Proverbios 12 - Bible in Tzeltal de Oxchuc y Tenejapa

¹ Te mach'a bin nax yo'tan yu'un tojtesel, ja' lec ta yo'tan te p'ijil c'ope; yan te mach'a ya x'ilin yu'un te comele, ja' te ma sna' q'uinale.

² Te mach'a lec yo'tan, lec sc'oplal yu'un Cajwaltic; yan te mach'a ma lecuc bila snopoj ta yo'tane, ya yac'bey castigo yu'un.

³ Te bila ma lecuc ta pasel, ma'yuc bila lec ya xloc' yu'un a; yan te mach'a toj yo'tane, tulan ts'unulix stuquel.

⁴ Te ants mero lec yat'el, ja' xch'alil c'oem te smamlale; yan te ants te ma lecuc ta stojol te smamlale, ya sjin ta jc'axel.

⁵ Te mach'a toj yo'tan, ja' ya snop te bitic toj ta pasele; yan te mach'a amen yo'tane, ja' nax ay ta yo'tan lo'laywanej.

⁶ Te sc'op te mach'a amen yo'tan, jich c'oem te bit'il pejts' swenta lajel; yan te sc'op te mach'a toj yo'tane, ay colel yu'un stuquel.

⁷ Te mach'a amen yo'tan, ja' slajib ya xc'ot te ya xch'ay coele; yan te sna te mach'atic toj yo'tane, stalel ya xjil stuquel.

⁸ Ay ta alel yutsil sc'oplal te mach'a ay sp'ijil sjole; yan te mach'a bol yo'tane, ilaybil stuquel.

⁹ Ja' lec c'oem te mach'a ma ich'biluc ta muq'ue, ja'uc me to, ay abat yu'un; ma lecuc teme scuyoj sba ta jc'ulej, teme ma'yuc swe'ele.

¹⁰ Te mach'a toj yo'tan, ya sna' te ay yo'bolil sba te xchamsbalame; yan te mach'a amen yo'tane, ma'yuc bi ya sna'bey yo'bolil sba.

¹¹ Te mach'a ya x'at'ej ta sq'uinal, ma p'isbiluc we'elil ay yu'un; yan te mach'a ma sna' q'uinale, tojol nax te bitic baem ta yo'tan spasele.

¹² Te bic'tal-o'tanile, ja' syaquic te mach'atic amen yo'tanique; yan te yiptajib te mach'atic toj yo'tanique, sbajt'el q'uinal ay stuquel.

¹³ Te mach'a amen yo'tan, ja' nix ya xchuc sba ta slot; yan te mach'a toj yo'tane, lec ya xc'ot ta loq'uel yu'un te uts'inele.

¹⁴ Juju-jtul ya stsobey sit te bila ya yale, soc ya yich' stojol yu'un te bila ya spase.

¹⁵ Te mach'a ma sna' q'uinal, ya scuy ta lec spisil te bila ya spase; yan te mach'a ay sp'ijile, jun yo'tan ya xch'uun te tojtesele.

¹⁶ Te mach'a ma sna' q'uinal, ora ya x'ilin; te mach'a ay sp'ijile, ya xcujch' yu'un te bolc'optayele.

¹⁷ Te mach'a testigo ta melel, ya yal ta jamal te bila melele; yan te lotil testigoe, ya spas lot stuquel.

¹⁸ Ay ants-winiquetic ya x'ejch'enteswan a te sc'opique; yan te sc'op te mach'a ay sp'ijile, ya xpoxtaywan stuquel.

¹⁹ Te mach'a melel ya xc'opoje, stalel ya x'ain sbajt'el q'uinal; yan te mach'a ma meleluc ya xc'opoje, ajc' nax ay ta q'uinal stuquel.

²⁰ Te bila xchapoj te mach'atic amenic, ay lo'laywanej ta yo'tanic; yan te bila ya yac' ta nopel te mach'a lamal yo'tane, ay sbujts' q'uinal yu'un.

²¹ Te mach'a toj yo'tan, ma xc'ax swocol yu'un te bila ma lecuque; yan te mach'a amen yo'tane, spisil ya x'ac'bot ta swenta.

²² Te Cajwaltic ya yilay te mach'atic ya spasic lot; pero bin nax yo'tan yu'un te mach'atic toj ya x'at'ejique.

²³ Te mach'a ay sp'ijil yo'tane, ma xyac' sba ta ich'el ta muc' yu'un te bila ya sna'e; yan te mach'a ma sna' q'uinale, bin nax yo'tan yu'un te sbolile.

²⁴ Te mach'a ya x'at'ej, ya xju' xmandalaj; te mach'a ch'aje, pasbil ta mandal stuquel.

²⁵ Te mach'a ay bila ya xwoclaj yo'tan yu'un, ya xlajinbot yip; te t'ujbil c'op ya xtal yutsil yo'tan yu'un.

²⁶ Te mach'a toj yo'tan, ya xtuun ta ic'wanej yu'un spat-xujc'; yan te mach'atic amen yo'tanique, ya xch'ayic ta be stuquelic.

²⁷ Te ch'ajil jnutsojel ma'yuc bila ya sta ta tsaquel; yan te mach'a ya sna'bey swentaile, ya sta muc' sc'ulejal yu'un.

²⁸ Te sbelal toj-o'tanil, ja' sbelal cuxlejal; ma'yuc lajel ta swenta.