Números 31 - Bible in Tzeltal de Oxchuc y Tenejapa

La yich' lajinel Madián

¹ Te Cajwaltic la sc'opon te Moisés, jich la yalbey:

² —Sujt'esbeya spacol te madianetic te la yuts'inic te israeletique. Ta patil ya me xlajat —xi' sc'oplal te Moisese.

³ Jich yu'un te Moisés la yalbey te lume: —Ya me achajban abaic soc awat'ejibic, yu'un ya xba awac'beyic guerra te madianetic, yu'un ya cac'beytic spacol ta swenta te Cajwaltique.

⁴ Ta juju-jchajp ya me sticun jmil (1,000) ta jtul winiquetic yu'un guerra —xi'.

⁵ Jich yu'un te juju-jchajp soldadoetic yu'un chajbalchajp sts'umbal Israel, la stsaic loq'uel jmil (1,000) ta jtul winiquetic, lajchaymil (12,000) ta spisil, chapalic soc yat'ejibic yu'un guerra.

⁶ Te Moisés la sticun bael ta guerra. Sjoinej bael te Finees, snich'an te sacerdote Eleazar, te ja' yich'oj bael stuquel te ch'ul biluquetic soc te oq'uesetic te ya yac' ta na'el te bi ora ya xjajch' guerra.

⁷ La yac'bey sbaic guerra soc te madianetique. La smilic ta spisilic, jich bit'il la yal mandal Cajwaltic ta stojol Moisés.

⁸ La smilic te Evi, Requem, Zur, Hur soc te Reba, ja' te jo'tul muc' ajwaliletic yu'un te madianetique, soc nix te Balaam te snich'an Beor.

⁹ Te israeletic la yiq'uic bael ta chuquel te antsetic yu'un madianetic, soc te yalatac te tsailic toe, soc la spojbeyic te xchamsbalamic: te swacaxic, te xchijic, soc te bitic bayal stojole.

¹⁰ Soc la xchic'beyic spisil te lumetic soc te campamentoetic yu'unique.

¹¹ Ta spisil te bitic la spojbeyic, ja' te antsetic soc te chambalametique,

¹² la yic'beyic bael ta stojol Moisés, te sacerdote Eleazar soc te lum Israel, ta bay scampamentoic ta spamlej q'uinal yu'un Moab, ta sts'eel muc'ja' Jordán, ta jejch' ja' yu'un lum Jericó.

¹³ Te Moisés, te sacerdote Eleazar soc spisil te jtsobwanejetic yu'un te lume, loq'uic bael ta scampamentoic, ba staic tel.

¹⁴ Ja'uc me to, te Moisés ilin soc te jtsobwanejetic te ayic ta stojol te jmil (1,000) soc te jo'winic (100) soldadoetic te yacal ta sujt'el tel ta guerra,

¹⁵ jich la yalbey: —¿Bi yu'un cuxul awu'unic te antsetique?

¹⁶ Melel ja'ic la xch'uunbeyic sc'op te Balaam. Jich la yac'bey scontroin Cajwaltic te israeletic, te ba yich'ic ta muc' te Baal-peor. Ja' swentail te Cajwaltic la yac'bey castigo ta swenta tulan chamel te lum yu'une.

¹⁷ Jich yu'un milaic ta ora yo'tic ta spisil te alalqueremetic soc spisilic te antsetic te tabiliquix ta winique.

¹⁸ Yan te ach'ixetic ac'a cuxinuc stuquelic, ic'aic stuquel.

¹⁹ Soc te jayebex te ay mach'atic amilojique, o teme ay la apic te anima, ainanic ta spat campamento juqueb c'aal. Te ja'ex soc te mach'atic la achuquic tele, ya me sc'an ya alecubtes sc'oplal abaic ta yoxebal c'aal soc ta sjuquebal c'aal.

²⁰ Lecubtesaic me sc'oplal spisil te c'u'iletic soc spisil te bitic pasbil ta nujc'ul, te bitic pasbil ta stsotsil tentsun, soc te bitic pasbil ta te' —xi' te Moisese.

²¹ Te sacerdote Eleazar jich la yalbey spisil te soldadoetic te la yaiyic guerra: —Ja' mandalil yu'un Cajwaltic te la yac'bey Moisés:

²² Te bitic pasbilic ta oro, plata, bronce, hierro, estaño soc plomo,

²³ jun nax sc'oplal ta spisil te bitic ya xcujch' yu'un te c'ajq'ue. Jich yu'un ac'a yich'ic lecubtesel sc'oplal awu'unic swenta yaq'uel ochel ta c'ajc', soc ac'a yich'ic poquel ta ja' yu'un lecubtesel sc'oplal. Yan te biluquetic te ma xcujch' yu'unic te c'ajq'ue, ja' nax me ac'a yich'ic lecubtesel sc'oplal awu'unic ta ja'.

²⁴ Ta sjuquebal c'aal ya me sc'an ya asaq'uic te ac'u'-apaq'uique, jich me lecuben ac'oplal ya xjilex. Ta patil ya me xju' ya x'ochex bael ta campamento —xi'.

La yich' puquel bitic yich'oj pojel

²⁵ Te Cajwaltic, jich la yalbey te Moisés:

²⁶ —Ya me scoltayat te sacerdote Eleazar soc te tatiletic ta chajbalchajp na yu'un te lume, ajtaya te mach'atic cuxulic soc te chambalametic te pojbotic tel te madianetique,

²⁷ pajal xawac' ta cha'chajp. Te jchajbe pucbeya te mach'atic xc'otuquic ta guerra. Te xcha'chajbale ja' me ya xc'ot ta swenta te jich xan yipal te israeletique.

