Números 4 - Bible in Tzeltal de Oxchuc y Tenejapa

Yat'el levitaetic

¹ Te Cajwaltic la sc'opon Moisés soc Aarón, jich albotic:

² —Ac'a ta censo juju-jchajp te sts'umbal Coat, te ja' sts'umbal Leví,

³ te ayic ta lajuneb xcha'winic (30) ya'wilalic c'alal ta lajuneb yoxwinic (50), te ya xju' yu'unic at'el ta abatinel ta Nailpac' te bay ya quich' c'oponele.

⁴ “Te yat'el mach'atic sts'umbal Coat, mero bayal sc'oplal te bila ya x'ac'bot spasique. Jich ay te yat'elique:

⁵ Te c'alal ya xjajch'iquix ta beel te israeletique, te Aarón soc snich'nab ya sloq'uesic te pac' ya smac ta olil te ch'ul awilal, ja' me ya smuquic bael a te scajonil trato.

⁶ Ta sba ya me smuquic xan bael ta t'ujbil nujc'uletic. Ta sba xan te nujc'ule, ya me slimbeyic morada pac' te jlijc' nax aye. Ya me xijbeyic c'axel te ste'el sq'uechjibale.

⁷ Ja' nix me jich, ya smuquic bael ta morada pac' te mesa ay ta jtojole. Ta sba te paq'ue tey me ya spajch'an bael a te platoetic, te muc'ul cucharaetic, te tazaetic soc te oxometic te yawil majt'anil vino, soc nix te waj te ay ta aq'uel spisil ora.

⁸ Ta sba spisil ya me smuquic bael ta tsajal pac', soc ta sba ya me smuquic xan bael ta t'ujbil nujc'uletic. Ya me yaq'uic ochel te ste'el sq'uechjibale.

⁹ Ta yoxebal ya me stsaquic jlijc' morada pac', ya smuquic bael a te scajtijib c'ajq'uetic, te ch'in c'ajq'uetic, te tenazaetic, te ch'in platilloetic, soc spisil te yawil aceite te ya xtuun yu'une.

¹⁰ Spisil me ya spotsic bael ta t'ujbil nujc'uletic, soc ya me yac'beyic ste'el ta q'uechel bael.

¹¹ “Ja' nix me jich ya slimbeyic morada pac' ta sba te scajtijib majt'anil pom te pasbil ta oro. Ya me spotsic bael ta t'ujbil nujc'uletic, soc ya me yac'beyic ochel ste'el ta q'uechel baele.

¹² Soc ya me stsobic te sbiluquil te yac ta tuuntesel ta ch'uunel Dios a ta bay ch'ul awilal. Ya me yaq'uic ta morada pac', soc ya me spotsic bael ta t'ujbil nujc'uletic, soc ya me yac'beyic ste'el ta q'uechel bael.

¹³ Te scajtijib chic'bil majt'anil ya me sc'an ya yich' cusel loq'uel te stanul soc xepuil te majt'anile, soc ya me sc'an ya yich' muquel ta púrpura pac'.

¹⁴ Ta sba te scajtijib ya me yich' aq'uel spisil te bitic ay ta tuuntesel ta swenta xch'uunel te Diose: ja'ic te yawil ac'al, trincheetic, palaetic, muc'ul tazaetic, ja' spisil sbiluquil te ya xtuun ta scajtijib chic'bil majt'anil. Ta spisilic ya me yich'ic potsel bael ta t'ujbil nujc'uletic, soc ya me yac' ochel te ste'el ya yich' q'uechel bael a.

¹⁵ Te c'alal ya xlaj yo'tan Aarón soc snich'nab ta xchajbanel ta potsel spisil te ch'ul biluquetic, teme chapalix te ya xju' xjajch'ic ta beele, ya me xtalic te sts'umbal Coat swenta yu'un ya me sq'uechic bael spisil te biluquetique. Ja'uc me to, ma me xju' ya spiquic te bila ch'ultesbil, swenta yu'un jich me ma xlajic. Spisilic te sbiluquil Nailpac' te bay ya quich' c'oponele, ja'ic me ya sq'uechic bael te sts'umbal Coat.

