Números 32 - Bible in Tzeltal de Oxchuc y Tenejapa

Sts'umbal Rubén soc Gad nainic ta stojol sloq'uib c'aal yu'un Jordán

¹ Te sts'umbal Rubén soc Gad ay bayal ta jyalel te chambalametic yu'unique. C'alal la yilic te lumq'uinal yu'un te Jazer soc te Galaad te mero lec yu'un yawil te chambalametic,

² jich yu'un ba sc'oponic te Moisés, te sacerdote Eleazar soc te jtsobwanejetic yu'un te lume. Jich la yalbeyic:

³ —Aiya awaiyic stojol, ta bay q'uinaletic yu'un te lum Atarot, Dibón, Jazer, Nimra, Hesbón, Eleale, Sebam, Nebo soc Beón,

⁴ te la yu'uninix Cajwaltic ta swenta te lum Israel, ja' te banti ay aquiltic yu'un swe'el te jchambalamtique. Te bila ay cu'untic jo'otic te awabatotique, ja' te jchambalamtique.

⁵ Teme lec ya awaiyique, ac'botic jo'otic te q'uinale, jich ma xawac'otic c'axel ta muc'ja' Jordán —xiic.

⁶ Ja'uc me to, te Moisés la sjojc'obey: —¿Yu'un bal li' ya xjilex atuquelic to, te bit'il ya xbajt'ic ta guerra te alumale?

⁷ ¿Bistuc ya achebantesbey yo'tanic te alumal israeletic te ma xc'axex bael ta bay lumq'uinal te ya yac'beyex te Cajwaltique?

⁸ Jich nix la spasic te atatic te la jticun tel c'alal ta Cades-barnea ta stsajtayel te q'uinale.

⁹ C'otic c'alal ta beja' yu'un Escol, jich la stsajtayic te q'uinale. Ta patil la xchebantesbey yo'tanic te israeletic, swenta yu'un jich ma x'ochic bael ta lumq'uinal te ac'bilic yu'un te Cajwaltique.

¹⁰ Ja' yu'un te Cajwaltic ilin te bi c'aalil c'ot ta pasele, soc jamal la yal:

¹¹ “Te mach'atic loq'uic tel ta Egipto te ayic ta jtab ya'wilalic baele, ma me x'ac'bot yilic te q'uinal te mero muc' sc'oplal calojbey te Abraham, Isaac soc Jacob, melel ma junuc yo'tanic la xch'uunbonic jc'op.

¹² Ja' nax stuquel te Caleb, te snich'an Jefone te Cenezeo-winic, soc te Josué, te snich'an Nun, te jun yo'tan la xch'uunbonic jmandal”, la yut.

¹³ Te Cajwaltic ilin ta stojol te israeletique. Jich la yac' beenuc ta muc'ul jochol taquin q'uinal cha'winic (40) ja'wil, ja' to c'alal ma'yuquix mach'a cuxul jilel te mach'atic la sle smulic te amen yat'elique.

¹⁴ Yo'tic te ja'exe te ja' atatic te la sle smulique, ja' ya ac'an ya anopbeyic te yat'ele, swenta yu'un ta yan buelta ya ajajch'esbeyic yilimba Cajwaltic ta stojol te lum Israel.

¹⁵ Teme ma x'ac'an ach'uunic te Cajwaltic, ya me yac' jilel bayal xan c'aal ta jochol taquin q'uinal te israeletique, jich yu'un te ja'exe ja' me ya amulinic teme ya yich'ic jinele —xi' te Moisese.

¹⁶ Jich yu'un, noptsajic tel ta stojol Moisés, jich la yalbeyic: —Te bila ya jc'antic, ja' te ya jpasbeytic scorral li'to te chijetic soc te wacaxetic cu'untique, soc lumetic yu'un te mach'atic ay cu'untique.

¹⁷ Yan te jo'otic ya jchajban jbajtic yu'un guerra ta ora nax. Ya xbootic ta scoltayel te yantic jlumaltic ja' to me te bay c'alal ya staic jilel te sq'uinalique. Yan te mach'atic ay cu'untic li' me ya xjilic ta lumetic to. Jun me yo'tanic, ma ba ya x'ochic ta c'abal yu'un te mach'atic li' ayic ta q'uinal to.

¹⁸ Ja' to me ya sujt'otic ta jnatic a, teme spisil israeletic la staic jilel te sq'uinalique.

¹⁹ Jich bit'il ya jq'uinalintic jilel tey ta jejch' ja' ta stojol sloq'uib c'aal yu'un te muc'ja' Jordán, ma ba ya xc'opojotiquix yu'un q'uinal ta jejch' ja' Jordán, ni lum to bael —xiic.

