Números 30 - Bible in Tzeltal de Oxchuc y Tenejapa

Mandaliletic yu'un te bila ya yich' chapel ta stojol Dios

¹ Te Moisés la yalbey te mach'atic jtsobwanejetic yu'un ta chajbalchajp te israeletique: —Te Cajwaltic yaloj mandal,

² te c'alal ay mach'a ya xchap sc'op ta stojol Dios, o teme ay bila jc'axel ya yal ta jamal te ya spase, ya me sc'an sc'otes te sc'ope, ya me spas spisil te bila yaloje.

³ “Teme ay ach'ix te wentainbil to yu'un stat te ya xchap sc'op ta stojol Cajwaltic, o teme ay bila ya yal sba ta spasele,

⁴ teme ya yaiy stojol stat te bila la xchape, teme ma'yuc bila ya yal yu'une, te ach'ixe ya me spas ta puersa te bila yaloje.

⁵ Yan teme ma jichuc yo'tan stat te c'alal ya yaiy stojole, ma puersauc ya spas te bila yaloje. Ja' yu'un te bit'il ma jichuc yo'tan te state, te Cajwaltic ya me spasbey perdón yu'un.

⁶ “Teme ay jtul ants te ya xchap sc'op ta stojol Cajwaltic ta ora naxe, teme ya xnujbin ta patil,

⁷ teme la yaiy stojol te smamlale, teme ma'yuc bila ya yal yu'une, te ants ya me spas ta puersa te bila xchapoje.

⁸ Yan teme ma jichuc yo'tan te smamlale, jich yu'un te antse ma me spasix te bila xchapoj te ora nax snopoje. Te Cajwaltic ya me spasbey perdón yu'un.

⁹ “Teme me'ba ants, o teme ijq'uitaybil, te ya xchap sc'op ta stojol Cajwaltic, puersa me ya spas spisil te bila yaloje.

¹⁰ “Teme nujbinem te ants te ya xchap sc'op ta stojol Dios, o teme ay bila ya yac' sba ta spasel te jc'axel ya yal ta jamal ta stojol Dios, te ay ta sna soc a te smamlale,

¹¹ teme la yaiy stojol te smamlale, teme ma'yuc bila ya yal yu'une, o teme ma ba ya yal ta jamal te ma jichuc yo'tane, jich yu'un te antse puersa ya spas te bila la xchape o te bila jc'axel yaloj ta jamale.

¹² Yan teme ya slajinbey sc'oplal te smamlale, te ma jichuc ya xc'ot ta yo'tan te c'alal ya yaiy stojole, jich ma puersauc ya spas te antse, melel la slajinbey sc'oplal ta pasel te smamlale. Jich yu'un te Cajwaltic ya me spasbey perdón yu'un.

¹³ “Te smamlale ya xju' ya snup'inbey sc'oplal, o ya slajinbey sc'oplal, te bila xchapoj te yinam te yaloj ta jamal ta stojol Dios, te ya sujot ta scomel swe'el yu'une.

¹⁴ Teme ma'yuc bila ya yalbey yinam te winique, teme ya xc'ax bael jun cheb c'aale, ja' seña ya yac' ta ilel a te ya snup'inbey sc'oplal spisil te bila xchapoj ta pasel te antse.

¹⁵ Yan teme neel yaiyoj stojol, teme patil ya slajinbey sc'oplale, ja' me swenta ya xc'ot te winic te ma ba ya xc'otix ta pasel yu'un te antse —xi' te Moisese.

¹⁶ Ja' mandaliletic yu'un Cajwaltic la yac'bey Moisés, te bit'il ay sc'oplal te winic soc te yiname, te tatil soc te yantsil-nich'an teme wentainbil to yu'un te state.