¹⁶ Te Eleazar snich'an te sacerdote Aarón, ja' me ya swentain te aceite yu'un te ch'in c'ajq'uetic, te pom te bayal sbujts' yic', te harina ta swenta majt'aniletic cu'un te ya nix yac'ulaybonic a, soc te aceite swenta ch'ultesel. Soc ya me scanantay te Nailpac' Templo soc spisil te bitic ay yu'une —xi' te Cajwaltique.

¹⁷ Te Cajwaltic la sc'opon Moisés soc Aarón, jich albotic:

¹⁸ —Ma me xawac' te ya xch'ay jchajbuc sts'umbal Coat ta yolilic te levitaetique.

¹⁹ Ma me staic castigo ta lajel ta scaj nax teme la spiquic te bitic ch'ultesbile. Jich me ya sc'an ya spasic te bit'il in to: Te Aarón soc snich'nab ja' me ya swentainic yalel juju-jtul te bila ya sc'an ya spasic soc te bila ya xc'ot ta swenta yich'el baele.

²⁰ Jich ma x'och yilic ni jtebuc te bitic ch'ultesbil, soc jich ma xlajic —xi' te Cajwaltique.

²¹ Te Cajwaltic la sc'opon Moisés, jich la yalbey:

²² —Ja' nix jich ac'a ta censo te sts'umbal Gersón ta swenta juju-jchajp,

²³ te ay lajuneb xcha'winic (30) ya'wilal c'alal ta lajuneb yoxwinic (50), te ya xju' yu'unic at'el ta abatinel ta Nailpac' te bay ya quich' c'oponele.

²⁴ “Te at'el yu'unic te sts'umbal Gersón, jich ay:

²⁵ Ja' me ya yich'ic bael te paq'uetic yu'un te ch'ul Nailpac' Templo, te paq'uetic yu'un Nailpac' te bay ya quich' c'oponel, te t'ujbil nujc'uletic te smujq'uil ta sba, te smajq'uil pac' ta yochibal te Nailpac' te bay ya quich' c'oponel,

²⁶ te paq'uetic yu'un te scorralil, te smajq'uil pac' ta yochibal te corral ay ta sjoyobal te Nailpac' Templo soc te scajtijib ta chiq'uel majt'anil, te bitic ya xchuquic a te corral, soc spisil te sbiluquil te ya xtuun ta pasel te bila ya sc'an ta swenta te yat'ele.

²⁷ Te Aarón soc snich'nab, ja' me ya spasic ta mandal te sts'umbal Gersón te bitic at'elil ya spasic soc te bitic ya sq'uechic baele. Ja'ex ay ta awentaic te bitic ya spasique.

²⁸ Ja' me abatinel yu'unic ta chajbalchajp te mach'atic sts'umbal Gersón, te ya spasic ta Nailpac' te bay ya quich' c'oponele, te bit'il ya xmandalaj ta stojolic te Itamar te snich'an sacerdote Aarón.

²⁹ “Ja' nix jich ac'a ta censo te sts'umbal Merari ta swenta juju-jchajp.

³⁰ Ts'ibuya ta jun spisil te ayic ta lajuneb xcha'winic (30) ya'wilal c'alal ta lajuneb yoxwinic (50), ja' te ya xju' yu'unic at'el ta abatinel ta Nailpac' te bay ya quich' c'oponele.

³¹ Te at'el yu'unic ta swenta te Nailpac' te bay ya quich' c'oponel, ja' te ya sq'uechic bael te marcoetic yu'un te ch'ul awilal soc te ste'elic, te posteetic yu'un soc snactijibic,

³² te posteetic yu'un te corral ta sjoyobal te Nailpac' Templo soc snactijibic, te estacaetic, te xchujq'uilic, soc spisil te bitic ya sc'an yu'un te at'ele. Ja'at me ya awalbey juju-jtul te bitic mero ya yich'ic baele.

