Oseas 14 - Bible in Tzeltal de Oxchuc y Tenejapa

Oseas ya yalbey Israel yacuc sujt'es yo'tan ta stojol Cajwaltic

¹ Israel, sujt'esa awo'tan ta stojol Cajwaltic te Dios awu'une, te ja'at scaj amul te yalate.

² Sujt'esa awo'tanic ta stojol te Cajwaltique, jich me ya awalic ta sc'oponel te Diose: —Pasbotic perdón yu'un spisil te jmultique; tsacbotic soc yutsil awo'tan te amajt'an te ya caltic loq'uel ta quetique.

³ Asiria ma xju' ya scoltayotic; soc ma xju' xcolotic yu'un te caballoetique. “Dios cu'untic”, ma me xoocotic ta stojol te bila jpasojtic ta jc'abtique. Melel ja'at nax atuquel, Cajwal, te ya ana'bon yo'bolil jba te me'ba alalone —xaat me ta stojol te Diose.

La yal Cajwaltic te ya yac'bey yach'il xcuxlejal Israel

⁴ Ya yal te Cajwaltique: —Ya jpoxtaybey te stoybaile; ya jc'uxtay manchuc me ma jichuc ya sc'an pasbeyel; la jq'uejix bael ta stojolic te quilimbae.

⁵ Jich ya jpasbey ta swenta Israel te bit'il ts'ujule, jich me ya yac' snich c'oem, jich bit'il te lirioetique. Tulan me ts'unul ya xc'ot, jich bit'il tulan te wits Líbano.

⁶ Te sc'abc'abe ya me slim sba bael, t'ujbil yutsilic jich bit'il sc'ab olivo; soc jich me sbujts' yic' te bit'il cedroetic ta Líbano.

⁷ Te Israel ya me xcuxin xan ta yach'il te bit'il ya jcanantaye. Ja' yu'un jich me ya xch'iic te bit'il trigo; ya me xme'in jichuc ts'usub. Muc' me sc'oplal ya xc'ot, jich bit'il te vino yu'un Líbano.

⁸ Te Efraín ya yal: “Ma'yuquix sc'oplal ta co'tan te loc'ombaetique”, xi' me. Jo'on ya jna' soc ya jcanantay te lum cu'une. Jichon te bit'il taj te spisil ora yaxe, jo'on ta jwenta te ya yich' tael sit te lum cu'une —xi' te Cajwaltique.

Slajibal tojtesel

⁹ Te mach'atic ay sp'ijilic soc te ya sna'ic stojole, ac'a me yaiyic stojol te bila ya cale: Te beetic yu'un te Cajwaltic toj ay stuquel. Te mach'atic toj yo'tanic, ja' me ya st'unic; yan te mach'atic amenic, ya me sc'ojch'in sbaic tey a.