Números 33 - Bible in Tzeltal de Oxchuc y Tenejapa

Juju-jmajc' beenic israeletic

¹ Ja' juju-jmajc' beenic israeletic te c'alal loq'uic tel ta Egipto te xtiq'uetic nax loq'uel tele, te ic'wanejetic yu'unic ja' te Moisés soc Aarón.

² Te Moisés la snajc'anbey bael sbiilic te q'uinaletic ta bay jajch'ic loq'uel ta juju-jmajc', jich bit'il albot mandal yu'un te Cajwaltique. Ta bay la spas scampamentoic ta jujun lugar, jich ay:

³ Te israeletic loq'uic bael ta Ramsés ta yo'lajunebal c'aal a te sbabial u yu'un te ja'wile, ta yan c'aal a te la spasic te Pascua. Mero bayal yipic loq'uel ta sitic spisilic te egipcioetic,

⁴ ja' yorail a te yacalic ta smuquel sba snich'anic a te egipcioetique. Jich te Cajwaltic la yac' ta ilel te cajal yu'el yu'un te diosetic yu'un Egipto.

⁵ Te israeletic jajch'ic loq'uel ta Ramsés, c'otic ta Sucot.

⁶ Loq'uic bael ta Sucot, c'otic ta Etam, ta bay sti'ilix jajch'el te jochol taquin q'uinale.

⁷ Loq'uic bael ta Etam, la spasic buelta ta stojol Pi-hahirot, te ay ta stojol sloq'uib c'aal ta Baal-zefón. C'o spas scampamentoic ta stojol Migdol.

⁸ Loq'uic bael ta Pi-hahirot, c'axic bael ta mar, c'otic ta jochol taquin q'uinal. Beenic bael oxeb c'aal ta jochol taquin q'uinal Etam. Tey c'otic ta Mara.

⁹ Loq'uic bael ta Mara, c'otic ta Elim, ja' te bay lajchayeb sloq'uibja'etic soc lajuneb xchanwinic (70) palmaetic. Tey c'o spas scampamentoic a.

¹⁰ Loq'uic bael ta Elim, tey c'otic ta sts'eel Mar Rojo.

¹¹ Loq'uic bael ta Mar Rojo, c'otic ta jochol taquin q'uinal Sin.

¹² Loq'uic bael ta jochol taquin q'uinal Sin, c'otic ta Dofca.

¹³ Loq'uic bael ta Dofca, c'otic ta Alús.

¹⁴ Loq'uic bael ta Alús, c'otic ta Refidim, ja' te bay ma la staic ja' yuch'ic.

¹⁵ Loq'uic bael ta Refidim, c'otic ta jochol taquin q'uinal Sinaí.

¹⁶ Loq'uic bael ta jochol taquin q'uinal Sinaí, c'otic ta Kibrot-hataava.

¹⁷ Loq'uic bael ta Kibrot-hataava, c'otic ta Hazerot.

¹⁸ Loq'uic bael ta Hazerot, c'otic ta Ritma.

¹⁹ Loq'uic bael ta Ritma, c'otic ta Rimón-peres.

²⁰ Loq'uic bael ta Rimón-peres, c'otic ta Libna.

²¹ Loq'uic bael ta Libna, c'otic ta Rissa.

²² Loq'uic bael ta Rissa, c'otic ta Ceelata.

²³ Loq'uic bael ta Ceelata, c'otic ta bay wits Sefer.

²⁴ Loq'uic bael ta wits Sefer, c'otic ta Harada.

²⁵ Loq'uic bael ta Harada, c'otic ta Macelot.

²⁶ Loq'uic bael ta Macelot, c'otic ta Tahat.

²⁷ Loq'uic bael ta Tahat, c'otic ta Tara.

²⁸ Loq'uic bael ta Tara, c'otic ta Mitca.

²⁹ Loq'uic bael ta Mitca, c'otic ta Hasmona.

³⁰ Loq'uic bael ta Hasmona, c'otic ta Moserot.

³¹ Loq'uic bael ta Moserot, c'otic ta Bene-jaacán.

³² Loq'uic bael ta Bene-jaacán, c'otic ta Hor yu'un Gidgad.

³³ Loq'uic bael ta Hor yu'un Gidgad, c'otic ta Jotbata.