²⁸ Ya me aloq'uesbon jchajbuc cu'un: ta jujun jo'winic xcha'bajc' (500) juju-jtul me ya aloq'ues te jaytul ach'ixetic ya xc'ot ta swentaic te soldadoetic, soc nix te wacaxetic, burroetic soc te chijetique.

²⁹ Ja' me ya awac'bey te sacerdote Eleazar ta swenta spatanic ta jtojol.

³⁰ Te jchajp xan te ya x'ac'bot ta swentaic te jayeb xan israeletic, ja' te ach'ixetic, te wacaxetic, te burroetic soc te chijetique, ja' ta spisil te chambalametique, jujun me ya aloq'ues ta lajlajuneb yoxwinic (50), ja' me ya awac'beyic te levitaetic te ayic ta abatinel ta ch'ul awilal cu'une —xi' te Cajwaltique.

³¹ Te Moisés soc te Eleazar jich la spasic te bila mandal la yal Cajwaltic ta stojol Moisés.

³² Ta spisil te bila la spojbeyic te scontroic, ma ba la yich' ajtayel te bila la yich'ic lajinel yu'un te soldadoetique. Ja'uc me to, loc' jo'lajuneb xchanlajunwinic xcha'bajc' ta jmil (675,000) chijetic,

³³ lajchayeb xchanwinic ta jmil (72,000) wacaxetic,

³⁴ jun xchanwinic ta jmil (61,000) burroetic

³⁵ soc lajchayeb xcha'winic ta jmil (32,000) ach'ixetic.

³⁶ Ja' yu'un te jchajp c'ot ta swentaic te soldadoetic, juclajuneb sjuclajunwinic ta jmil soc jo'winic xcha'bajc' (337,500) chijetic.

³⁷ Tey la sloq'uesic jo'lajuneb xchanlajunwinic xcha'bajc' (675) yu'un spatanic la yac'beyic ta stojol te Cajwaltique.

³⁸ Te waclajuneb xcha'winic ta jmil (36,000) wacaxetic, la sloq'uesic lajchayeb xchanwinic (72) yu'un spatanic te la yac'beyic ta stojol te Cajwaltique.

³⁹ Te lajuneb xcha'winic ta jmil soc jo'winic xcha'bajc' (30,500) te burroetic, la sloq'uesic jun xchanwinic (61) ta jcojt' yu'un spatanic ta stojol te Cajwaltique.

⁴⁰ Te waclajuneb ta jmil (16,000) te ach'ixetique, la sloq'uesic lajchayeb xcha'winic (32) ta jtul yu'un spatanic ta stojol te Cajwaltique.

⁴¹ Te Moisés la yac' te patanil yu'un Cajwaltic ta sc'ab te sacerdote Eleazar, jich bit'il yaloj mandal te Cajwaltique.

⁴² Te olil xan ac'bot ta swentaic te jayeb xan israeletic, melel la sloq'uesix Moisés te jchajp la yich'ic te soldadoetique.

⁴³ Mero pajal a c'ot ta jyalel, melel juclajuneb sjuclajunwinic ta jmil soc jo'winic xcha'bajc' (337,500) chijetic,

⁴⁴ waclajuneb xcha'winic ta jmil (36,000) wacaxetic,

⁴⁵ lajuneb xcha'winic ta jmil soc jo'winic xcha'bajc' (30,500) burroetic,

⁴⁶ soc waclajunmil (16,000) ach'ixetic.

⁴⁷ Te Moisés la sloq'ues jujun te lajlajuneb yoxwinic (50), ja' nix jich te ach'ixetic soc te chambalametique. La yich'ic ac'beyel te levitaetic te ya x'at'ejic ta ch'ul awilal yu'un te Cajwaltic, jich te bit'il yaloj mandale.

⁴⁸ Jich yu'un te jtsobwanejetic te ayic ta stojol te jujun jmil (1,000) soc te jo'jo'winic (100) soldadoetic, ba sc'oponic te Moisés.

⁴⁹ Jich la yalbeyic: —Jo'otic te awabatotic la cajtaytic te soldadoetic te ay ta jwentatique, ma'yuc bay ch'ayem jtuluc.

⁵⁰ La quich'tiquix tel te bitic la jtatic juju-jtul te pasbilic ta oro: staq'uinal c'abaletic soc snuc' c'abaletic, ch'ocowetic, staq'uinal chiquiniletic soc yantic bila la xch'al sbaic a, ya cac'beytic te Cajwaltic, yu'un jich me c'oem te ya jwejt'estic perdón a —xiic.

⁵¹ Te Moisés soc te Eleazar la yich'ic spisil te bila pasbil ta oro.

⁵² Te oro la yaq'uic ta swenta spatanic te jtsobwanejetic te ya xmandalajic ta stojol chajbalchajp jmil (1,000) soc te chajbalchajp jo'winic (100) soldadoetic, ay chaneb slajunwinic (184) kilo te yalale.

⁵³ Melel juju-jtul soldado la yich'ic tel jtebuc te la spojbeyic tel te scontroe.

⁵⁴ Jich yu'un te Moisés soc te Eleazar la yich'beyic te jtsobwanejetic te oro la yich'ic tele, la yich'ic bael ta Nailpac' te bay ya yich' c'oponel te Cajwaltique, swenta yu'un jich me ya sna' a te israeletique.