic ma sna'ic q'uinale, jich me ya ach'ay aba ta jc'axel.

²¹ Te jmulawiletic t'unbilic yu'un te bila ma lecuc; yan te mach'atic toj yo'tanique, ja' stojol stuquelic te bila leque.

²² Te lequil winique ya yijq'uitaybey jilel smamatac te bila ay yu'une; yan te sc'ulejal jmulawile, ja' ya xjil ta swenta te mach'a toj yo'tane.

²³ Ta sq'uinal te me'ba ma p'isbiluc we'elil yu'un; yan teme ma'yuc toj-o'tanile, bayal ya xch'ay.

²⁴ Te mach'a ma stojtes te snich'an, yu'un ma c'uxuc ta yo'tan; yan te mach'a c'ux ta yo'tane, ta yalalil to ya stojtes.

²⁵ Te mach'a toj yo'tan, ya xwe' ja' to bay c'alal ya sc'an yo'tan; yan te mach'a amen yo'tane, ay to swi'nal ya xjil stuquel.