Oseas 10 - Bible in Tzeltal de Oxchuc y Tenejapa

Ya yich' jinel scajtijib majt'aniletic ta Israel

¹ Te Israel jich c'oem bit'il ts'usub, nojel nax yu'un te site. Te bit'il bayal ay te site, bayal la spasic scajtijib majt'aniletic yu'un; te bit'il c'ax bayal yutsil ta jyalel te sq'uinale, jich bayal yutsil te teq'uel tonetic la xch'uunique.

² Chebajem yo'tan te Israele, ta ora yo'tic ya me stoj te smule. Te Cajwaltic ya sjinbey te scajtijib majt'aniletic yu'une, soc ya me sjinbey te tonetic yac ta xch'uunele.

³ Ta ora yo'tic te lum ya yal: —Ma'yuc muc' ajwalil cu'untic, melel ma ba quich'ojtic ta muc' te Cajwaltique. Ja'uc me to, ¿bi ya xju' yu'un spasbelotic te muc' ajwalile?

⁴ Ja' nax puro c'op, soc puro lot ya yale, soc te ya spas firmar tratoetic. Te chajbanel yu'une jich me c'oem te bit'il te' te ay svenenoil te ya xchicnaj ta yolil surcoetic te bila ts'unbile —xi' te lume.

⁵ Ya xnijq'uic yu'un xiwel te yajwal Samaria; ya x'oq'uic yu'un te ya xch'ay bael te sloc'omba alal toro ta Bet-avén. Ja' ta swenta te ay ta mel-o'tan te lum soc te sacerdoteetique, melel te yutsilal, ya xch'ay ta jc'axel.

⁶ Ya me x'ich'ot bael te alal toro c'alal ta Asiria, swenta yu'un ya yich' ac'beyel te muc'ul ajwalile. Jich me ya xjil ta q'uexlal te Efraín; te Israel ya me xq'uexaw yu'un te yajcanane.

⁷ Ya me xch'ay ta jc'axel te muc' ajwalil ta Samaria, jich nax me te bit'il ch'in majc'alte' xcajet ta babaja'.

⁸ Te toyol ch'uunjibaletic ya me yich'ic jinel, te bay la sle smul a te Israele. Ta bay sba te scajtijib majt'aniletic yu'unique ya me xch'i tel ch'ixetic tey a soc jot'awal-ch'ixetic. Te ants-winiquetic jich me ya yalbey te witstiquile: “Mucawotic”, xiic me. Soc ya me yalbeyic te ch'in witsetique: “Ch'ayuc tel ta jbatic”, xiic me.

Cajwaltic ya xchajbanbey castigo ta stojol Israel

⁹ Ya yal te Cajwaltique: —Te Israel ma ba ya scom sba ta sleel smul, ja' to c'alal jajch' tel ta spasel ta Gabaa. Te smulic stalel ay soc. Jich yu'un ya me xtaotic yu'un guerra te mach'atic amenic ta Gabaa.

¹⁰ Ya cac'bey castigo te lum te bi ora ya sc'an co'tane. Te nacionetic ya me stsob sbaic tel ta guerra ta stojol c'alal ya cac'bey castigo yu'un te bayal mulile.

¹¹ “Te Efraín jich c'oem te bit'il wacax te mansuben te la smulan te ya swuybey loq'uel ta teq'uel spat te trigoe. Ta ora yo'tic la cac'beyix yugo ta sba snuc' te t'ujbile, swenta yu'un ya stas bael te carreta. Te Judá ya stas bael te swoc'jibal lume, soc te Jacob ya stas bael te rastrillo.

¹² La calbey: “Te ja'uc ya ats'unic c'oem te bila toj ta pasele, ja' ya ac'ajic te xc'uxul-o'tanil te jichuque. Chajbanaic ta yach'il te lumq'uinale, melel yorailix ta leel te Cajwaltique. C'alal ya xtal, ya me yic' tel jichuc ja'al te acolelique”, xoon.

¹³ Ja'uc me to, te ja'ex ja' la awat'elinic sts'unel te bila amene, ja' yacalex ta sc'ajel te bila ma stojiluque, soc ja' yacalex ta swe'el sit te lote. “Ta scaj te la awich' aba ta muc' yu'un te bayal acarreta yu'un guerra soc te bayal te soldadoetic awu'une,

¹⁴ ay me ya xjajch' ch'inlajinel ta yolil te ants-winiquetic awu'une. Spisilic te tulanil ts'ajq'uetic awu'une, tan me ya xbajt'ic, jich bit'il tan c'ot yu'un te muc' ajwalil Salmán te Bet-arbel ta sc'aalelal guerra, c'alal la yich' majel ta lum te me'il soc te yalataque.

¹⁵ Ja' me jich ya xc'ot ta atojolic te ja'ex, yajwal Betel, ta scaj te muc' te amule. Te muc' ajwalil yu'un Israel ya me xlaj c'alal ya sacub te q'uinale.