Oseas 8 - Bible in Tzeltal de Oxchuc y Tenejapa

Israel ay me castigo yu'un xch'uunel lotil dios

¹ “Oq'uesina te oq'ues awu'une, jich bit'il te mach'a j'il-q'uinal te wijq'uil sit ta scanantayel te lum cu'un, jo'on te Ajwalilone. Melel la xch'aybonic te trato cu'une, soc la scontroinic te p'ijubtesel cu'une.

² Te c'alal yacalic ta spasel, ya to xtalic ta aw ta jtojol: “Ya jna'tic aba te ja'at Diosat yu'un Israel”, xiic.

³ Ja'uc me to, te Israel la xch'oj bael te bila leque; jich yu'un ya me xnutsot yu'un te scontrotaque.

⁴ “Mero ma la yich'onic ta wenta te la snajc'anic muc' ajwaliletic yu'unic, soc te la sleiquix ch'in ajwaliletic te ma ba caiyoj stojole. La stsaquiquix te plata te oro yu'unic ta swenta spasel yajcananic; ja' nax ya sjin sbaic a.

⁵ Ja'at Samaria, ma lecuc co'tan yu'un te sloc'omba alal wacax ya ach'uune. Te quilimba tilemix ta stojol te loc'ombae. ¿Jayeb to c'aal sc'an ya xlecub ta jtojol te israeletique?

⁶ Te sloc'omba alal wacax yu'un Samaria, ma Diosuc, pastaj ta sc'ab jtul winic te ya sna' spasele. Wuyultic nax me ya xc'ot ta loq'uel.

⁷ Ja'ic la sts'unic c'oem te ic' soc la sc'ajic te tulan yic'al ja'ale. Ma me ayuc bila ya sc'ajic loq'uel ta q'uinal, ma me bay ya staic loq'uel harina ta sit trigo; teme ay to ya sloq'uesique, te jyanlumetic ya me swe'elinic.

⁸ Te Israel tsalotix ta jc'axel. Ya x'ilot yu'un te yantic nacionetique, jich me c'oem ta sitic te bila ma'yuquix sc'oplale.

⁹ Ba sc'oponic te Asiria, jich bit'il ya stoy sba ja'mal burro. Efraín la yac' majt'anil swenta smanel c'oem a te mach'a ya xmulanot yu'une.

¹⁰ Ja'uc me to, manchuc teme la yac'bey majt'anil te nacionetique, yo'tic ya me yich' tsobel cu'un yu'un ya cac'bey castigo. Ya me xwoclajic ta sc'ab te ajwalil te tulan yo'tane.

¹¹ “Melel te Efraín yac ta spasel bayal ta jmil scajtijib majt'aniletic; ja' nax ya xtuun yu'unic ta sleel smulic a.

¹² Manchuc me jo'on la jts'ibubey bayal sp'ijubtesel, ja'uc me to, jchajp nax c'ot ta yo'tanic.

¹³ Ja'ic ya smulanic te milbil majt'aniletique, ya smilic soc ya sti'beyic sti'balul; ja'uc me to, jo'on Ajwalilon, ma lecuc co'tan yu'unic. Ya me jna'bey te smulic te la spasique, soc ya me cac'bey castigo yu'un, ya cac' sujt'el ta Egipto.

¹⁴ Israel ya spas palacioetic yu'un ajwalil; ja'uc me to, ya xch'ay ta yo'tanic te mach'a jpaswanej yu'une. Judá ya spas bayal ta jpam lumetic te tulanic sts'ajc'ule; ja'uc me to, ya cac'bey tiluc sc'aal te ya xtanub ta c'ajq'uel te muc'ul naetic yu'une —xi' te Cajwaltique.