Oseas 9 - Bible in Tzeltal de Oxchuc y Tenejapa

Castigo ta stojol Israel albil yu'un Oseas

¹ Israel, ma me binuc nax awo'tan; ma me xwilat yu'un sbujts' awo'tan jich bit'il yantic lum. Melel la apas mulwej c'oem a te bit'il la awijq'uitay ta awo'tan te Dios awu'une. Ta yawilic smajibal trigo, ta bay ya yich' loq'uesel te site, bin nax awo'tan yu'un te tey ya awich'bey stojol a te amulweje.

² Te lum Israel ma me ayuc trigo ni vino yu'unic; te yach'il vino yu'une ma me tic'uc a.

³ Efraín ya sujt' bael ta Egipto, soc ta Asiria ya me swe'elin we'elil te ilaybile. Ma me xju' ya x'ainic xan ta bay slum-sq'uinal te Cajwaltique.

⁴ Ma ba ya smalbeyic vino ta swenta yich'el ta muc' te Cajwaltique; soc ma xyac'beyic milbil majt'anil yu'unic tey a. Te we'elil ya swe'ique jich c'oem te bit'il yu'un we'elil xc'uxulil mel-o'tan te bit'il ay mach'a laje, te mach'a ya swe' ya me xbolob sc'oplal yu'un. Ja'ic me ya swe'ic te we'elil te ya xbolteswane; ja'uc me to, ma xju' ya yich'ic bael ta templo yu'un te Cajwaltique.

⁵ Te ja'exe ¿bi ya apasic yu'un sc'aalelal te q'uine, te muc'ul q'uin yu'un te Cajwaltique?

⁶ Ja'ic anic bael yu'un te jinele; ja' ya x'ic'otic yu'un Egipto, ta lum Menfis ya me yich'ic muquel. Ta bay te yawil plata yu'unique ya me xchicnaj jot'awal-ch'ix, soc ta bay campamento yu'unic ay me ch'ixetic.

⁷ C'otix yorail te castigoe; c'otix yorail te ya x'ac'bot stoj te smulique. Israel ya me sna' te c'otix yorail castigo. Ya awalic ja'ex: —Te j'alwanej ma sna' q'uinal. Te winic te c'opoj ta yo'tan te Diose, soquem sjol —xaex me. Jich ya awalic, yu'un te nojel mulil ta awo'tanique, melel te slab awo'tanique c'ax muc' ta jyalel.

⁸ Dios yac'oj j'alwanej yu'un ta swenta j'il-q'uinal yu'un Efraín; ja'uc me to, te ja'exe ya awac'bey pejts' ta sbe. Asta ta bay templo yu'un Dios, ya alab-o'tantayic te j'alwaneje.

⁹ Jc'axel la sboltes sbaic ta jyalel, jich bit'il ta yorail sc'aalelal Gabaa. Te Cajwaltic ya sna'bey sbolil, soc ya yac'bey castigo yu'un te smulique.

Israel ya yaiybey swocolil smul

¹⁰ Ya yal te Cajwaltique: —C'alal la jta Israel, bin nax co'tan yu'un, jich bit'il mach'a ya sta ts'usub ta jochol taq'uin q'uinal. Te antiguo ame'-atatic jich c'otic ta jsit te bit'il sabal sit higuera. Ja'uc me to, c'alal c'otic ta bay Baal-Peor la yac' sbaic ta abatinel yu'un te lotil diosetique. La yac' sbaic ta ilayel cu'un, pajal la quilay soc te yajcanan te c'ux ta yo'tanique.

¹¹ Te yutsilal Efraín ya me xch'ay bael jichuc mut. Ma ba ya x'ayin xan alaletic, ma'yuc antsetic te ya x'alajique, ma ba ya xtal xan alaletic yu'un.

¹² Teme ay nix ju' yu'unic xch'ijtesel te snich'nabique, ya me jpojbey, ma ba ya quijq'uitaybey ni jtuluc. Obol sbaic te ants-winiquetic te c'alal q'uejel ya cac' jba ta stojole.

¹³ Yacon ta yilel te snich'nab Efraín te tsacbiliquix yu'un jnutsojeletic yilele. Ya sloq'ues bael, ya xba yac' ta miljibal —xi' te Cajwaltique.

¹⁴ Cajwal, pasbeya te bila ya sc'an awo'tan atuquele. Ma xawac' x'ayin alal ta xch'ujt'ic, soc ma xawac' xtal ya'lel xchu'ic.

Yilimba Cajwaltic ta stojol Efraín

¹⁵ Ya yal te Cajwaltique: —Ta Gilgal la spasic spisil te bila amene, tey jajch' quilay ta co'tan a. Ta swenta te amen yat'elic ya jloq'ues bael ta jna; ma ba ya jc'uxtay bael, melel toybaic ta jyalel spisil te ajwaliletic yu'unique.

¹⁶ Te Efraín ejch'enajemix; jich c'oem bit'il jpejt' te' te taquinix yisim te ma ba ya yaq'uix site. Manchuc me ay snich'nab, ya cac' lajuquix —xi' te Cajwaltique.

¹⁷ Te lum ma sc'an ya yich'ic ta muc' te Dios cu'une. Jich yu'un te Dios cu'une ya me xch'oj loq'uel, soc ya me xbajt'ic ta melmonel ta nacionetic.