³⁴ Loq'uic bael ta Jotbata, c'otic ta Abrona.

³⁵ Loq'uic bael ta Abrona, c'otic ta Ezión-geber.

³⁶ Loq'uic bael ta Ezión-geber, c'otic ta jochol taquin q'uinal Zin, ja' te bay Cades.

³⁷ Loq'uic bael ta Cades, c'otic ta wits Hor, ta smojonil sq'uinal Edom.

³⁸ Ta swenta smandal te Cajwaltic, te sacerdote Aarón mo ta wits Hor, tey laj a ta sba c'aalil te yo'ebal u, ta xcha'winiquil (40) ja'wile. Ja' ajtaybil tel ya'wilal te c'alal loq'uic tel ta Egipto te israeletique.

³⁹ C'alal laj te Aarón ta wits Hor, ayix oxeb sjucwinic (123) ya'wilal a.

⁴⁰ Te muc' ajwalil cananeo yu'un Arad, te nainem ta Néguev ta slum-sq'uinal Canaán, la yaiy stojol te ya xjuliquix tel te israeletique.

⁴¹ Loq'uic bael ta wits Hor, c'otic ta Zalmona.

⁴² Loq'uic bael ta Zalmona, c'otic ta Punón.

⁴³ Loq'uic bael ta Punón, c'otic ta Obot.

⁴⁴ Loq'uic bael ta Obot, c'otic ta Ije-abarim, ta smojonil sq'uinal Moab.

⁴⁵ Loq'uic bael ta Ije-abarim, c'otic ta Dibón-gad.

⁴⁶ Loq'uic bael ta Dibón-gad, c'otic ta Almón-diblataim.

⁴⁷ Loq'uic bael ta Almón-diblataim, c'otic ta witstiquil Abarim, ta sloq'uib c'aal yu'un Nebo.

⁴⁸ Loq'uic bael ta witstiquil Abarim, c'otic ta spamlej q'uinal yu'un Moab, ta sts'eel muc'ja' Jordán ta jejch' ja' yu'un Jericó.

⁴⁹ Te campamento yu'unic ay ta sts'eel muc'ja' Jordán, jajch' bael ta Bet-jesimot c'alal ta Abel-sitim, ta spamlej q'uinal yu'un Moab.

Mandaliletic yu'un bit'il ya x'ochic ta yu'uninel soc spuquel te sq'uinal Canaán

⁵⁰ Ta bay spamlej q'uinal yu'un Moab ta sts'eel te muc'ja' Jordán, ta jejch' ja' yu'un Jericó, te Cajwaltic la sc'opon te Moisés, jich la yalbey:

⁵¹ —Albeya te israeletic: “C'alal ya xc'axex bael ta Jordán te tey ya x'ochexix bael ta Canaán,

⁵² nutsaic loq'uel spisil yajwal te lumq'uinale. Jinaic spisil te yajcanan te pasbil ta ton soc taq'uin ultesbil ta c'ajc'. Jinaic coel spisil toyol ch'uunjibaletic yu'unique.

⁵³ U'uninaic te lumq'uinal soc nainanic, melel jo'on ya cac'beyex, swenta yu'un ya x'ainex tey a.

⁵⁴ Ja'uc me to, ya me apucbey abaic te q'uinal ta swenta snumeroil ta na'el, ta chajbalchajp te ats'umbalique. Teme bayal ta jtul ay yu'un te jchajbe, muc' me sq'uinal ya yich' stuquelic, yan teme jteb naxe, jteb nax me ya yich'ic. Ta chajbalchajp te ats'umbale ya me yich'ic jich yipal q'uinal te ya yac' ta na'el te snumeroile.

⁵⁵ Yan teme ma la anutsbeyic loq'uel yajwal te lumq'uinale, te mach'atic ya xjil ya me xjajch' yuts'inat jichuc ts'ubil lum ya x'och ta asit, soc jich bit'il ch'ix ya sjulat, te c'alal ya xnainex ta bay lumq'uinale.

⁵⁶ Jich yu'un ja' me ya jpasbeyex ta atojolic te bila jnopoj ta co'tan ya jpasbey te cananeoetique”, uta me —xi' te Cajwaltique.