²⁰ Te Moisés la sjac': —Teme ya xc'ot ta pasel awu'unic te ac'opique, soc teme ya achajban abaic ta yaq'uel guerra, jich nix te bit'il ya sc'an te Cajwaltic,

²¹ teme apisilic ya xc'axex bael ta muc'ja' Jordán, jich bit'il ya sc'an te Cajwaltic, teme ja' to c'alal ya sticun loq'uel Cajwaltic te acontroique,

²² teme ja' to ya sujt'ex tel a te c'alal ju'ix ta yich'el te lumq'uinale, jich me libre ya xjilex a te bila ay ta awentaic spasel ta swenta te Cajwaltic soc ta swenta te alumale. Jich yu'un in q'uinal to ja' me awu'unic ya xc'ot, te jich nix yo'tan te Cajwaltique.

²³ Teme ma jichuc ya apasic, ya me ana'ic te la ataix amulic ta stojol Cajwaltic a. Ya me sta yorail te ya xtal castigo ta atojolic yu'un te amulique.

²⁴ Pasaic abi te lumetic ta swenta te mach'atic ay awu'unique, soc te corraletic yu'un te chijetic awu'unique, pero ya me ac'otesic ta pasel te ac'opique —xi' te Moisese.

²⁵ Te mach'atic sts'umbal Gad soc Rubén la sjaq'uic: —Ja' te abatotic awu'un ya me jpastic te bila mandal awalojixe.

²⁶ Te quinamtic, te jnich'nabtic te tsailic to, te wacaxetic soc spisil te chambalametic ya me xjilic li'to ta lumetic yu'un Galaad.

²⁷ Te jo'otic te awabatotic ya me jchajban jbajtic soc cat'ejibtic, ya me xbootic ta guerra ta swenta te Cajwaltic, jich bit'il smandal yalojbotic stuquel —xiic.

²⁸ Jich yu'un te Moisés la spas ta mandal te sacerdote Eleazar, Josué soc te jtsobwanejetic yu'un te israeletic ta chajbalchajp:

²⁹ —Spisil te winiquetic te sts'umbal Gad soc Rubén, te chapalic soc yat'ejibic yu'un guerra, teme ya sjoinex c'axel ta muc'ja' Jordán, jich te bit'il mandal yu'un te Cajwaltic, ja' to c'alal ya awich'ic te lumq'uinal, jich yu'un ja' me ya awac'beyic te lumq'uinal yu'un Galaad, te ja' sq'uinalic ya xc'ot.

³⁰ Ja'uc me to, teme ma chapaluc ya xc'axic bael soc yat'ejibique, tey me ya sta sq'uinalic ta awolilic ta lumq'uinal yu'un Canaán —xi'.

³¹ Te mach'atic sts'umbal Gad soc Rubén la sjaq'uic: —Ya me jpastic te bila mandal yalojbotic Cajwaltic te awabatotique.

³² Chapal me ya xc'axotic bael soc cat'ejibtic ta slum-sq'uinal Canaán ta xch'uunel smandal te Cajwaltic. Pero ya me jc'antic te ya xjil ta jwentatic te q'uinal ta stojol sloq'uib c'aal yu'un Jordán te ja' jq'uinaltic ya xc'ote —xiic.

³³ Ja' yu'un te sts'umbal Gad soc Rubén soc te olil sts'umbal Manasés, te Moisés ja' la yac'bey sq'uinalin te sq'uinal Sehón, te muc' ajwalil yu'un amorreoetic, soc te sq'uinal Og, te muc' ajwalil yu'un Basán, soc te lumetic te ayic ta swenta soc te lumq'uinal ta sjoyobalique.

³⁴ Te mach'atic sts'umbal Gad la xcha'pasic xan te lumetic Dibón, Atarot, Aroer,

³⁵ Atarot-sofán, Jazer, Jogbeha,

³⁶ Bet-nimra soc Bet-arán, la spasbeyic tulan sts'ajc'ul. Soc la spasbey scorralic te xchijique.

³⁷ Te mach'atic sts'umbal Rubén la xcha'pasic te lumetic Hesbón, Eleale, Quiriataim,

³⁸ Nebo, Baal-meón soc Sibma. Ay che'oxeb lumetic la sjeltaybeyic te sbiilique, soc la slebey sbiilic te lumetic te la spasique.

³⁹ Te sts'umbal Maquir te snich'an Manasés ochic bael ta slum-sq'uinal Galaad. La snutsic loq'uel te amorreoetic, soc la yu'uninbeyic sq'uinal.

⁴⁰ Jich yu'un te Moisés la slebey sq'uinal te sts'umbal Maquir ta bay lumq'uinal Galaad tey nainic a.

⁴¹ Te Jair, te jtul sts'umbal Manasés, la yu'unin cheb oxeb campamento yu'un te amorreoetic, soc la yac'bey sbiilin Havot-jair.

⁴² Te Noba soc te mach'atic yu'un, la yu'unin te lum Kenat soc te ch'in lumetic te ayic ta swenta. Ja' nix Noba c'ot sbiil yu'un.