Oseas 6 - Bible in Tzeltal de Oxchuc y Tenejapa

Israel ya sc'an sujt' ta stojol Cajwaltic

¹ La'ic ta apisilic, sujt'ucotic ta stojol te Cajwaltique. Ja' nix la stsacotic, ja'uc me to, ja' nix ya xpoxtayotic; la yejch'entesotic, ja'uc me to, ya spotsbotic.

² Ora nax ya yac' xbujts'naj q'uinal caiytic; ya xjachotic jajch'el yu'un ya yac' xcuxinotic ta stojol.

³ Ya me jpastic tulan ta sna'beyel sba te Cajwaltique. Te Cajwaltic ya xtal ta jtojoltic, ta smelelil, jich bit'il ya xloc' tel te c'aale, ta smelelil, jich bit'il ja'al ya yajch'es te lumq'uinal ta yorail otoño soc ta primavera.

La sjac' te Cajwaltique

⁴ Ya yal te Cajwaltique: —¿Bi me ya jpas ta atojol, Efraín? ¿Bi me ya jpas ta atojol, Judá? Te xc'uxul awo'tanic ta jtojole jich c'oem te bit'il sjab lumq'uinal ta sacubele, soc jich c'oem te bit'il ts'ujul ta ijc' to q'uinal te sab ya xch'ay c'axele.

⁵ Jich yu'un la quejch'entes c'oem ta swenta te j'alwanejetique; ta swenta te jc'ope, la jmil c'oemic a.

⁶ Te bila ya jc'anbeyex te ja'exe, ja' te c'uxucon ta awo'tanique, te ma ja'uc ya apasbonic te milbil majt'anile. Ja' ya jc'an te ya ana'bonic jba jo'on te Diosone, ma ja'uc te ya awac'bonic chic'bil majt'anile.

⁷ “Ja'uc me to, te lum cu'un pajal soc Adán, la xc'axintayic te trato cu'un soc ma junuc yo'tanic ta jtojol.

⁸ Te Galaad ja' te jpam lum te amen yat'elique, chican jilel seña ch'ich' ta bay ya xbeenique.

⁹ Te sacerdoteetic jun yac'oj sbaic ta elec'. Yac'oj sbaic ta smujc'tayel te ants-winiquetique; ya yaiyic milaw soc yantic bitic swenta q'uexlal ta sbelal Siquem.

¹⁰ Ta bay Israel ay bila la quil te xiweltic sba tey a: Ja' te Efraín la yaiy mulwej, soc te Israel la sboltes sba.

¹¹ Soc ja' nix jichat, Judá, la jleix te bi c'aalil ya cac'bat castigoe. “C'alal ya jc'an cac'bey slequilal te lum Israel cu'une,