Proverbios 1 - Bible in Tzeltal de Oxchuc y Tenejapa

Te bila swentail te p'ijil c'opetique

¹ P'ijil c'opetic yu'un Salomón te snich'an David, te muc' ajwalil yu'un Israel,

² yu'un ja' ay sc'oplal ta yo'tan te ya yalbotic caiytic te p'ijil c'ope soc p'ijubtesel; te ya scoltayotic ta sna'el swentail te bitic ya stabotic c'oel te co'tantique;

³ te ya jtatic p'ijubtesel, soc te ya jtsajtay jbajtic, soc te ya jpastic bila stojil, soc te ya jtatic toj-o'tanil, soc te ma xjowejotic ta c'op;

⁴ soc te ya x'ac'bot sp'ijil yo'tanic te queremeticte ma'yuc bila sna'ojic, te ya yich' ac'beyel sp'ijil sjolic, soc ac'beyel snop ta yo'tanic te bila t'ujbil ta pasele.

⁵ Te mach'a ay sp'ijile, ya me xc'ot ta yo'tan. Jich me ya yich' xan sp'ijil yo'tan soc ay me bi ya sna' xan yu'un:

⁶ swenta sna'el swentail te bitic yalojic te mach'atic p'ijique, soc te c'opetic yu'unic, soc te bitic seña-c'op ya yalic, soc te bila ya yalic te chujc'ul ta na'el sujt'ibe.

⁷ Te xjajch'ibal te p'ijil-o'tanile, ja' te yich'el ta muc' te Cajwaltique; te mach'atic ma sna'ic q'uinale ya yilayic te p'ijil c'op soc te p'ijubtesele.

Tac'uyel ta stojol queremetic

⁸ Jnich'an, aiybon me awaiy te p'ijubtesel cu'un te atatone, soc ma me xach'aybey te tojtesel yu'un te ame'e.

⁹ Melel jich me c'oem ta atojol te bit'il buen t'ujbil ach'alil, jich me te bit'il t'ujbil ualil ta anuc', soc jich me te bit'il corona ta ajol.

¹⁰ Jnich'an, teme ya sc'an ya slo'layat te jmulawiletic, ma me xawac' slo'layat.

¹¹ Teme jich ya yalbat: “La', t'unawotic, ya jpastic pejts' ta swenta nax sc'anjel co'tantic, swenta yu'un ya jmiltic mach'auc ch'ayal yo'tan ya xc'ax.

¹² Cuxul me ya jbic'tic c'oem te mach'atic lec yat'elique, jich te bit'il ya xbic'ot yu'un lajel te mach'atic ya xch'ayic coel ta muquenal.

¹³ Bayal me ta jchajp c'ulejaliletic ya jtatic tey a, ya jnojestic ta puro elc'anbil biluquetic te jnatique.

¹⁴ La' me, ya quiltic bi ya jtatic, soc jun me jbiluctic ta jpisiltic ya xc'ootic”, teme xie,

¹⁵ anan ta stojolic, jnich'an, ma me xba at'un te be te amen st'unojique.

¹⁶ Melel yac'ojic puersa ta spasel te bila amene; sujoj sbaic ta smalel ch'ich'.

¹⁷ Ay tojol ya xc'ot te ya yich' pasel pejts' teme ju' yu'un ya yil te ja'mal mute.

¹⁸ Yan te mach'atic jich ya spasique, ja'ic nix ya spas spejts'ulic stuquelic; jich quechel ta lajinel xcuxlejalic yu'un.

¹⁹ Ja' me slajibic ya xc'ot te jbic'tal-o'tanetique, melel ja' nix ya xlajinotic yu'un.

Ya yic'otic te p'ijil-o'tanil

²⁰ Ta calleetic soc ta banti ya stsob sbaic te lume, te p'ijil-o'tanil ya yac' ta aiyel sc'op;

²¹ ta ti'nailetic ya yal ta tulan te c'opetic yu'une, soc ta banti bayal mach'atic ya stsob sbaique; jich ya yal:

²² “Queremetic, te ma'yuc ap'ijilique, te jlabanwanejex soc te ma x'ana'ic q'uinale, ¿jayeb xan ora te ya amulanic te bol-o'tanile, soc te ya sbujts'naj awo'tanic yu'un te labanwanej, soc te ya awilayic te p'ijilile?

²³ Aiybon awaiyic te tojtesel cu'une, jo'on me ya calbeyex lequil consejo; ya me cac'beyex ana'ic te bila ya yal te co'tane.

²⁴ Jo'on la quiq'uex tel, la calbeyexix, pero te ja'exe ma x'ac'an ya awich'onic ta wenta.

²⁵ Ma ba la ach'uunic te tac'uyel cu'une; ma x'ac'anic ya awich'bonic ta muc' te tojtesel cu'une.

²⁶ Ya me xc'ot ta jwenta stse'luyel te c'alal ya xjul ta atojolic te woclajele. Ya me jlabanex te c'alal lajelexix yu'un xiwel ae,

²⁷ c'alal ya xtal ta atojolic bayal xiwel soc chujc'ul c'opetic, mel-o'tan soc xc'uxul woclajel, jich bit'il sutu-ic' te spisil ya slajine.

²⁸ “Te c'alal ya xc'ot sc'aalelal, ya me awic'onic, pero ma ba ya jac'beyex; ya aleonic, pero ma ba ya ataonic;

²⁹ melel ya awilayic te p'ijil c'ope, soc ma x'ac'an ya awich'ic ta muc' te Cajwaltique.

³⁰ Ma x'ac'an te ya awich'bonic ta wenta te tac'uyel cu'une; ya awilaybonic te tojtesel cu'une.

³¹ C'ux obol me abaic yu'un swocolil te awat'elique; tsobol me ya xjil ta atojolic te bila amen la anop ta awo'tanique.

³² Te mach'atic ma'yuc bila sna'ojique, ja' nix ya xmilotic yu'un te ma'yuc bila sna'oje; ja' te mach'atic ma sna'ic q'uinale, ja' nix ya xlajinotic yu'un te bila ma ba la yich'ic ta wenta.

³³ Pero te mach'a ya yaiybon te jc'ope, jun me yo'tan ya xcuxin jujun c'aal; ma ba ya xi' te bila amen ya xtal ta stojol stuquel”, xi' te p'ijil-o'tanile.