Números 3 - Bible in Tzeltal de Oxchuc y Tenejapa

Te bitic yat'el ac'bot spasic te levitaetic

¹ Ja'ic te sts'umbal Aarón soc Moisés ta yorail te c'alal c'oponot yu'un Cajwaltic ta Sinaí.

² Jich ay sbiilic te snich'nab Aarón: Nadab, ja' te banquilale, Abiú, Eleazar soc Itamar.

³ Ta xchantululic la yich'ic ch'ultesel yu'un Dios, soc ac'bot yich' yat'elic swenta yu'un ya x'ochic ta spasel yat'elic ta sacerdoteil.

⁴ Ja'uc me to, te Nadab soc Abiú milot yu'un Cajwaltic, melel ta jochol taquin q'uinal ta bay wits Sinaí, ma smandaluc Dios te c'ajc' la yaq'uic ta stojol te Cajwaltique. Ma'yuc snich'nabic jilel, jich yu'un ja' nax te Eleazar soc te Itamar at'ejic ta sacerdoteil, wentainotic yu'un Aarón, ja' te statique.

⁵ Te Cajwaltic la sc'opon xan Moisés, jich la yalbey:

⁶ —Ic'a tel mach'atic sts'umbal Leví, swenta yu'un ya me yac' sbaic ta swenta Aarón, soc ac'a me yac' sbaic ta abatinel yu'un.

⁷ Ya me yac' sbaic ta abatinel ta stojol Aarón soc spisil te lum ta Nailpac' te bay ya quich' c'oponele. Ja' me ya x'och ta swentaic te abatinel ta ch'ul awilal.

⁸ Ja' me ya scanantaybeyic sbiluquil te Nailpac' te bay ya quich' c'oponele, soc ya me yac' sbaic ta abatinel yu'unic te israeletic ta spasel spisil te bitic ay ta pasel ta ch'ul awilal.

⁹ Parte xawac' te levitaetic te ayic ta yolil te israeletic, swenta yu'un ya me yat'elinic abatinel ta stojol Aarón soc te sts'umbale.

¹⁰ Ja' nax me ya spasic yat'el ta sacerdoteil te Aarón soc te sts'umbale. Teme ay mach'a jich nax ya scuy sba ta sacerdote ta spasel te at'el, ya me yil swocol ta milel yu'un —xi' te Cajwaltique.

Te levitaetic ja' yu'un Cajwaltic

¹¹ Te Cajwaltic la sc'opon Moisés, jich la yalbey:

¹² —Te levitaetic la jtsa loq'uel ta yolilic te israeletic, ja' sjelol c'oemic te sba snich'anic te juju-jchajp nae. Cu'un me ta spisilic,

¹³ melel jo'on cu'un te ba-nich'aniletique. C'alal la cac' lajuc spisilic te sba snich'anic te egipcioetic, la jc'uxtay jilel, yu'un ya cu'unin te sba snich'anic te israeletic, soc te sba yalatac te xchamsbalamique. Jich yu'un jo'on me cu'un te Ajwalilone —xi'.

Censo yu'un levitaetic

¹⁴ Te Cajwaltic la sc'opon te Moisés ta bay jochol taquin q'uinal ta Sinaí, jich la yalbey:

¹⁵ —Ac'a ta censo te levitaetic ta swenta chajbalchajp snaic soc chajbalchajp sbiilic. Ts'ibuya ta jun ta spisilic te levitaetic, c'alal ta jun u yayinel —xi' te Cajwaltique.

¹⁶ Te Moisés la yac' ta censo, jich bit'il albot mandal yu'un te Cajwaltique.

¹⁷ Te snich'nab Leví, ja'ic te Gersón, Coat soc Merari.

¹⁸ Te mach'atic sts'umbal Gersón ta chajbalchajp, ja'ic te Libni soc Simei.

¹⁹ Te mach'atic sts'umbal Coat ta chajbalchajp, ja'ic te Amram, Izhar, Hebrón soc Uziel.

²⁰ Te mach'atic sts'umbal Merari ta chajbalchajp, ja'ic Mahli soc Musi. Spisilic ja'ic te sts'umbal Leví swenta chajbalchajp te snaique.

²¹ Te mach'atic sts'umbal Gersón ja'ic te patil alnich'anetic yu'un Libni soc Simei.

²² Ta spisil te winiquetic soc alalqueremetic te ochic ta jun asta te jun to nax u yayinelic, loc' jucmil soc jo'winic xcha'bajc' (7,500).

²³ Te mach'atic pajal sbiilic la spas scampamentoic ta stojol smalib c'aal ta spat te Nailpac' Templo.

²⁴ Te jtsobwanej yu'un te sts'umbal Gersón, ja' te Eliasaf snich'an Lael.

²⁵ Te bit'il ayic ta abatinel ta Nailpac' te bay ya yich' c'oponel te Diose, ja'ic ay ta swentaic scanantayel te ch'ul awilal, te nailpac' yu'une, te smujq'uil nujc'ul, te smajq'uil pac' te ay ta yochibal te Nailpac',

²⁶ te paq'uetic yu'un te scorralil, te pac' yu'un te yochibal corral te joybil tel ta spat te ch'ul awilal, soc te scajtijib smajt'an, soc te bitic ya xchuquic a soc spisil te bitic ya xtuun yu'une.

²⁷ Te mach'atic sts'umbal Coat, ja'ic te patil alnich'anetic yu'un Amram, Izhar, Hebrón soc Uziel.

