Oseas 5 - Bible in Tzeltal de Oxchuc y Tenejapa

¹ “Sacerdoteetic, aiya awaiyic stojol, ac'a tel achiquinic, lum Israel, aiya awaiyic, ja'ex te sts'umbalex te muc' ajwalile: Ja' ay ta awentaic te ya x'ac'botex castigo. Melel jich c'oemex te bit'il pejts' te la awich'ic aq'uel ta Mizpa; jich c'oemex te bit'il chojac' lijch'anbil yu'un stsaquel chambalam ta wits Tabor;

² soc jich c'oemex te bit'il pozo te najt' coel ta stenlej xatal q'uinal Sitim. Jich yu'un ya cac'beyex castigo ta puersa.

³ Ya jna'bey sba te Efraín; te Israel ma yu'unuc ma jna'bey sba. Te Efraín yac'oj sba ta mulwej; te Israel la sboltes sba —xi'.

⁴ Amen yat'elic te lume, ta swenta te yat'elic ma xc'otic ta stojol te Dios yu'unique. Te bit'il u'uninbilic yu'un te mulweje, ma sna'beyic sba Cajwaltic yu'un.

⁵ Te stoybail Israel, ja' nax ya x'ac'ot ta castigo yu'un; te Efraín ja' nix ya xc'ojch'in sba a te smule, soc ja' nix jich te Judá, ya xc'ojch'in sba a.

⁶ Soc te chijetic soc te wacaxetic yu'unic ya xba yalbeyic wocol a te Cajwaltique; ja'uc me to, ma ba ya staic, melel la sq'uej sba bael ta stojolic.

⁷ Ma junuc yo'tanic ta stojol te Yajwalique, melel ay alaletic yu'un soc yan tatil. Ta scaj te ma junuc yo'tanique, jich yu'un ta jun nax u ya xbolob bael te sq'uinalique.

Castigo ta stojol Israel soc Judá

⁸ Oq'uesinaic xulubil yu'un guerra ta Gabaa, soc oq'uesinaic oq'ues ta Ramá. Ac'beya señail guerra ta Bet-avén. Ac'beya socuc sjolic te mach'atic ta Benjamín.

⁹ Jo'on ya cal ta yolilal te sts'umbal Israel te bila ya xc'ot ta pasel ta mero melel: Efraín jinbil me ya xjil ta sc'aalelal castigo.

¹⁰ Ya yal te Cajwaltique: —Te mach'atic jtsobwanejetic yu'un Judá, jichic te bit'il mach'atic ya syantesbeyic smojonil te q'uinale. Jich yu'un ya me quilbey swocolic ta sc'ajc'al co'tan.

¹¹ Efraín tenbil ta uts'inel, ma'yuc ta wenta c'ot stuquel, yu'un la yat'elin xch'uunel lotil diosetic.

¹² Jich me ya xc'oon te bit'il xchanul ixim ta stojol Efraín, soc jich me ya xjoch'ob te lum Judá.

¹³ “C'alal ya yil sba te ay ta chamel te Efraín, soc c'alal ya yil yejch'en te Judá, te Efraín ya xbajt' ta Asiria ta sc'anel coltayel ta stojol te mero muc'ul ajwalil. Ja'uc me to, ma me xju' yu'un slamantesel te xchamele, soc ma xju' yu'un xpoxtayel te ejch'enetic yu'une.

¹⁴ Jich bit'il león-choj te ya xlumtaywan, jich me ya cac'bey guerra te Efraín soc te Judá. Ya me jtsac, wuyultic me ya xjil cu'un; ya me jtas bael, ma'yuc mach'a ya xcoltayot yu'un.

¹⁵ “Ora ya sujt'on bael ta bay cawil, ja' to me c'alal ya sna'ic te smulique. Jich me ya xtal sleonic. Ja' me ya yalbonic wocol a te c'alal ayiquix ta woclajele —xi'.