Números 9 - Bible in Tzeltal de Oxchuc y Tenejapa

Spasel q'uin Pascua

¹ Te bit'il junix ja'wil sloq'uel tel ta Egipto a te israeletic, ta sbabial u yu'un te ja'wil te Cajwaltic la sc'opon Moisés ta bay jochol taquin q'uinal Sinaí, jich la yalbey:

² —Te israeletic ya me sc'an ya spasic te q'uin Pascua te jich nix te bit'il yuil,

³ ja' te xchanlajunebal sc'aalelal te u ta yijc'ubel q'uinal. Ja' nix me ya yich' t'unel ta spisil te mandaliletic te cac'oj yu'un spasel te q'uine —xi' te Cajwaltique.

⁴ Jich yu'un te Moisés la spas ta mandal te israeletic te ya spasic te q'uin Pascua.

⁵ Ja' yu'un jich la spasic ta xchanlajunebal sc'aalelal te u, ta yijc'ubel q'uinal ta bay jochol taquin q'uinal Sinaí, jich nix la yich' pasel spisil te bit'il mandal yaloj Cajwaltic ta stojol te Moisés.

⁶ Ja'uc me to, ay winiquetic te ma ba lec sc'oplalic ta scaj te spicoj anima, jich yu'un ma ju' yu'unic spasel te q'uin Pascua ta sc'aalelal. Te winiquetic ba yilic te Moisés soc Aarón ta yorail nix.

⁷ Jich la yalbeyic te Moisés: —Te jo'otic jpicojtic anima, jich yu'un ma ba lec jc'oplaltic. ¿Ya laj bal sc'an Cajwaltic stsacbotic te smajt'an ta mero yuil, te ya join jbajtic soc te jlumaltic israeletique? —xiic.

⁸ Te Moisés la sjac'bey sc'opic: —Maliyaic, ya caiy te bila mandal ya quich' yu'un Cajwaltic ta awentaic —xi'.

⁹ Te Cajwaltic la sc'opon te Moisés, jich la yalbey: —Albeya te israeletique:

¹⁰ “Apisilic te ja'ex soc ats'umbalic ya me apasic te q'uin Pascua swenta quich'jibal ta muc'. Te mach'atic ma ba lec sc'oplalic te spicojic anima, o teme yu'un c'ubul beenique,

¹¹ ya me spasic ta xchanlajunebal c'aal ta xchebal u ta yijc'ubel q'uinal. Ya me sti'ic te chij soc ch'aal wamal soc te waj ma ba yich'oj levadura,

¹² soc ma me ayuc ti'bal ya yijq'uitay ta yan c'aal, ni ma me sc'asbey jilel jch'ixuc sbaquel. Pasaic te q'uin, ja' xat'unic spisil te mandalil te cac'oje.

¹³ Ja'uc me to, te mach'a ya yijq'uitay ta pasel te q'uin Pascua, teme lec sc'oplal soc teme ma ba c'ubul beenique, ya me yich'ic loq'uesel ta yolil te slumale. Scaj te ma la yac' ta stojol Cajwaltic te majt'anil te albil sc'oplale, jich me xcuchoj ya xjil te smule.

¹⁴ “Te jyanlum winic te nainem ta awolilic, ya me spas uuc te q'uin Pascua ta swenta quich'jibal ta muc', jich me te bit'il jmandal te caloje. Te mandalil te chapale jich nix me yip sc'oplal ta stojol jyanlum winic soc ta stojol te mach'a ainem ta alumal”, uta me —xi' te Cajwaltique.

Te tocal ta sba Nailpac' yu'un trato

¹⁵ Te bi c'aalil najc'aj yu'unic te ch'ul awilal, ja' te Nailpac' yu'un trato, mucot ta tocal. Ta yijc'ubel q'uinal chicnaj ta sba te ch'ul awilal jich bit'il c'ajc' yilel, sjunal ajc'ubal ja' to c'alal sacub tel.

¹⁶ Jich la spas spisil ora: ta c'aaleltic mucot ta tocal te Nailpac' Temploe, ta ajc'ubal jich bit'il c'ajc' yilel.

¹⁷ C'alal toy jajch'el te tocal ta sba te Nailpac' Temploe, te israeletic jich jajch'ic ta beel. Ta bay com te tocal, tey la spas scampamentoic a.

¹⁸ Te c'alal la spas mandal te Cajwaltic, te israeletic jajch'ic ta beel o ya xcomic. Tey ainic jayeb c'aal a, ja' chican te tocal teme stalel nax ay ta sba te ch'ul awilal.

¹⁹ Teme bayal c'aal ay tocal ta sba te ch'ul awilal, te israeletic jich la scom sbaic ta beel, swenta yu'un ya me yich' ch'uunel smandal te Cajwaltique.

²⁰ Teme jun cheb nax c'aal ay tocal ta sba te ch'ul awilal, teme la yal mandal te Cajwaltic, jajch'ic ta beel, soc teme la yal xan mandal ta yan buelta, jich la scom sbaic ta beel.

²¹ Ay jun nax ajc'ubal la scom sba te tocale, ta sab jajch' ta beel, ja' yu'un jich jajch'ic ta beel. Jich nix ta c'aaleltic ta ajc'ubal, c'alal jajch' te tocal, jajch'ic ta beel.

²² Teme la scom sba ta sba te ch'ul awilal te tocal, teme cheb c'aal, teme jun u, o teme jun ja'wil, jich jun nax yo'tanic la spas scampamentoic, ma ba jelawic bael. Ja'uc me to, teme jajch' ta beel te tocale, jich yu'un te israeletic jajch'ic ta beel.

²³ Te c'alal la yal mandal te Cajwaltic, la slaman sbaic ta scampamento. Te c'alal la yal mandal yan buelta, jich jajch'ic ta beel. Jun yo'tanic la xch'uunbeyic smandal te Cajwaltic, jich bit'il yaloj mandal stuquel ta swenta Moisés.