Oseas 7 - Bible in Tzeltal de Oxchuc y Tenejapa

¹ c'alal ya jc'an jpoxtay te lum cu'une, ja' te Efraín soc Samaria, ya xchicnaj ta jsit te smul soc te bila amen spasojique. Melel spisilic c'aemic ta yalel lot; jich bit'il j'eleq'uetic, ya x'ochic ta nanatic soc ya swiluntayic te ants-winiquetic ta calle.

² Ma sna'ic stojol te ya quich'bey ta wenta te bila amen ya spasique. Ta ora yo'tic joytayotiquix yu'un te yat'elic, te ay nix ta jsit spisil ora.

Boloben ajwaliletic

³ “Ta swenta te bila amen, soc te lotetic ya spasique, te lum cu'un ya yac'bey yutsil yo'tanic a te muc' ajwalil soc te ch'in ajwaliletic yu'une.

⁴ Mulwejetic ta spisilic. Jich c'oemic te bit'il horno te la yich' ac'beyel sc'aal te ya yijq'uitay ta xijel te yajwal horno, ja' to c'alal ya xpajub te smats'ule.

⁵ Te bi c'aalil ac'bot scorona te muc' ajwalil cu'untique, te ch'in ajwaliletic la yac'beyic chamel ta swenta sc'aal te vino la yuch'e. Tey bajt' yo'tan ta sjoinel te mach'atic ya yaiyic labanwaneje.

⁶ Ya xchajbanbeyic yo'tan swenta sjajch'esel c'op, jich bit'il ya yich' chajbanel sc'aal te hornoe; manchuc me ya xway sjunal ajc'ubal te yajwal horno, ja'uc me to, ma xch'ay te sc'aal c'alal ta sab.

⁷ Ta spisilic jich ya xtil sc'aal yo'tanic te bit'il horno, ya slajinic te ajwaliletic yu'unique. Spisilic te muc' ajwaliletic lajemic; ma'yuc ni jtuluc te mach'a ya sc'oponone.

Te lum la yijq'uitay te Diose

⁸ “Te Efraín la scap sba soc jyanlumetic. Te Efraín jich c'oem te bit'il taquin sit waj te ma la yich' sujt'esele.

⁹ Mero ma ba ya xc'ot ta yo'tan te ja' lajinbot yip yu'un te jyanlumetique. Asta te stsotsil sjol ma sna' stojol teme sacubenixe.

¹⁰ Te stoybail Israel ja' nix testigo te ya x'alot yu'une. Manchuc me jich, ma ja'uc ya sujt'ic tel yu'un, ma ba ya sleic te Cajwaltic te Dios yu'unique.

¹¹ Te Efraín jich c'oem te bit'il stsumut, ma sna' q'uinal, mero ma'yuc sp'ijil. Ya sc'anic coltayel ta Egipto, soc ora ya xba sc'anic coltayel ta Asiria.

¹² Ja'uc me to, te c'alal ya xbajt'ique, ya me jlich' bael chojac' ta stojolic; ma xcac' te ya xwilic baele, tey me ya jtsac a ta scaj te smulique.

¹³ “Obol nax sbaic te la sq'uej sbaic bael ta jtojole. Ya xtaotic yu'un te jinele, melel la stoy sbaic loq'uel ta jtojol. Ya jc'an ya jcoltay te jichuque; ja'uc me to, ya spasonic ta lot, ya scontroinonic.

¹⁴ Manchuc me ya x'awunic te c'alal ay ta swayibique, ma socuc yo'tanic ya sc'opononic. Ta swenta sc'anel trigo soc vino ya yejch'entes sbaic; la stoy sbaic, la scontroinonic.

¹⁵ Jo'on la jp'ijubtesix soc la cac'bey yipic ta sc'abic; ja'uc me to, la xchajban sleel smulic, la scontroinonic.

¹⁶ Ja' bajt' yo'tanic ta sc'oponel te yajcananique. Jich c'oemic te bit'il t'im te ma tojuque, te yat'ejibal ma xc'ot te bay stojlineje. Ta scaj te puro ixta c'op ya yalique ya me xyalic te ajwaliletic yu'unic ta swenta puñal, soc ya me stse'luyotic ta Egipto.