Oseas 12 - Bible in Tzeltal de Oxchuc y Tenejapa

¹ “Te Efraín puro ic' ya yipan, spisil c'aal ya st'un bael te ic' te ya xtal ta stojol sloq'uib c'aal. Ya xtoy bael te lotetic soc te uts'inwanej yu'unique. Ya spas trato soc Asiria soc ya sticun majt'anil aceite ta Egipto —xi' te Diose.

² Te Cajwaltic yalojix c'op ta stojol juez: —Ay smul te Israele —xi'. Ya yac'bey castigo te lum yu'un Jacob ta scaj te yat'ele; ya yac'bey stoj te bit'il nix ya sc'ane.

³ C'alal ma to x'ayin a te Jacob, la spojbeyix yawil a te sbanquile; soc te c'alal muq'uix a, la stsac sba soc te Diose.

⁴ La stsac sba soc jtul ch'ul abat, la stsal; la yoq'uetay sba, soc la sc'an te yacuc na'botuc yo'bolil sba yu'une. Te Dios la sta ta Betel, c'opoj soc tey a.

⁵ Te Cajwaltic te Dios te Spisil ya xju' yu'une, Ajwalil te sbiile.

⁶ Jich yu'un, Israel, sujt'esa awo'tan ta stojol te Dios awu'une; toyoluc me awo'tan ta stojol, soc toj me x'at'ejat. Ja' ac'a smuc'ulin awo'tan te Dios awu'une.

⁷ Te Cajwaltic ya yal: —Pajalat soc cananeo-winic te ay ta sc'ab spisil ora te lotil slicojibal, melel ya smulan lo'laywanej.

⁸ Efraín ya yal: “Melel xawal, jc'ulejonix, la jtaix jc'ulejal. Pero ma'yuc mach'a ya xju' slebon jmul yu'un te bit'il la jta te jganare, ma ba mulil te bila la jpase”, xi'.

⁹ Jo'on Ajwalilon te Dioson awu'un c'alal to te ayat ta Egipto, ya cac' xnainat xan ta nailpac' jich bit'il la join jbatic ta jochol taquin q'uinal ta namey.

¹⁰ “Jo'on la jc'opon te j'alwanejetique, soc la quesmantesbey yajtalul te bitic la cac'bey yilic, soc ja'ic ta swentaic te c'opojon ta seña-c'opetique.

¹¹ Ta Galaad ay yantic diosetic tey a; ja'uc me to, ja' nax puro lotil diosetic. Ta Gilgal ya yac' milbil toroetic; te scajtijib majt'aniletic yu'unic jich c'oem te bit'il busulbus tonetic ta yolil te pasbil q'uinale —xi' te Cajwaltique.

¹² Te Jacob an bael ta q'uinal yu'un Aram. Tey at'ej ta scanantayel chijetic ta swenta stojel te yiname.

¹³ Ta swenta jtul j'alwanej te Cajwaltic la sloq'ues tel ta Egipto te lum Israel; ta swenta jtul j'alwanej la scanantay te lume.

¹⁴ Te ants-winiquetic ta Efraín la yac' ilinuc yo'tan Cajwaltic; ch'auben yo'tan yu'un. Jich yu'un te Cajwaltic ya yac'bey stoj te muliletic spasojique; ja' nix ya yac'bey ta swenta te bila amen spasojique.