Proverbios 10 - Bible in Tzeltal de Oxchuc y Tenejapa

Sbabial p'ijil c'opetic yu'un Salomón

¹ P'ijil c'opetic yu'un Salomón: Te nich'anil te ay sp'ijile ya yac'bey yutsil yo'tan te sme'-state; yan te nich'anil ma sna' q'uinal ya yac'bey swocol te sme'-state.

² Te c'ulejalil te ma stojiluc tabile, ma'yuc cutsilaltic yu'un; yan te toj-o'tanile ma xyac'otic ta lajel, ya yac'otic ta libre stuquel.

³ Te Cajwaltic ma xyac' xchicnaj wi'nal ta stojol te mach'a toj yo'tane; yan te mach'a amen yo'tane, ma scombey wi'nal ta stojol stuquel.

⁴ Jteb nax at'el, ya yac' me'bail; bayal at'el, ya yac' c'ulejalil.

⁵ Te mach'a ya yaiy c'ajoj ta yorail verano, ja' te mach'a ay sp'ijile; te mach'a wayal ta yorail c'ajoj, ya me sta q'uexlal stuquel.

⁶ Te mach'a toj yo'tan, ya xco tel bendicionetic ta stojol jichuc ja'al; yan te mach'a amen yo'tane, ya xmilot yu'un te bila ma lecuc ya spase.

⁷ Te mach'a toj yo'tan, ya yich' na'el ta puro bendición; yan te mach'a amen yo'tane, ora nax ya xch'ayot ta o'tanil stuquel.

⁸ Te mach'a ay sp'ijile, ya xch'uun mandal; yan te mach'a bol c'op ay ta ye, ya xjinot yu'un stuquel.

⁹ Te mach'a ma'yuc bila amen ya spase, ma'yuc bi ya xi'; yan te mach'a ma lecuc te yat'ele, ya me xlajinot yu'un.

¹⁰ Te mach'a ya xmuts'-sitaywan, bayal bila amen ya xjajch' yu'un; te mach'a bol c'op ay ta ye, ja' nix ya xjinot yu'un.

¹¹ Te bila ya yal te mach'a toj yo'tane, sloq'uibja' c'oem yu'un cuxlejal; yan te mach'a amen yo'tane, ya xmilot yu'un te bila amen ya spase.

¹² Te lab-o'tanil, jajch'esej-c'op; yan te xc'uxul-o'tanile, ay perdón yu'un spisil.

¹³ Ay p'ijil c'op ta ye te mach'a ay sp'ijil yo'tane; yan te mach'a ma sna' q'uinale, ya yich' majel ta te'.

¹⁴ Te mach'atic ay sp'ijil yo'tanic ya scanantay te p'ijil c'ope; yan te mach'atic ma sna'ic q'uinale, ya xtal wocol ta stojolic yu'un te sc'opique.

¹⁵ Te jcoltaywanej yu'un te jc'ulej, ja' te sc'ulejale; te bit'il ay swocol stuquel te me'ba, ja' te ma'yuc bi ay yu'une.

¹⁶ Te stojol ya sta te mach'a toj yo'tan, ja' te xcuxlejale; te sit ya stabey te mach'a amen yo'tan, ja' te mulile.

¹⁷ Te mach'a ya yac' ta yo'tan te tojtesele, ay ta sbelal cuxlejal; yan te mach'a ma xyac' ta yo'tan te tojtesele, ay ta sbelal ch'ayel.

¹⁸ Te mach'atic ya smuc slab yo'tanic, yacalic me ta lot; soc te mach'atic ma sna'ic q'uinal, ya spucbey sc'oplal yantic.

¹⁹ Te mach'a bayal ya xc'opoje, bayal ya xjowej ta c'op; yan te mach'a jteb nax ya xc'opoje, ja' te mach'a ay sp'ijile.

²⁰ T'ujbil plata c'oem ye te mach'a toj yo'tane; yan te bila ay ta yo'tan te mach'a amene, ma'yuc yutsil ta jc'axel stuquel.

²¹ Te c'op ya xloc' ta ye te mach'a toj yo'tan, bayal mach'a ya xp'ijubic yu'un; yan te mach'a ma sna' q'uinale, ya xlaj ta scaj te ma'yuc bila ya sna' stuquele.

²² Te bendición yu'un Cajwaltic ya yac' jc'ulejaltic, te ma'yuc mel-o'tan yu'une.

²³ Te mach'a ma sna' q'uinal, bin nax yo'tan ta spasel te bila amene; yan te mach'a ay sp'ijile, ya yaiybey yutsil te p'ijil c'ope.

²⁴ Te mach'a amen yo'tane, ya me xc'ot ta swenta te bila ya xi'e; yan te mach'a toj yo'tane, ja' ya x'ac'bot te bila ya sc'an yo'tane.

²⁵ C'alal ya xc'ax tulan ic' ta stojol te mach'a amen yo'tan, ya xch'ay ta jc'axel; yan te mach'a toj yo'tane, stalel ya xjil stuquel.

²⁶ Te mach'a ch'aj, jich c'oem te bit'il bayal xch'aal ta ye te mach'a ya xticunot yu'une, soc jich c'oem te bit'il ch'ail te ya xlajinbot sit yu'une.

²⁷ Te mach'a ya yich' ta muc' te Cajwaltique, ya xnajt'aj xcuxlejal yu'un; yan te mach'a amen yo'tane, ya xcombot xcuxlejal stuquel.

²⁸ Te bila ya xtal ta stojol te mach'a toje, bin nax yo'tan yu'un; yan te bila ya xtal ta stojol te mach'a amen yo'tane, ya xlajinot yu'un stuquel.

²⁹ Te Cajwaltic ya scanantay te mach'atic lec bi ya spasique; yan te mach'atic ma lecuc bi ya spasique, ya slajin stuquel.

³⁰ Mero ma sta falta te mach'a toj yo'tane; yan te mach'a amen yo'tane, ma xjalaj ta q'uinal stuquel.

³¹ Ya xloc' p'ijil c'op ta ye te mach'a toj yo'tane; yan te mach'a ya yal bol c'ope, ya set'bot yac'.

³² Te mach'a toj yo'tan, bujts'an te bitic ya yale; yan te mach'a amen yo'tane, ya yal bol c'opetic.