³³ Ja' at'el te ay ta pasel ta Nailpac' te bay ya quich' c'oponel, te ay ta swentaic te chajbalchajp sts'umbal Merari, te ja' ayic ta pasel ta mandal yu'un te Itamar te snich'an sacerdote Aarón —xi' te Cajwaltique.

³⁴ Te Moisés, te Aarón soc te mach'atic jtsobwanejetic yu'un te lume, la yaq'uic ta censo ta swenta juju-jchajp te mach'atic sts'umbal Coat

³⁵ te ayic ta lajuneb xcha'winic (30) ya'wilal c'alal ta lajuneb yoxwinic (50) te ya xju' yu'unic at'el ta abatinel ta Nailpac' te bay ya yich' c'oponel te Cajwaltique.

³⁶ Te winiquetic ochic ta jun, loc' cha'mil soc lajuneb swaxaclajunwinic xcha'bajc' (2,750) ta spisil.

³⁷ Ja'ic yajtalul te sts'umbal Coat te ya xju' ya spasic at'el ta Nailpac' te bay ya yich' c'oponel te Cajwaltic, ja' chican yajtalul te censo la spas Moisés soc Aarón, jich bit'il mandal yu'un Cajwaltic yalojbey Moisés.

³⁸ Te mach'atic sts'umbal Gersón la yich' aq'uel ta censo ta juju-jchajp

³⁹ te ayic ta lajuneb xcha'winic (30) ya'wilalic c'alal ta lajuneb yoxwinic (50) te ya xju' yu'unic at'el ta abatinel ta Nailpac' te bay ya yich' c'oponel Cajwaltic,

⁴⁰ loc' cha'mil soc lajuneb slajchaywinic xcha'bajc' (2,630).

⁴¹ Ja'ic yajtalul sts'umbal Gersón te ya xju' ya x'at'ejic ta Nailpac' te bay ya yich' c'oponel te Cajwaltic, ja' chican yajtalul te censo te la spas Moisés soc Aarón ta swenta smandal te Cajwaltique.

⁴² Te mach'atic sts'umbal Merari ta swenta juju-jchajp

⁴³ te ayic ta lajuneb xcha'winic (30) ya'wilal c'alal ta lajuneb yoxwinic (50) te ya xju' yu'unic at'el ta abatinel ta Nailpac' te bay ya yich' c'oponel Cajwaltic,

⁴⁴ loc' oxmil soc lajunwinic (3,200) ta jtul.

⁴⁵ Ja'ic yajtalul te mach'atic sts'umbal Merari te ya xju' ya x'at'ejic ta Nailpac' te bay ya yich' c'oponel te Cajwaltic, ja' chican yajtalul ta censo la spasic Moisés soc Aarón, jich nix te bit'il mandal yu'un Cajwaltic yalojbey Moisés.

⁴⁶ Te yajtalul spisil te levitaetic te la yich' ajtayel yu'un Moisés, Aarón soc te jtsobwanejetic yu'un Israel, ta swenta juju-jchajp

⁴⁷ te ayic ta lajuneb xcha'winic (30) ya'wilalic bael c'alal ta lajuneb yoxwinic (50), soc te ya xju' yu'unic at'el ta abatinel ta Nailpac' te bay ya yich' c'oponel te Cajwaltic,

⁴⁸ loc' waxacmil, soc balunwinic xcha'bajc' (8,580) ta jtul.

⁴⁹ La yich' aq'uel ta censo jich te bit'il mandal yu'un Cajwaltic la yalbey Moisés. Juju-jtul la yich' albeyel te bitic ya spasic, soc te bila ya xc'ot ta swentaic yich'el baele, jich bit'il mandal yu'un Cajwaltic yalojbey te Moisese.