²⁸ Ta spisil te winiquetic soc alalqueremetic te ochemic ta jun asta te jun to nax u yayinelic, loc' waxacmil soc jo'lajunwinic (8,300) ta jtul. Te mach'atic pajal sbiilic, ja' la scanantayic te ch'ul awilal,

²⁹ soc la spas scampamentoic ta stojol sur.

³⁰ Te jtsobwanej yu'unic ja' te Elizafán te snich'an Uziel.

³¹ Te mach'atic pajal sbiilic ja' ay ta swentaic scanantayel te scajonil trato, te mesa, te scajtijib c'ajq'uetic, te cheb scajtijib majt'aniletic soc te bitic ch'ultesbil te ya xtuun ta yorail yich'el ta muc' Dios, te pac' te ya smac ta olilal te ch'ul awilal, soc spisil te sbiluquil te ayic ta tuuntesele.

³² Te muc' jtsobwanej yu'un te levitaetic, ja' te Eleazar, snich'an te sacerdote Aarón. Ja' ay ta swenta yilel spisil te jcanantaywanejetic yu'un te ch'ul awilal.

³³ Te mach'atic sts'umbal Merari, ja'ic te patil alnich'anetic yu'un Mahli soc Musi.

³⁴ Ta spisil te winiquetic soc alalqueremetic te ochic ta jun asta te jun to nax u yayinelic, wacmil soc lajunwinic (6,200) ta jtul.

³⁵ Te jtsobwanej yu'unic ja' te Zuriel te snich'an Abihail. Tey la spas scampamentoic ta stojol norte yu'un te Nailpac' Templo.

³⁶ Te sts'umbal Merari, ja' ay ta swentaic scanantayel te marcoetic yu'un te Nailpac' Templo, te ste'elic, te posteetic yu'un, te yiptajibic soc spisil te bitic ya xtuun yu'une,

³⁷ soc te posteetic yu'un sjoyobal te scorralil, te yiptajibic, te estacaetic soc te bitic ya xchuquic a.

³⁸ Ta stojol sloq'uib c'aal ta yelaw te Nailpac' te bay ya yich' c'oponel Dios, tey la spas scampamentoic te Moisés, Aarón soc te snich'nab Aarón. Ja'ic la scanantayic te ch'ul awilal ta swenta te sjo'tac israeletique. Teme ay mach'a jich nax ya xjajch' ta at'el te ya scuy sba ta sacerdote, ya me yil swocol ta milel yu'un.

³⁹ Jich la spas Moisés soc Aarón te la yaq'uic ta censo te levitaetic, te juju-jchajp la yaq'uic te bit'il ay te sbiilique, jich bit'il yaloj mandal te Cajwaltique. Loc' yajtalul te winiquetic soc alalqueremetic te jun to nax u yayinelic, cheb xcha'winic ta jmil (22,000) ta spisil.

Wejt' sjelol ba-nich'aniletic

⁴⁰ Te Cajwaltic la yalbey Moisés: —Ac'a ta censo te sba alalqueremetic yu'un israeletic te jun u yayinel baele, ac'beya ta jun te sbiilique.

⁴¹ Ta ora to te sba alalqueremetic yu'un te israeletic, ja' sjelolic te levitaetique. Jo'on te Ajwalilone. Ja' nix jich te sba yalatac xchamsbalamic te israeletic, ja' nix ya sjelolin te xchamsbalam levitaetique —xi' te Cajwaltique.

⁴² Te Moisés la yac' ta censo te ba alalqueremetic yu'un te israeletic, jich bit'il la yal mandal te Cajwaltique.

⁴³ Spisil och ta jun te winiquetic soc alalqueremetic te jun to nax u yayinelic baele. Loc' cheb xcha'winic ta jmil soc oxlajuneb xchanlajunwinic (22,273).

⁴⁴ Te Cajwaltic la sc'opon Moisés, jich la yalbey:

⁴⁵ —Ich'a ta wenta te levitaetic, ta swenta sjelol sba snich'anic te israeletique. Ja' nix jich xchamsbalam te levitaetic, ta swenta sjelol ya xc'ot xchamsbalam te israeletique, melel te levitaetic, ja' cu'un. Jo'on te Ajwalilone.

⁴⁶ Ja'uc me to, te sba snich'anic te israeletic, c'axem jich yipalic a te bit'il levitaetique. Jich yu'un, swenta ya xcolic te oxlajuneb xchanlajunwinic (273) sba-nich'aniletic xan te ya spas sobra te yajtalulic,

⁴⁷ c'anbeya spatanic, jo'sejp plata juju-jtul, jich nix te bit'il chapalix sp'isol yalal ta ch'ul awilal te bulucheb gramo yalal te juju-jsejpe.

⁴⁸ Te taq'uin ac'beya ta sc'ab Aarón soc snich'nab, yu'un jich coltaybil loq'uel ya xc'otic a te jaytul sobrail —xi' te Cajwaltique.

⁴⁹ Te Moisés la stsob te taq'uin ta swenta scoltayel sba snich'nab israeletic te la spas sobraile.

⁵⁰ Tsobaj jmil soc jo'eb sbalunlajunwinic (1,365) ta jsejp plata, jich nix bit'il chapalix sp'isol yalal ta ch'ul awilal.

⁵¹ Ta patil la yac'bey Aarón soc snich'nab, jich bit'il yaloj mandal te Cajwaltique.